Вы тут

Знайсці працу дапаможа служба занятасці насельніцтва


На адным з прыёмаў грамадзян раённага ўзроўню бачыла неяк 30-гадовага дзецюка, якога ў кабінет да чыноўніка прыцягнула за руку маці. Яна патрабавала, каб мясцовыя ўлады далі «дзіцяці», якое не мела адукацыі і кваліфікацыі, працу з дастойным заробкам. Пры гэтым выстаўляла яшчэ і пэўныя ўмовы: каб сынок прыходзіў на работу не раней за 9 гадзін, каб працаваў зусім побач з іх домам і каб «хлопчык» не нёс матэрыяльнай адказнасці. Кажуць, жанчына і дагэтуль абівае парогі высокіх кабінетаў, бо ўсе вакансіі, якія прапанавалі сыну, яе так і не задаволілі.


Кожны работадавец, безумоўна, выбірае з прэтэндэнтаў найлепшых: тых, хто мае высокую кваліфікацыю, гатовы вучыцца і перавучвацца, хто не будзе ленавацца праехаць да работы некалькі кіламетраў. Канкурэнцыя, што існуе на рынку працы, выціскае занадта пераборлівых і тых, чыя высокая самаацэнка не супадае з прапановамі. Той, хто сапраўды хоча працаваць і зарабляць грошы, заўсёды знойдзе такую магчымасць, — упэўнены намеснік старшыні камітэта па працы, занятасці і сацыяльнай абароне Гомельскага аблвыканкама Аляксандр Семіёнаў:

— Сёння самыя запатрабаваныя на рынку працы — медработнікі, швачкі і прадстаўнікі некаторых будаўнічых спецыяльнасцяў: муляры, бетоншчыкі. У сельскай гаспадарцы па-ранейшаму не хапае механізатараў і аператараў машыннага даення, а таксама аграномаў і ветэрынараў. А вось адкрытых вакансій вартаўнікоў, вахцёраў і прыбіральшчыц няма. На іх — чарга з прэтэндэнтаў. Разам з тым, летась больш за дзве тысячы жыхароў Гомельшчыны асвойвалі прафесіі, якія запатрабаваныя на рынку працы. Дарэчы, гэта на 6 % больш, чым у 2016 годзе. Калі чалавек рэальна хоча знайсці работу, ён пры неабходнасці набудзе новую спецыяльнасць, адаптуецца і будзе працаваць.

Хойніцкі, Брагінскі і Жлобінскі раёны на Гомельшчыне афіцыйна адносяцца да тых, дзе адзначаецца самы высокі ўзровень беспрацоўя — 0,8 %. Але ж паглядзім фактычна, колькі людзей тут шукае працу. Па гэтых раёнах адпаведна: 64, 41 і 398 чалавек.

Між тым працоўныя месцы там ёсць. У Хойніцкім раёне іх 122, Брагінскім — 88, а Жлобінскім — 720. Большасць — у сферы сельскай гаспадаркі. Дарэчы, магчыма, у той момант, калі вы чытаеце гэты артыкул, лічбы ўжо змяніліся і яшчэ нехта пагадзіўся на работу, якую прапануюць службы занятасці.

Шмат новых працоўных месцаў з'явілася летась за кошт уведзеных гандлёвых аб'ектаў. Буйныя сеткі практычна ва ўсіх райцэнтрах адкрылі свае крамы, а значыць, далі работу мясцовым жыхарам. Дарэчы, толькі адзін уведзены летась у абласным цэнтры аб'ект — гэта 900 працоўных месцаў!

Каб інфармацыя пра наяўнасць працоўных месцаў з'явілася ў адкрытым доступе, за апошнія два гады было зроблена вельмі шмат. А вось да 2015 года звычайнай лічылася сітуацыя, калі кадравыя службы прадпрыемстваў і арганізацый з розных прычын «хавалі» наяўнасць вакансій не толькі ад беспрацоўных, але і ад правяраючых.

— У 2015 годзе сітуацыя на рынку працы Гомельшчыны была іншая, — успамінае Аляксандр Мікалаевіч. — На 7,5 тысячы беспрацоўных мы мелі ўсяго 3,2—4 тысячы вакансій. Такім чынам на двух беспрацоўных была толькі адна вакансія. Мы правялі шмат сустрэч з кіраўнікамі раённых выканаўчых камітэтаў, буйных, сярэдніх і невялікіх прадпрыемстваў, у тым ліку прыватных, у якіх занята не больш за пяць чалавек. Мы прасілі, каб тыя вакансіі, якія ў іх ёсць, не выкарыстоўваліся цішком. Каб яны знаходзіліся ў адкрытым доступе, у дзяржаўнай службе занятасці. Штотыднёва маніторылі сітуацыю, і яна паступова змянілася. У пачатку 2017 года мы мелі ўжо каля 6700 вакансій. А беспрацоўных стала на той час прыкладна 7000. Сёння, на 1 студзеня 2018 года, у нас сярэдні ўзровень беспрацоўя складае 0,7 %. Напружанасць на рынку працы — 0,5. Гэта азначае, што на 8700 вакансій могуць прэтэндаваць 4300 беспрацоўных. Такім чынам, сітуацыя на рынку працы летась характарызавалася значным павелічэннем колькасці вакансій і памяншэннем колькасці беспрацоўных.

Грамадскія работы, другасная занятасць, маладзёжная практыка, субсідыі на развіццё сваёй справы... Гэта таксама меры па садзейнічанні занятасці людзей, якія сёння актыўна выкарыстоўваюцца.

— Чалавеку, які шукае работу, патрэбна нейкая крыніца існавання. Для гэтага арганізуюцца часовыя работы, на якія беспрацоўны можа быць прыцягнуты на тэрмін да двух месяцаў. Значыць, ён і яго сям'я не застануцца галодныя. У нас летась на такіх работах было задзейнічана амаль 12 тысяч чалавек. На ўмовах часовай занятасці змаглі папрацаваць амаль 5,8 тысячы маладых людзей. Яны займаліся добраўпарадкаваннем тэрыторый, вырабам і рамонтам мэблі, абнаўленнем кніг у школьных бібліятэках, вырошчваннем сельгаспрадукцыі, кветак і г. д. На працоўную адаптацыю ў арганізацыі і на прадпрыемствы рэгіёна накіраваны 60 інвалідаў.

Дапамагае і пастаянная работа па прыцягненні інвестыцый, якая праводзіцца ў вобласці. Шмат прадпрыемстваў мадэрнізуецца, а значыць, ім патрабуюцца кадры. Калі ў 2016 годзе было атрымана заданне па стварэнні 3600 працоўных месцаў, то летась неабходна было стварыць 6760. (Такая ж лічба засталася і на гэты год.) У цэлым жа на свабодныя працоўныя месцы ў Гомельскай вобласці ўладкавалася больш за 30 тысяч грамадзян — менавіта праз афіцыйную службу занятасці. Пры тым, што звярнулася туды каля 43 тысяч чалавек.

Людзям, якія хочуць заняцца арганізацыяй сваёй справы, выдзяляецца субсідыя. Служба занятасці выдзеліць сродкі ў памеры ад 11 да 15 бюджэтаў пражытачнага мінімуму (прыкладна каля $1000 таму, хто хоча заняцца дробным бізнесам). Чалавек атрымлівае мінімальны капітал, арганізоўвае сваю справу, а потым і іншым стварае працоўныя месцы. Летась такую фінансавую дапамогу атрымалі 386 чалавек. Плануецца, што прыкладна столькі ж беспрацоўных жыхароў вобласці атрымаюць бясплатную фінансавую дапамогу на адкрыццё сваёй справы і сёлета.

Папулярнасцю карыстаюцца такія віды дзейнасці, як аддзелачныя работы, груза- і пасажыраперавозкі, цырульніцкія паслугі, рамонт і пашыў адзення. Сёлета з'явіліся новыя: бухгалтарскі ўлік, кансультаванне па падаткаабкладанні, вытворчасць мэблі, драўляных будаўнічых канструкцый і сталярных вырабаў, дзённы догляд за дзецьмі. Фінансавую падтрымку таксама можна атрымаць на стварэнне сялянскай (фермерскай) гаспадаркі, прыватнага ўнітарнага прадпрыемства, арганізацыю рамесніцкай дзейнасці, развіццё аграэкатурызму.

Адна з новых формаў садзейнічання занятасці насельніцтва — правядзенне прафарыентацыйных заняткаў сумесна з інспекцыяй па падатках і зборах Гомельскай вобласці. Спецыялісты інспекцыі ў тым ліку тлумачаць нормы Указа № 337 «Пра рэгуляванне дзейнасці фізічных асоб», які пашырае пералік відаў дзейнасці, дзе не трэба рэгістравацца ў якасці індывідуальнага прадпрымальніка. Акрамя таго, даюць парады па выбары аптымальнага алгарытму вядзення ўласнай справы.

Ірына АСТАШКЕВІЧ

Загаловак у газеце: Ёсць жаданне — будзе праца

Дадаць каментар

Выбар рэдакцыі

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.

Спорт

Настасся Чарняўская: Трэба, каб людзі ведалі: бадмінтон — рэальны спорт

Настасся Чарняўская: Трэба, каб людзі ведалі: бадмінтон — рэальны спорт

Якія задачы ставяцца перад камандай у 2019 годзе і што самае важнае ў бадмінтоне?

Грамадства

Які ўрок лепшы: перакулены або традыцыйны?

Які ўрок лепшы: перакулены або традыцыйны?

Як зрабіць, каб у вучняў загарэліся вочы?

Грамадства

Губернатар Гродзеншчыны - пра перспектыўныя праекты рэгіёна

Губернатар Гродзеншчыны - пра перспектыўныя праекты рэгіёна

Горад-спадарожнік, анкалагічны цэнтр, «вёскі будучыні»...