Павялічаны грашовыя нормы расходаў на харчаванне ў навучальных установах

Пра гэта стала вядома з пастановы Савета Міністраў № 905 ад 11 кастрычніка 2013 года.

«Дакументам прадугледжана павелічэнне грашовых нормаў расходаў на харчаванне на 16% ва ўстановах дашкольнай, агульнай сярэдняй, спецыяльнай адукацыі, а таксама ў інтэрнатах устаноў агульнай сярэдняй, прафесійна-тэхнічнай адукацыі, Беларускай дзяржаўнай харэаграфічнай гімназіі-каледжы, аздараўленчых лагерах дзённага знаходжання», — паведамляюць у прэс-службе Саўміна.
На 8% павялічаны грашовыя нормы расходаў на харчаванне ў аздараўленчых лагерах кругласутачнага знаходжання, адукацыйна-аздараўленчых цэнтрах, аздараўленчых лагерах кругласутачнага знаходжання абаронна-спартыўнага профілю, працы і адпачынку. Як адзначылі ў прэс-службе, пастанова распрацавана ў сувязі з ростам індэкса спажывецкіх цэн і ў мэтах недапушчэння пагаршэння арганізацыі харчавання вучняў, забеспячэння рацыянальнага і збалансаванага харчавання, адпаведнага фізіялагічным патрэбам дзяцей.
Акрамя таго, 11 кастрычніка 2013 года Савет Міністраў прыняў пастанову № 904. Яна прадугледжвае павелічэнне на 16% грашовых нормаў расходаў на дзяцей-сірот і дзяцей, якія засталіся без апекі бацькоў, знаходзяцца ў дзіцячых інтэрнатных установах, і штомесячных выплат на такіх дзяцей, якія знаходзяцца на сямейных формах уладкавання.

Уладзіслаў КУЛЕЦКІ