Напярэдадні Старога Новага года Вялікі тэатр Беларусі зладзіў сапраўдную казку. Наведвальнікі прынялі ўдзел у своеасаблівым падарожжы ў часе — апынуліся на святочным балі. Фае тэатра было немагчыма пазнаць: яго запоўнілі дамы ў каляровых пышных сукенках і кавалеры, апранутыя ў фракі.
Дарэчы, першы ў гісторыі баль адбыўся ў Францыі ажно ў XIV стагоддзі. Але калі ўявіць сярэднявечнае свята складана, заўсёды на дапамогу прыйдзе класічная літаратура з яе адвечнымі вобразамі. Так можна нагадаць баль, які апісвае Талстой у рамане-эпапеі «Вайна і мір»: «Экіпажы ад’язджалі, і ўсё пад’язджалі новыя з чырвонымі лакеямі і з лакеямі ў пер’ях на капялюшах. З карэт выходзілі мужчыны ў мундзірах, зорках і стужках; дамы ў атласе і гарнастаях асцярожна сыходзілі па падножцы, і паспешліва і бязгучна праходзілі па сукну пад’езда».
Тое, што зараз ужо 2021 год нагадвалі толькі смартфоны ды ўспышкі фотакамер. Усё астатняе было быццам бы з іншага, даўняга свету.
Але баль — гэта не толькі танцы ды свецкія размовы. Арганізатары падрыхтавалі шмат мерапрыемстваў, пачынаючы з майстар-класа па маляванні на вадзе і заканчваючы інтэлектуальнымі квэстамі.
Тыя, хто жадаў адчуць атмасферу свята як мага глыбей, засяродзілі сваю ўвагу на шматлікіх фотазонах і, канешне ж, на майстар-класе артыста балета Генадзя Кулінковіча. З усіх бакоў чулася класічная музыка — гэта аркестр Вялікага тэатра забаўляў удзельнікаў балю.
Але, канешне ж, кульмінацыяй усяго свята стаў урачысты баль, удзел у якім узялі як артысты і музыкі тэатру, так і госці. Здаецца, менавіта ў гэты момант казка пераўтварылася ў рэальнасць: шамаценне сукенак, смех, пералівы колераў — на некалькі гадзін Вялікі тэатр Беларусі нагадваў святочную залю з тых, што апісаны ў класічных раманах.
Арына КАРПОВІЧ
Фота і відэа Яна ХВЕДЧЫНА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
