Аўтаномныя пажарныя апавяшчальнікі паступова становяцца дэвайсам, запатрабаваным у жылым фондзе. Устанавіць гэтыя ўстройствы, якія дазваляюць своечасова выявіць узгаранне і не праспаць уласнае жыццё, імкнуцца не толькі жыхары прыватных домаўладанняў, а і гаспадары гарадскіх кватэр. Людзі ведаюць: спраўляцца з надзвычайнай сітуацыяй лепш на раннім этапе, чым потым ліквідоўваць яе наступствы. А яны могуць быць самыя сумныя.
Пажараў, якія забіраюць чалавечыя жыцці, у Міністэрстве па надзвычайных сітуацыях рэгіструюць нямала. Няспраўнасці пячнога ацяплення, раптоўны выхад са строю электрычных прыбораў або электраправодкі, курэнне дома, дзіцячае свавольства з агнём — усё гэта прыводзіць да гібелі людзей, калі крыніца ўзгарання своечасова не выяўлена. Унікальнае ўстройства — аўтаномны пажарны апавяшчальнік — інфармуе аб тым, што побач бяда, а значыць, дае чалавеку другі шанц на жыццё.
І такіх прыкладаў нямала.
Невядома, чым мог бы скончыцца пажар у адным са шматпавярховікаў Барысава два гады таму, калі б не спрацаваў аўтаномны пажарны апавяшчальнік. Дзякуючы гэтаму ўстройству выратаваліся дзесяць жыхароў, сярод якіх — шасцёра дзяцей. Калі на другім паверсе трохпавярховага жылога дома пачалося ўзгаранне, усе яго жыхары спалі. Моцнае задымленне прывяло да спрацоўкі аўтаномнага пажарнага апавяшчальніка. Ад гуку прыбора прачнуліся гаспадар адной з кватэр і яго дзіця. Убачыўшы задымленне на другім паверсе, яны пабудзілі жыхароў астатніх кватэр. Да прыбыцця ратавальнікаў усе самастойна выйшлі з дома на вуліцу.
Днямі аўтаномны пажарны апавяшчальнік выратаваў жыццё пенсіянеркі ў Шчучыне. Было каля гадзіны ночы, калі ўсхваляваны гараджанін паведаміў ратавальнікам аб тым, што пачуў гук аўтаномнага пажарнага апавяшчальніка. Ён выйшаў на лесвічную пляцоўку і выявіў, што гарыць суседская кватэра, дзе, па яго меркаванні, магла знаходзіцца пажылая гаспадыня. Чатыры пажарныя каманды неадкладна накіраваліся да месца выкліку. Праз дзве хвіліны першае аддзяленне МНС прыбыло па ўказаным адрасе і выратавала гаспадыню кватэры, дзе пачаўся пажар. Як пазней расказала жанчына, яна ўключыла прас і забылася пра яго. Уначы пенсіянерка адчула пах гары, адчыніла дзверы ў кватэру, каб выветрыць, а сама вярнулася ўнутр — шукаць крыніцу дыму.
Тым часам 32-гадовы сусед, пачуўшы, што апавяшчальнік спрацаваў, паведаміў пра здарэнне ў МНС, увайшоў у задымленую кватэру праз адчыненыя дзверы. У адным з пакояў ён выявіў дэзарыентаваную ў прасторы 91-гадовую гаспадыню і тлеючую драўляную падлогу пад уключаным у электрасетку прасам. Мужчына вывеў пенсіянерку на чыстае паветра, затым вярнуўся ў кватэру, адключыў прас і заліў узгаранне вядром вады. Да гэтага моманту прыбылі супрацоўнікі МНС. Ратавальнікі праветрылі кватэру пенсіянеркі і ўпэўніліся ў немагчымасці аднаўлення гарэння. Медыцынская дапамога пацярпелай не спатрэбілася.
Дзякуючы своечасовай спрацоўцы аўтаномных пажарных апавяшчальнікаў, летась у Гродзенскай вобласці былі выратаваны восем чалавек, пяцёра з якіх — дзеці. І ўжо сёлета гэты прыбор працягвае ратаваць жыцці. Не выключэннем з’яўляюцца іншыя рэгіёны краіны. У вёсцы Уза Гомельскай вобласці на пажары выратаваліся маці і двое дзяцей. Як высветлілася, у момант пажару ў хаце знаходзіліся 38-гадовая гаспадыня і двое яе дзяцей — 10-гадовая дачка і аднагадовы сын. Жанчына пачула гук спрацаванага пажарнага апавяшчальніка ў гаражы, прыбудаваным да хаты. Выйшаўшы на вуліцу, яна ўбачыла, што дах дома гарыць, і пабегла ўнутр, каб вывесці дзяцей. 41-гадовы муж жанчыны ў гэты час быў на рабоце. Калі пажарныя прыбылі на месца здарэння, дах дома быў ахоплены полымем. У выніку пажару ён быў знішчаны, як і аўтамабіль, які знаходзіўся ў гаражы. Таксама быў пашкоджаны дах цаглянай адрыны. На шчасце, людзі засталіся жывымі — і ўсё дзякуючы невялічкаму ўстройству, якое жыхары дома ўстанавілі не толькі ў кожным жылым пакоі дома, а і ў гаражы. Як у ваду глядзелі.
Такіх гісторый са шчаслівым канцом становіцца ўсё больш. Аднак, на жаль, на пажарах працягваюць гінуць людзі, у тым ліку дзеці. Ратавальнікі рэгулярна наведваюць домаўладанні, абследуюць жылы сектар на прадмет наяўнасці аўтаномных пажарных апавяшчальнікаў і рэкамендуюць устанавіць іх тым, у каго пакуль што няма.
— Аўтаномны пажарны апавяшчальнік адчувальны нават да нязначнага задымлення ў памяшканні, што спрыяе хуткаму выяўленню ўзгарання на ранняй стадыі яго развіцця, — адзначае афіцыйны прадстаўнік Мінскага абласнога ўпраўлення МНС Анастасія Швайбовіч. — Пры з’яўленні дыму ён падае магутны гукавы сігнал, які здольны апавясціць і нават абудзіць чалавека, які спіць. Завецца прыбор аўтаномным, паколькі яго канструкцыя выканана такім чынам, што для работы яму не патрабуецца падключэнне да электрычнага ланцуга і далучэнне да пульта кіравання. Усярэдзіне пластыкавага корпуса размешчана крыніца харчавання — батарэйка тыпу «Крона» і кампаненты, неабходныя для выяўлення пажару і непасрэднага абвяшчэння аб ім.
Устаноўка апавяшчальніка не патрабуе спецыяльных ведаў і навыкаў. З гэтым можа справіцца кожны дарослы чалавек. У камплекце да яго прыкладаецца падрабязная інструкцыя, якая ўтрымлівае ўсю неабходную інфармацыю аб мантажы, прыладзе і правілах эксплуатацыі. Прыбор зусім не псуе інтэр’ера, яго крапежная пляцоўка замацоўваецца на столі пры дапамозе шруб, а ўжо ў яе ўстанаўліваецца сам аўтаномны пажарны апавяшчальнік — паварочваннем па гадзіннікавай стрэлцы да ўпора. Для дэмантажу дастаткова павярнуць прыладу супраць гадзіннікавай стрэлкі.
Па словах Анастасіі Швайбовіч, аўтаномны пажарны апавяшчальнік рэкамендуецца ўстанаўліваць у цэнтральнай частцы столі з невялікім зрушэннем у бок акна або дзвярэй — там, дзе забяспечаны пастаянны паветраабмен. «Размешчаны на корпусе апавяшчальніка сігнал святлодыёда чырвонага колеру, які мігціць, сведчыць аб яго спраўнасці і знаходжанні ў дзяжурным рэжыме працы. Пры выяўленні задымлення прыбор падае перарывісты гукавы сігнал з пастаянным свячэннем святлодыёда чырвонага колеру. Для спынення падачы гукавога сігналу апавяшчальніка трэба ліквідаваць крыніцу задымлення і праветрыць памяшканне».
Ратавальнікі рэкамендуюць не радзей чым раз на месяц чысціць пажарны апавяшчальнік ад пылу і правяраць яго працаздольнасць шляхам націску на тэставую кнопку. Супрацоўнікі МНС як ніхто ведаюць: аўтаномны пажарны апавяшчальнік стане добрым падарункам у кожнай сям’і. Наяўнасць у доме ці кватэры гэтага невялікага ўстройства павышае магчымасць раней даведацца аб пажары, прыняць адпаведныя меры і пазбегнуць трагічных наступстваў.
Вераніка КАНЮТА
Фота прэс-службы Міністэрства па надзвычайных сітуацыях
Летась зафіксавана зніжэнне колькасці выпадкаў гібелі на вытворчасці.
Карэспандэнты «Звязды» пабачылі, як праходзяць рэпетыцыі.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
