Кіроўца аўтобуса, які пацярпеў пры беспарадках у Мінску, знаходзіцца ў бальніцы. Адчувае сябе нармальна, стан стабільны, паведамілі БелТА на прадпрыемстве «Мінсктранс».
Падчас пратэстных акцый у ноч з 10 на 11 жніўня ў раёне станцыі метро «Пушкінская» пацярпеў 51-гадовы кіроўца аўтобуса маршруту 163. Яму прыйшлося спыніцца, так як удзельнікі пратэсту перакрылі праезд.
«Ён апынуўся ў самай гушчы падзей. Спачатку высадзіў людзей. Потым, як я зразумела, выйшаў сам і быў паранены, — распавяла прэс-сакратар «Мінсктрансу» Алена Грамыка.— Зараз ён знаходзіцца ў агульнай палаце ў аддзяленні нейрахірургіі. Стан здавальняючы. Лекары аптымістычна настроены, але рэабілітацыя, магчыма, будзе доўгая».
Паводле яе слоў, пацярпелага наведаў старшыня прафкама прадпрыемства. «Адчувае сябе нармальна, настрой пазітыўны. Трымаецца малайчынам. Няхай папраўляецца, а потым ужо распавядае аб падзеях, якія адбыліся», — дадала прэс-сакратар.
Паводле яе слоў, дыспетчарская служба працуе кругласутачна, рэгулюе рух у працэсе замінак. У ноч на 10 жніўня, а затым у ноч на 11 жніўня ўзнікалі сітуацыі з затрымкамі руху. «Дзякуючы таму, што ёсць сувязь з кіроўцамі, відэа, у працэсе рэгулявалі. І кіраўніцтва, і намеснікі дырэктараў, усе працавалі. І па ходзе прымалі аператыўныя рашэнні. Цяпер ужо нармальна працуем. Спадзяюся, далей сітуацыя будзе паляпшацца», — сказала Алена Грамыка .
Прэв’ю: arnapress.kz
Сумесныя праекты ядзерных тэхналогій.
