21 верасня, панядзелак

Вы тут

Belarus IGF 2018: якім будзе Байнэт заўтра


Нацыянальны Форум па кіраванні інтэрнэтам Belarus IGF 2018 прайшоў у Мінску 3 кастрычніка. IGF — адзіная ў краіне буйная пляцоўка для дыялогу паміж дзяржавай, бізнесам, інтэрнэт-карыстальнікамі і грамадзянскай супольнасцю. Сёлета форум сабраў рэкордную колькасць удзельнікаў — больш за 500 IT-спецыялістаў, праваабаронцаў, праваахоўнікаў, прадпрымальнікаў, актывістаў, юрыстаў, студэнтаў.


“Нацыянальны форум — гэта ўдалы прыклад таго, як можна і трэба аб'ядноўваць намаганні ўсіх бакоў, зацікаўленых у развіцці інтэрнэту: як для абмену думкамі, напрацоўкамі, вопытам, так і для выпрацоўкі канкрэтных рашэнняў і рабочых ініцыятыў, — сказаў у прывітальным слове на адкрыцці форуму Дзмітрый Шэдко, першы намеснік міністра сувязі і інфарматызацыі. — Трэці год запар форум падымае вострыя грамадска значныя пытанні, на якія ўдзельнікі з ліку галіновых экспертаў і радавых інтэрнэт-карыстальнікаў разам знаходзяць адказы”.

Сёлета на форуме прайшлі 10 тэматычных сесій і пленарных дыскусій. У прыватнасці, упершыню ў парадак дня была ўключана тэма “Грамадзянская актыўнасць і інтэрнэт: ад суседскага чата да краўдфандынгавай платформы”.

Паводле слоў першага намесніка міністра, форум ужо паспеў даказаць сваю значнасць і важнасць: ён стаў той адкрытай пляцоўкай, дзе кожны жадаючы атрымлівае ўнікальную магчымасць выказацца і быць пачутым. Тут вядуць дыялог, каб не проста зразумець адзін аднаго, а знайсці рашэнні на карысць усёй інтэрнэт-супольнасці.

“І ўсё ж з упэўненасцю магу сказаць, што людзі важней за тэхналогіi. У гэтай зале сабралася каля 500 удзельнікаў: бізнесмены, грамадзянскія актывісты, даследчыкі, прадстаўнікі грамадскіх арганізацый. Усе тыя, каму не ўсё роўна, якім будзе Байнэт заўтра”, — рэзюмаваў Дзмітрый Шэдко.

Нязменным арганізатарам форуму з'яўляецца кампанія hoster.by. Як адзначыў яе генеральны дырэктар Сяргей Павалішаў, форум унікальны для Беларусі: “IGF стаў менавіта той пляцоўкай, дзе абсалютна ўсе бакі: дзяржава, бізнес, грамадзянская супольнасць, акадэмічная супольнасць атрымліваюць магчымасць цалкам на роўных удзельнічаць у дыскусіях на самыя надзённыя тэмы”. Ён падкрэсліў, што з кожным новым форумам усё больш у дыялог уключаецца дзяржава. Сёлета ў форуме прымалі ўдзел: Міністэрства сувязі і інфарматызацыі, Міністэрства антыманапольнага рэгулявання і гандлю, Нацыянальны статыстычны камітэт, Міністэрства ўнутраных спраў, Следчы камітэт і шэраг іншых дзяржаўных органаў і арганізацый. Асабліва Сяргей Павалішаў падзякаваў Аператыўна-аналітычнаму цэнтру пры Прэзідэнце Рэспублікі Беларусь за дапамогу ў арганізацыі мерапрыемства і нагадаў, што асноўнай рухаючай сілай першага нацыянальнага IGF быў менавіта ААЦ.

Гендырэктар hoster.by нагадаў, што тры гады таму першы нацыянальны форум IGF ўспрымалі як своеасаблівы эксперымент. “Мы рады, што тут сёння — прадстаўнікі дзясяткаў прафесій усіх узростаў: ад кібердэтэктываў да блогераў, ад студэнтаў да пенсіянераў. Цікавасць сапраўды ёсць, — падкрэсліў Сяргей Павалішаў. — Дзякуй кожнаму, хто ўносіў прапановы і рэкамендаваў тэмы, дапамагаў і крытыкаваў. Хто дзейнічае, а не чакае, пакуль нехта іншы вырашыць будучыню інтэрнэту за яго, каб затым абрынуцца з крытыкай. Большая частка праграмы сённяшняга форуму складаецца з падобных ініцыятыў. А значыць, беларускае грамадства гатовае да IGF”.

Аляксандра Кулікова, кіраўнік па рабоце з краінамі Усходняй Еўропы і Сярэдняй Азіі ICANN нагадала, што ў Беларусі тры гады таму пачалася рэгістрацыя ў дамене БЕЛ, а сёння ён ужо другі па папулярнасці пасля дамена РФ. Для нелацінскага дамена 15 тысяч сайтаў — выдатны паказчык. Сяргей Павалішаў таксама адзначыў, што ў Беларусі нядрэнна развіваецца інтэрнэт на нацыянальнай мове.

Ульяна Зініна, кіраўнік па сувязях з дзяржаўнымі і грамадскімі арганізацыямі Facebook падкрэсліла, што “Беларусь стала плацдармам для развіцця IT-сектра ў нашым рэгіёне”. Каля 40 беларускіх кампаній сталі глабальнымі лідэрамі ў сваёй галіне.

Намеснік кіраўніка аддзела знешніх камунікацый Каардынацыйнага цэнтра даменаў .RU / .РФ Міхаіл Анісімаў нагадаў, што ў Расіі неўзабаве адбудзецца 10-ы нацыянальны IGF, але “нам ёсць што пераняць у беларусаў”.

Даведка:

Фармат форумаў па кіраванні інтэрнэтам (Internet Governance Forum) з'явіўся ў 2006 годзе па ініцыятыве ААН. Асноўныя прынцыпы IGF — адкрытасць і прадстаўленасць ўсіх зацікаўленых бакоў для абмеркавання пытанняў, звязаных са стабільным, устойлівым і бяспечным развіццём інтэрнэт-галіны.

Ужо 12 гадоў IGF праводзяцца ва ўсім свеце на нацыянальным, рэгіянальным і глабальным узроўнях.

Belarus IGF з'яўляецца адным з найбуйнейшых форумаў у рэгіёне. Яго праца накіравана на даступнасць, бяспеку і адкрытасць інтэрнэту, фарміраванне галоснасці і ўліку ўсіх меркаванняў пры прыняцці рашэнняў і распрацоўцы законапраектаў. IGF заслужыў рэпутацыю пляцоўкі, якая дае пачатак рэальным дзеянням.

Аксана ЯНОЎСКАЯ

Выбар рэдакцыі

Культура

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

Пра калег — настаўнiкаў, старэйшых таварышаў, паплечнiкаў распавядае доктар педагагiчных навук, прафесар матэматыкi, заслужаны дзеяч навукi Рэспублiкi Беларусь.

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.

Грамадства

Як і чым жыве колішняя «памідорная сталіца» Беларусі?

Як і чым жыве колішняя «памідорная сталіца» Беларусі?

Каб адчуць, чым organіc food адрозніваецца ад звыклых для сучаснага гараджаніна прадуктаў, дастаткова пакаштаваць памідоры ў Савічах і параўнаць іх з таматамі з гіпермаркета.

Грамадства

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

На працягу многіх дзесяцігоддзяў пошта асацыіравалася з традыцыйным наборам паслуг — лістамі, пасылкамі, газетамі, пенсіямі... Але сучасныя тэхналогіі ўсё больш уваходзяць у наш побыт.