Найбольш імкліва прырастае рак прастаты, скуры, нырак
Ва ўсіх краінах свету (і Беларусь не выключэнне) частата новаўтварэнняў штогод узрастае. З чым гэта звязана? Вучоныя пакуль не маюць дакладнага адказу. За апошнія дзесяць гадоў захваральнасць на рак вырасла ў краіне прыкладна на 35% (дзесьці па 3,3 працэнта за год). На ўліку ў анкалагічных установах знаходзяцца каля 250 тысяч тых, каму пасля лячэння прызначаецца працяглае назіранне ўрача. Дарэчы, такое назіранне павінна быць пажыццёвым — з-за высокай рызыкі рэцыдыву і ўзнікнення пухлін у іншых органах.
— У сучаснай анкалогіі развіваюцца і хірургічнае, і прамянёвае, і хіміятэрапеўтычнае лячэнне, — кажа галоўны навуковы супрацоўнік аддзела арганізацыі супрацьракавай барацьбы Рэспубліканскага навукова-практычнага цэнтра анкалогіі і медыцынскай радыялогіі імя М.М. Аляксандрава Аляксей АКЕАНАЎ. — Значна палепшылася за апошнія гады і матэрыяльна-тэхнічная база анкалагічных устаноў. Нягледзячы на шматлікія дасягненні медыцыны, 25% хворых на рак гінуць на працягу года. А гінуць таму, што злаякаснае новаўтварэнне было выяўлена на позніх стадыях. Устаноўлена, што пры 1-й стадыі онказахворвання 5-гадовая выжывальнасць дасягае 95%, пры 2-й — 70-ці, 3-й — 40-50-ці, 4-й — 10-15-ці. Ва ўсім свеце вялікая ўвага надаецца скрынінгу раку і яго ранняму выяўленню.
У Беларусі скрынінг праводзіцца ў дачыненні да раку шыйкі маткі, малочнай залозы, прастаты і прамой кішкі. Сусветная арганізацыя аховы здароўя лічыць, што скрынінг (абследаванне людзей, якія не маюць ніякіх скаргаў на сваё здароўе) варта праводзіць пры трох умовах — калі лакалізацыю можна выявіць простым і недарагім метадам; калі пасля ёсць магчымасць пралячыць усіх, каго выявілі; калі можна атрымаць эфект ад гэтага лячэння. На сёння такі падыход магчымы для пералічаных вышэй лакалізацый. У дачыненні да іншых відаў раку сітуацыя даследуецца. Што да флюараграфічнага метаду абследавання лёгкіх, то яго можна залічыць у шэраг метадаў выяўлення раку хіба ўскосна. Тут размова ідзе пра выяўленне, галоўным чынам, туберкулёзу.
Рак шыйкі маткі. Абумоўлены вірусам папіломы чалавека, які перадаецца палавым шляхам. «Фактычна кожная жанчына з пачаткам палавога жыцця інфіцыруецца вірусам папіломы чалавека, аднак у 90% выпадкаў гэта інфекцыя выводзіцца з арганізма самастойна, дзякуючы добрай рабоце імунітэту, — тлумачыць загадчыца аддзела онкамамалогіі з онкагінекалагічнай групай РНПЦ анкалогіі Яўгенія ШАПАВАЛ. — У астатніх жа выпадках вірус пранікае ў клетку і дае пачатак анкалагічнаму захворванню. У нашай краіне створаны ўсе ўмовы для таго, каб любы чалавек мог звярнуцца ў медустанову і прайсці неабходныя абследаванні. У краіне рэгіструецца штогод каля 7,5 тысячы выпадкаў рэпрадуктыўнага раку (цела маткі, шыйкі маткі, яечнікаў, малочнай залозы). Плюс 1200 выпадкаў раку «нулявой стадыі». Таму нельга пазбягаць штогадовых прафілактычных аглядаў, здачы мазкоў з цэрвікальнага канала».
Вядома шмат тыпаў ВПЧ, але толькі некаторыя з іх адносяцца да «злаякасных». Мяркуецца, што ў цэлым сістэма гінекалагічных аглядаў дазваляе выяўляць анкалагічную паталогію шыйкі маткі на ранніх этапах і не дапускаць развіцця раку. Сёння спецыялісты занепакоены ростам распаўсюджанасці раку шыйкі маткі ў сельскай мясцовасці. А наогул у групе рызыкі па гэтым відзе раку — жанчыны ад 25 да 40.
Рак малочнай залозы. Штогод прыкладна 4 тысячам жанчын выстаўляецца такі дыягназ. Гэты від раку займае першае месца ў жаночай онкапаталогіі. «Калі мы кажам пра раннюю дыягностыку, то гэта азначае выяўленне пухліны на 1-2-й стадыях, пакуль яна мінімальнага памеру, — удакладняе ўрач кансультатыўна-поліклінічнага аддзялення РНПЦ анкалогіі Ларыса КУР'ЯН. — Тут шмат увагі надавалася пытанням самаабследавання і прафілактычных аглядаў гінеколагаў, тэрапеўтаў, хірургаў, а таксама правядзенню ультрагукавога абследавання малочнай залозы. Аднак для скрынінгу ў гэтым выпадку падыходзіць правядзенне мамаграфічнага даследавання. У агульнай папуляцыі яго можна праводзіць пасля 50 гадоў. Такі падыход, па звестках замежных даследчыкаў, лічыцца эфектыўным, паколькі зніжае смяротнасць ад раку малочнай залозы на 30%. Наогул мамаграфія дазваляе выявіць і дабраякасныя ўтварэнні, і рак «нулявой стадыі», калі патрабуецца мінімальнае — толькі хірургічнае — лячэнне».
Зараз такі від скрынінгу праводзіцца ў рамках пілотнага праекта.
Рак прастаты. Скрынінг, па сутнасці, выйшаў за рамкі пілотнага праекта і ахапіў усё мужчынскае насельніцтва ва ўзросце пасля 55 гадоў. Метад даследавання — аналіз крыві на прастатспецыфічны антыген.
Рак прамой кішкі. Гэты від скрынінгу яшчэ не распаўсюджаны на ўсю краіну. Ажыццяўляецца ў дачыненні да 55-65 гадовых. Метад даследавання — гематэст (выяўленне схаванай крыві ў кале).
Святлана БАРЫСЕНКА
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».