Дэлегацыі Бранскай і Арлоўскай абласцей Расійскай Федэрацыі прынялі ўдзел у святочных мерапрыемствах Гомельшчыны з нагоды Дня яднання народаў Беларусі і Расіі.
Госці Гомеля ўшанавалі памяць загінулых герояў Вялікай Айчыннай вайны на мемарыяле «Вечны агонь».
— Гэтае свята не патрабуе тлумачэння, яно вырасла на нашай гісторыі. Сёння мы ўмацоўваем гаспадарчыя сувязі і культурныя традыцыі, мы разам моцна стаім на нагах, незалежна ад абмежаванняў і санкцый. Так і будзе далей, — падзяліўся ў размове з журналістамі губернатар Арлоўскай вобласці Андрэй Клычкоў.
Аб тым, як актыўна развіваецца супрацоўніцтва паміж беларускімі і расійскімі рэгіёнамі нагадаў губернатар Бранскай вобласці Аляксандр Багамаз.
— Мы ўзаемадзейнічаем па ўсіх напрамках: гэта і прамысловасць, і будаўніцтва, і сельская гаспадарка. У апошнія гады ўсё больш актыўна ўзаемадзейнічае наш бізнес: на форумах, буйных эканамічных сустрэчах. І ўсё ж аснова — гэта нашы дзеці. Важна, што праводзім для іх спартыўныя і культурныя мерапрыемствы, яны спаборнічаюць у хакеі, футболе, валейболе. Сябруюць і развіваюць брацтва, — зазначыў кіраўнік расійскага рэгіёна.
— Мы адзіны народ, у нас агульныя карані, мы прайшлі ліхалецце вайны, мы выхаваны на адной ідэалогіі, — звярнуўся да ўдзельнікаў святочнага мерапрыемства з нагоды Дня яднання народаў Беларусі і Расіі старшыня Гомельскага аблвыканкама Іван Крупко. — У святле таго, як змяняецца геапалітычная сітуацыя, мы павінны захаваць падмурак для развіцця Саюзнай дзяржавы — нашы карані, духоўнасць і маральнасць.
Як звярнуў увагу Іван Крупко, двухбаковае супрацоўніцтва паміж Гомельскай вобласцю і расійскімі рэгіёнамі сёння падмацавана 37 дагаворамі, рэалізуюцца 89 пагадненняў. На тэрыторыі Гомельшчыны зарэгістравана 450 прадпрыемстваў з расійскім капіталам.
— Наша вобласць актыўна ўключана ў інтэграцыйную дзейнасць. Узаемная эканамічная выгада неаддзельная ад гуманітарнага складніка, які задае маральны камертон адносінам. Тысячы нітак звязваюць беларускія і расійскія прадпрыемствы. Яшчэ больш трывалыя — брацкія сувязі жыхароў нашых краін, — падкрэсліў Іван Крупко.
Для ўрачыстага сходу з нагоды Дня яднання народаў Беларусі і Расіі ў Гомелі падрыхтавалі канцэртную праграму ад беларускіх і расійскіх калектываў. Гледачы ўбачылі відэазвароты з віншаваннямі ад кіраўнікоў розных рэгіёнаў.
Наталля КАПРЫЛЕНКА
Фота ТК «Гомельшчына афіцыйна»
Летась зафіксавана зніжэнне колькасці выпадкаў гібелі на вытворчасці.
Карэспандэнты «Звязды» пабачылі, як праходзяць рэпетыцыі.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.