Няўмольна надыходзяць халады, дык ці не самы час зараз сагрэцца гарачым пуншам? Пунш — змяшаны алкагольны напой. Родам ён з Паўднёвай Азіі і распаўсюдзіўся ў Еўропе з пачатку ХVІІ стагоддзя дзякуючы англічанам і галандцам. Назва паходзіць ад санскрыцкага слова «панч» (англ. рunсh), — «пяць», бо ў састаў пуншу пачаткова ўваходзіла 5 абавязковых кампанентаў: паўднёваазіяцкі арак, пра які мы ніжэй пагаворым, цукар, спецыі, цытрына (або іншыя цытрусавыя) і віно (радзей вада). Гарачы пунш падаюць нагрэтым да 65°С. Напой гатуюць у зачыненым посудзе (можна ў эмаляваным рондлі, але традыцыйна — у адмысловай вазе з вечкам), награваючы яго прыкладна да 70°С. Пры больш высокай тэмпературы губляюцца смакавыя якасці віна і выпарваецца прыкметная частка спірту. Падаюць пунш гарачым (радзей астуджаным) у керамічных кілішках або ў шклянках для гарбаты.
Ідэя спалучаць пунш з чаем, мабыць, зарадзілася ўжо ў Еўропе, дзе і тое, і другое асацыявалася з Усходам, а значыць, аўтаматычна пасавала адно аднаму. Да таго ж моду на пунш задавалі Англія і Галандыя, адкуль распаўсюджвалася і мода на чай, прычым прыкладна ў адзін і той жа час. Ды і цёмны колер араку, які застаецца ад трысняговай меласы, даволі блізкі да чайнага.
Спачатку пунш далівалі ў чай як араматычны дадатак, а затым і сам пунш часта сталі гатаваць, дадаючы чай, можна нават сказаць, з дамінуючым чайным смакам. Рэцэптура стала досыць вольнай, далёкай ад арыгінала. Напрыклад, арак сталі замяняць спачатку больш даступным ромам, а потым, часта, і любым моцным алкаголем, які трапляўся пад руку. Акрамя цытрыны і іншых цытрусавых, сталі выкарыстоўваць іншую садавіну і фруктовыя сокі. Frее stуlе. Пунш з яго дарагімі кампанентамі быў напоем прынцыпова не даступным для абсалютнай большасці. Славуты англійскі мастак Уільям Хогарт пакінуў нашчадкам сатырычны сюжэт, які не надта падыходзіць да снобаў — аматараў пуншу. Гэтую яго гравюру часта перамалёўвалі ў розных краінах, часам не вельмі блізка да арыгінала, у тым ліку і на дне парцалянавых ваз для пуншу.
Самы дарагі кампанент традыцыйнага пуншу — гэта арак. У нас ён з'явіўся ў сярэдзіне ХVІІІ стагоддзя дзякуючы імпарту з галандскай Батавіі (цяпер сталіца Інданезіі Джакарта) і індыйскага Гоа, якія не абміналі галоўны порт Рэчы Паспалітай — Гданьск. Адтуль і распаўсюдзілася, досыць хутка, мода на пунш. Арак з Батавіі і арак з Гоа (значна больш рэдкі і да нашага часу практычна «вымер») — розныя напоі. Батаўскі робіцца з меласы цукровага трыснягу (як і ром), а ферментацыя адбываецца дзякуючы дражджам з дададзенымі ў яго сухарамі з чырвонага рысу. А індыйскі і цэйлонскі арак — з какосавага соку. І той, і гэты арак потым пераганяюць. Слова «арак», зрэшты, вядомае практычна па ўсёй Азіі: на Блізкім Усходзе так называюць моцны дыстыляваны напой з вінаграду, араматызаваны анісам. У Іраку яго робяць з соку фінікаў, а ў цюркскіх народаў арак — гэта дыстыляваны кумыс. Але для традыцыйнага пуншу ўжываецца толькі паўднёваазіяцкі арак (з Індыі, Інданезіі або Цэйлона).
Аж да пачатку ХХ стагоддзя арак лічыўся адным з напояў, які павінен быў абавязкова прысутнічаць у «аптэчцы прыёмнай» кожнага прыстойнага шляхецкага дома — у адмысловай, замкнёнай на ключ шафцы, папярэдніцы сучасных бараў. У ёй таксама трымалі спецыі, цукеркі і іншыя далікатэсы. Акрамя пуншу, арак выкарыстоўваўся як кампанент для соусаў да мяса і птушкі, для насычэння выпечкі (у першую чаргу, дражджавых «баб»), дадаваўся ў каву і гарбату. Піла яго шляхта і ў чыстым выглядзе, але часцей разбаўлены фруктовымі сокамі. Увогуле, ужывалі яго больш ці менш як ром, да якога ён даволі блізкі і зыходным саставам і смакам.
Кухмістр Верашчака.
Пунш «палаючы»
Складнікі: 1 -1,5 кг фруктовага марозіва, 750 мл белага віна, 200 мл араку (або рому).
Спосаб прыгатавання: разліць па кубках або кілішках віно на 1/3 вышыні. Выкласці на паверхню 2-3 лыжачкі марозіва. Заліць аракам і падпаліць. Можна перад падпалам дэкараваць таксама скрылькамі фруктаў, лісцем мяты, кроплямі канфіцюру і гэтак далей.
Чытайце яшчэ:
Марцін святы - згубіцель гагаты
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.