Мерапрыемства пройдзе ў аграгарадку Дукора Пухавіцкага раёна. Галоўныя героі рэспубліканскага фіналу папулярнага маладзёжнага праекта — шэсць сем'яў з розных куткоў краіны — пераможцы раённых і абласных этапаў конкурсу. Разам са сваімі дзецьмі яны паспаборнічаюць за тытул «Уладар сяла 2016» у творчых і сельскагаспадарчых конкурсах.
Напрыклад, падчас прэзентацыі «Гаспадар сяла» ўдзельнікі фіналу прадэманструюць прадметы сямейнай творчасці (вязанне, выпечка, ігра на інструментах, складанне вершаў, спевы, выкананне танцаў, гульня з дзецьмі і г.д.), а таксама свае запасы, прыгатаваныя да зімы (гародніна, нарыхтоўкі і г.д.). На пляцоўцы «Працуем» фіналісты праявяць свой спрыт у колцы і складванні дроў (конкурс «Па дровы»), сельскагаспадарчай «Вясковай эстафеце» (хуткаснае сартаванне ўраджаю, уменне абыходзіцца з вілкамі і каромыслам, валоданне малатком (жаночая палова), а таксама іголкай і ніткамі (кіраўнік сям'і), паспаборнічаюць ва ўменні запрэгчы-распрэгчы каня (конкурс «Святочны воз»).
Упершыню ў праграму ўключаны конкурс «Лепшы гаспадар». Мужчыны з майстрам-кавалём у майстэрні будуць чаканіць манеты, а іх жонкі пад кіраўніцтвам майстра-свечніка створаць эксклюзіўныя свечкі. А вось вырабіць у ганчарнай майстэрні сямейны абярэг сваімі рукамі трэба будзе разам.
Напрыканцы пераможцаў і ўдзельнікаў фіналу рэспубліканскага сямейнага сельскагаспадарчага праекта «Уладар сяла 2016» чакаюць прызы і падарункі: ганаровыя дыпломы з грашовымі прэміямі ў памеры 80 базавых велічынь кожнаму фіналісту, а таксама бытавая тэхніка і іншыя сюрпрызы .
Ідэйным натхняльнікам праекта з 2008 года выступае грамадскае аб'яднанне «Беларускі рэспубліканскі саюз моладзі». Праект атрымаў «прапіску» ва ўсіх рэгіёнах краіны.
Сяргей РАСОЛЬКА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
