Гандбольны СКА прадставіў абноўлены склад і форму на сезон

За мінулае лета ў самым тытулаваным клубе краіны адбыліся істотныя змены. Галоўнае з іх — змена трэнера: Спартак Мірановіч, які 40 гадоў вёў за сабой армейцаў, перайшоў на новую клубную пасаду, а месца рулявога заняў Ігар Папруга.

Істотна абнавіўся і асноўны склад гульцоў: у ліку навічкоў — Міхаіл Жыла, Ігар Чэрнікаў, Павел Міскевіч і Мікалай Алёхін.

Каманда правяла перадсезонныя зборы, прыняла ўдзел у турнірах ва Украіне і Польшчы, а цяпер рыхтуецца да старту новага сезона. Сёлета СКА згуляе ў чэмпіянаце і розыгрышы Кубка Беларусі, а таксама ў міжнародных турнірах — Кубку Еўрапейскай гандбольнай федэрацыі і Балтыйскай лізе.

— У нас быў насычаны падрыхтоўчы перыяд, і я задаволены, як мы яго правялі. Кіраўнікі клуба забяспечылі якасную падрыхтоўку. У каманды былі выязныя зборы, хлопцы знаходзіліся пастаянна разам, гэта важна — гуртуе калектыў. Мы працавалі па плане, згулялі два турніры, у цэлым я задаволены якасцю гульні. У некаторых момантах, вядома, яшчэ трэба папрацаваць, у нас ёсць на гэта час, таму спадзяёмся, што да адказных гульняў падыдзем баяздольным калектывам, — падзяліўся Ігар Папруга. — Што тычыцца маёй новай пасады, то ацэньваць мяне як галоўнага трэнера трэба будзе па выніку, цяпер гэта проста праца, аналіз. Я выкарыстоўваю вопыт, які назапашваў у працы са Спартаком Мірановічам і Юрыем Шаўцовым. Цяпер у мяне шмат ідэй, якія трэба ўвасобіць і апраўдаць аказаны давер.

Што тычыцца задач на сезон, то Ігар Мікалаевіч адзначыў: у першую чаргу неабходна палепшыць якасць гульні і пастарацца раскрыць кожнага гульца, каб прадстаўнікі СКА ў найлепшай форме падышлі да зборнай. Пра ўзнагароды чэмпіянату краіны і задачы выступлення ў міжнародных турнірах настаўнік палічыў за лепшае змоўчаць.

Адзначым, што дапамагаць Ігару Папругу ў гэтым сезоне будуць Аляксандр Каршакевіч і настаўнік маладзёжнай зборнай Беларусі Алег Шарэйка.

Дар'я Лабажэвіч

lobazhevich@zviazda.by