Сёння галоўная задача для ўсіх сродкаў масавай інфармацыі — развіццё кантэнту, пашырэнне прысутнасці ў інфармацыйным полі. На гэтым зрабіла акцэнт міністр інфармацыі Лілія АНАНІЧ у размове з журналістамі перад пасяджэннем калегіі. Час патрабуе ад СМІ ўмець працаваць ва ўсіх кірунках. Так, выданні, тэлеканалы павінны працаваць не толькі з газетай ці часопісам, але і са сваёй інтэрнэт-пляцоўкай — сайтам, не забываць пра аўдыторыю, якая шмат часу праводзіць у сацыяльных сетках. У наш час газета — гэта не толькі папяровая версія, а тэлеперадачу можна паглядзець не толькі па тэлевізары.
— Тэлебачанне сёння — гэта не проста трансляцыя па тэлевізары, — адзначыла Лілія Ананіч. — Планшэт, камп'ютар, спадарожнік — гэта таксама сродкі для распаўсюджвання тэлебачання. Уменне працаваць ва ўсіх асяроддзях — тая задача, якая будзе ставіцца перад СМІ ў найбліжэйшы час.
Большасць газет — самаакупныя
— 2015 год быў знакавым для сродкаў масавай інфармацыі, — падкрэсліла міністр інфармацыі, гаворачы пра вынікі працы галіны ў мінулым годзе. — Мы актыўна ўдзельнічалі ў рэалізацыі ўсіх праектаў. Выбарчая кампанія, якая праходзіла ў краіне, была інфармацыйна забяспечана на патрэбным узроўні. СМІ змаглі знайсці правільны тон — паказаць у поўным аб'ёме дасягненні краіны за 20 гадоў. Беларусы зрабілі свой усвядомлены выбар на карысць далейшага развіцця суверэннай, моцнай, сацыяльна арыентаванай дзяржавы.
Важнай тэмай летась стала і 70-годдзе Вялікай Перамогі — яна праходзіла лейтматывам газетных публікацый, тэле- і радыёсюжэтаў на працягу ўсяго года. У выніку многія праекты, прысвечаныя Вялікай Айчыннай вайне, былі ўдастоены высокіх дзяржаўных прэмій.
Што да эканамічных паказчыкаў, то, як заўважыла міністр, у цэлым у галіне стабільная эканоміка.
— Мы не маем запазычанасцяў ні па плацяжах у бюджэт, ні за энерганосьбіты, выплачваем заработную плату, — паведаміла яна. — Калі казаць пра друкаваныя сродкі масавай інфармацыі, то ў нас вельмі добрая эканоміка. Буйныя нацыянальныя газеты — самаакупныя.
Што немалаважна, не патрабуюць дзяржаўных датацый і больш за 90 рэгіянальных выданняў, якія таксама працуюць з прыбыткам.
— Але галоўнае — не толькі эканоміка, — упэўнена Лілія Ананіч. — Галоўнае — аўдыторыя і праца з чытачом. Сёння друкаваным сродкам масавай інфармацыі трэба прыкладаць больш намаганняў у кірунку канвергенцыі кантэнту. Патрэбны не проста інтэрнэт-сайты, неабходны і праца ў сацыяльных сетках, і распрацоўка мультымедыйных праграм для падпісчыкаў.
Даваць адпор спекуляцыям
— Ёсць шэраг напрамкаў, якія патрабуюць далейшага ўдасканалення, — адзначыла кіраўнік Міністэрства інфармацыі. — Мы ўсур'ёз аналізавалі рынак інфармацыі, якую мы атрымліваем звонку, — у нас больш за 200 замежных тэлеканалаў. Тут вельмі важна, каб мы пашыралі сваё інфармацыйнае поле і пры гэтым заставаліся канкурэнтаздольнымі і лідзіравалі па фарміраванні грамадскай думкі.
У мінулым годзе сацыялагічныя даследаванні паказалі, што беларусы давяраюць нацыянальным сродкам масавай інфармацыі. Больш за ўсё аудыторыі належыць пакуль тэлебачанню — 60%, 40% — інтэрнэт-СМІ, 20% — газетам.
— Інфармацыйнае поле павінна дынамічна развівацца, — лічыць Лілія Ананіч. — У нас ва ўсіх адна агульная задача. Інфармацыйная прастора павінна кансалідаваць грамадства. развіваць краіну, паказваць усё, што адбываецца ў нашай краіне. Там, дзе трэба, — аргументавана даваць адпор усім выдумкам, спекуляцыям. Упэўнена, што кадравы патэнцыял нашай галіны; тыя намаганні, якія прыкладае дзяржава ў развіцці нацыянальных сродкаў масавай інфармацыі; адказная праца калектываў дадуць плён.
Шукаць аўдыторыю па ўсіх каналах
Закранаючы праблему скарачэння накладаў друкаваных выданняў, кіраўнік міністэрства канстатавала: гэтая з'ява «сведчыць пра новыя тэндэнцыі, трэнды ў развіцці інфармацыйнага поля».
— Ва ўмовах, калі друкаваны сегмент скарачаецца, трэба шукаць дадатковую аўдыторыю, ужываючы для гэтага адпаведныя тэхналагічныя фарматы, — пераканана Лілія Ананіч.
Так, у мэтах найбольшага ахопу аўдыторыі найважнейшай задачай дзяржаўных сродкаў масавай інфармацыі застаецца развіццё мультымедыйнага складніка ў сваёй працы.
— Прыярытэтным кірункам павінна быць распаўсюджванне кантэнту па максімальна магчымых каналах — друкаваныя, мабільныя, інтэрнэт-версіі, аўдыявізуальныя рэсурсы. І вельмі важна прасоўваць дзяржаўную інфармацыю ў інтэрнэце.
СМІ павінны быць даступнымі
— Ад якасці працы сферы СМІ ў многім залежаць думкі жыхароў нашай краіны пра дзяржаву ў цэлым, таму гэтая праца вельмі адказная, — у сваю чаргу заўважыла Наталля КАЧАНАВА, намеснік прэм'ер-міністра нашай краіны, якая прысутнічала на калегіі.
На яе думку, вельмі важна, каб СМІ даносілі аб'ектыўную і праўдзівую інфармацыю да жыхароў нашай дзяржавы.
— Інфармацыя, якая транслюецца ў СМІ, павінна быць дакладнай і аб'ектыўнай, — упэўнена Наталля Качанава. — Калі інфармацыя вырываецца з кантэксту, пераварочваецца і падаецца па-іншаму, вядома, гэта выклікае рэакцыю людзей. Навошта абмяркоўваць скажоныя факты? Гэтага проста не павінна быць.
Віцэ-прэм'ер пагадзілася, што сёння рэгіянальныя СМІ маюць папулярнасць сярод насельніцтва.
— Людзі любяць і свае газеты, і сваё мясцовае радыё, і тэлебачанне. Але, несумненна, тыя падзеі, што адбываюцца ў краіне, павінны знаходзіць сваё адлюстраванне і ў рэгіянальных сродках масавай інфармацыі.
СМІ нашай краіны, упэўнена Наталля Качанава, трэба памятаць і пра тую сваю аўдыторыю, што мае абмежаваныя магчымасці.
— Вы ведаеце, што Прэзідэнт падпісаў Канвенцыю аб правах інвалідаў. Мы павінны з вамі не забываць пра гэту катэгорыю людзей. Я ў апошні час вельмі шмат сустракалася з прадстаўнікамі грамадскіх арганізацый, у канцы года мы праводзілі калегію па правах інвалідаў, на якой прысутнічалі прадстаўнікі ўсіх міністэрстваў і ведамстваў. Гэтыя людзі сёння павінны мець магчымасць глядзець тэлебачанне, слухаць радыё, чытаць газеты. Мы павінны актыўна працаваць, каб яны маглі задаволіць свае інфармацыйныя патрэбы. У нас ёсць тэлеканал «Жэст», але там у большай ступені ідуць фільмы. Сёння нашы тэлеканалы неабходна насычаць жэставай інфармацыяй.
* * *
Міністр інфармацыі ўзнагародзіла журналістаў і работнікаў выдавецтваў. Ганаровым знакам «Выдатнік друку Беларусі» была ўзнагароджана Юлія Дашкевіч, загадчыца аддзела арганізацыйна-кадравай працы Выдавецкага дома «Звязда». Віншуем калегу!
Фота Яўгена ПЯСЕЦКАГА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
