Вы тут

Працаваць з людзьмі і для людзей


Да такога падыходу заклікала на сустрэчы членаў Савета Рэспублікі ад Мінскай вобласці старшыня верхняй палаты парламента Наталля Качанава. Нарады з сенатарамі ад канкрэтнага рэгіёна — новая форма работы. Спікер ужо сустрэлася з прадстаўнікамі дэпутацкага корпуса ад Віцебшчыны, Гомельшчыны, Мінска, а 16 студзеня — са старшынямі раённых і гарадскіх Саветаў дэпутатаў Віцебскай вобласці. У сераду Наталля Качанава абмеркавала праблемы прысталічча. Яна падкрэсліла, што Мінская вобласць — няпросты рэгіён. Праблем хапае па зямельных пытаннях, будаўніцтве жылля, добраўпарадкаванні тэрыторый, развіцці гарадоў-спадарожнікаў. Імкнуцца да вырашэння гэтых пытанняў па запыце кожнага жыхара рэгіёна і павінны члены Савета Рэспублікі новага склікання.


Знайсці падыход да кожнага

Работа з людзьмі — тэма, якая стала лейтматывам усіх сустрэч з сенатарамі. «Калі ёсць пытанне, якое неабходна вырашаць аператыўна, а ў вас не атрымліваецца, — калі ласка, тэлефануйце, — адзначыла старшыня Савета Рэспублікі. — Дзе трэба, хутка, аператыўна, усе разам падключымся. Любыя пытанні, якія датычацца любой праблемы. Гэта вельмі важна — нам трэба імгненна рэагаваць на тое, што кажуць людзі». Асабліва такі падыход актуальны для пытанняў невялікіх заробкаў і іх нясвоечасовай выплаты.

Кожны член Савета Рэспублікі павінен імкнуцца вырашыць праблему на сваім узроўні, а калі не атрымліваецца, неабходна звяртацца да калег. Людзі павінны бачыць работу і ведаць сваіх прадстаўнікоў у верхняй палаце парламента.

Савет Рэспублікі ўвядзе ў практыку перад пасяджэннем сесій даваць слова пэўнаму сектару, які раскажа пра дзейнасць на месцы. Таксама прадстаўнікі парламента будуць паведамляць аб рабоце са зваротамі грамадзян — колькі людзей прынялі, пытанняў разгледзелі і дапамаглі вырашыць.

Акрамя гэтага, спікер Савета Рэспублікі прапануе засяродзіць увагу на вылучэнні ў кожным доме старшынь дамавых камітэтаў ці саветаў. Такія прадстаўнікі мясцовага самакіравання стануць своеасаблівым звяном паміж уладамі і жыхарамі. «Я ўсім кажу заўсёды — трэба знайсці падыход да людзей. Начальнікі твае, якія побач з табой, яны выстраяцца пад цябе. Людзей нельга падманваць. Сказаў — зрабіў. Не можаш — скажы, што не можаш сёння, няма магчымасці», — падкрэсліла старшыня верхняй палаты парламента.

Па яе словах, старшыня райвыканкама, побач з якім сенатар і дэпутат Палаты прадстаўнікоў, — гэта сапраўдная сіла. Член Савета Рэспублікі — гэта і ўнікальная магчымасць для мясцовай улады данесці інфармацыю і праблемы рэгіёна да органаў кіравання самага высокага ўзроўню.

Заканатворчасць для жыцця

На гэтым тыдні адбылася сустрэча старшынь пастаянных камісій Палаты прадстаўнікоў і Савета Рэспублікі, дзе былі вызначаны кірункі сумеснай работы. Наталля Качанава ўпэўнена: сенатары павінны падключацца да работы над законамі на пачатковым этапе, каб не ўносіць карэктывы пастфактум. «Так было і ў мінулым скліканні. Нашы калегі гаварылі пра тое, што яны так працавалі. Так правільна, таму што сёння мы дакладна разумеем: усе законы, якія распрацоўваюцца, прымаюцца ў нашай краіне, павінны ісці ад жыцця. Прэзідэнт гэта дакладна сказаў», — паведаміла спікер.

Абгрунтаваныя, актуальныя пытанні і праблемы грамадзян павінны знаходзіць увасабленне ў законапраектах. Як адзначыла Наталля Качанава, у Савет Рэспублікі прыходзяць вельмі цікавыя і плённыя звароты. З гэтай прычыны неабходна крыху перагледзець структуру верхняй палаты, каб імі займалася большая колькасць спецыялістаў. Уключаны сенатары і ў дзейнасць па ўдасканаленні Кодэкса аб адміністрацыйных правапарушэннях, якая цяпер актыўна ідзе ў органах улады.

Пачуць запыты на змены ў заканадаўстве магчыма, толькі сустракаючыся з людзьмі. Так, на ўласным вопыце Наталля Качанава адзначыла неабходнасць унесці карэктывы ў Дэкрэт № 18. Падставу дае гісторыя з жыцця: разведзеная пара не можа раз'ехацца з адной кватэры, а абвастрае канфлікт маці, пазбаўленая бацькоўскіх правоў.

Работа, дастойныя заробкі і даступныя цэны — тыя складнікі годнага жыцця грамадства, над якімі павінны працаваць у тым ліку і сенатары. Галоўнае ў іх дзейнасці — гэта людзі і сумленныя адносіны да іх. «Сумленнасць павінна быць ва ўсім. Калі чалавек бачыць несумленнасць у ахове здароўя, адукацыі, культуры, эканоміцы, на прадпрыемстве, не трэба праходзіць міма яго звароту», — заўважыла Наталля Качанава.

Парадак работы на будучыню

Спікер Савета Рэспублікі заклікала калег да актыўнага супрацоўніцтва са сродкамі масавай інфармацыі. На экранах тэлевізараў, у матэрыялах прэсы павінна з'яўляцца не толькі кіраўніцтва палат парламента.

Члены Савета Рэспублікі ў найбліжэйшы час вырашаць, хто будзе працаваць у міжпарламенцкіх супольнасцях (сумесных органах Саюзнай Дзяржавы, групах дружбы і іншых).

Пастаўлена задача для сенатараў — рыхтавацца да чарговага Форуму рэгіёнаў Беларусі і Расіі. Сфарміраваны аргкамітэт на чале з намеснікам старшыні Савета Рэспублікі Анатолем Ісачанкам. Плануецца, што сёлета мерапрыемства прыме Мінск і вобласць. Па тэматыцы форум зробіць акцэнт на святкаванні 75-годдзя Перамогі ў Вялікай Айчыннай вайне.

«Ужо зараз трэба актыўна займацца гэтым, таму што пытанняў будзе шмат. Год будзе насычаны ўсімі падзеямі. І палітычна вельмі важны год, і ў сацыяльным плане важны год. Таму нам цяпер трэба дакладна выбудоўваць гэтую работу», — заўважыла Наталля Качанава.

У найбліжэйшы час пачне працаваць даўно анансаваны маладзёжны парламент, якія сфарміруецца пад патранатам Савета Рэспублікі.

Марыя ДАДАЛКА

Фота Ганны ЗАНКАВІЧ

Выбар рэдакцыі

Культура

Дзяніс Раманюк: Я раблю этнаграфію «дваццаць пятым» кадрам

Дзяніс Раманюк: Я раблю этнаграфію «дваццаць пятым» кадрам

Пышныя альбомы, выдадзеныя Дзянісам Раманюком, з задавальненнем трымаюць у хатніх бібліятэках як беларусы, бо адчуваюць гонар за краіну, так і замежнікі, бо невядомую культуру даследуюць праз высакакласны кніжны твор.

Грамадства

Санны рэйд. Як партызаны здзейснілі пераможную аперацыю на Палессі ў 1942-м

Санны рэйд. Як партызаны здзейснілі пераможную аперацыю на Палессі ў 1942-м

Сёлетняя зіма на снег, скажам прама, зусім небагатая. Але ў лютым і сакавіку 1942 года, калі пра глабальнае пацяпленне ніхто і не чуў, снегу было вельмі шмат.

Спорт

Барэц Максім Нягода: Пасля кожнага медаля трэба пачынаць з нуля

Барэц Максім Нягода: Пасля кожнага медаля трэба пачынаць з нуля

Барысаўчанін са шматдзетнай сям'і стаў чэмпіёнам кантынента.

Культура

Хто спявае па-беларуску?

Хто спявае па-беларуску?

Адмысловы плэйліст “Звязды” да Дня роднай мовы.