Аўтару «Стойкага алавянага салдаціка» прысвячаецца

Аўтара сусветна вядомых казак «Прынцэса на гарошыне», «Брыдкае качаня», «Дзікія лебедзі», «Два браты» і іншых твораў Ханса Крысціяна Андэрсена (1805 — 1875) ведаюць, здаецца, дзеці ўсёй планеты Зямля. Хаця, дарэчы, сам пісьменнік даволі часта абураўся, калі яго называлі дзіцячым пісьменнікам. Існуе каля дзесяці кніжных выданняў дацкага пісьменніка на беларускай мове. 

Толькі што ў Выдавецкім доме «Звязда» пабачыла свет кніга пра самога дацкага пісьменніка — «Великий сказочник» Таццяны Маісеевай. Аўтар расказвае пра дзяцінства славутага казачніка, пра тое, як фарміраваўся яго талент, якімі былі першыя крокі ў літаратуры. Невялікі памерамі біяграфічны нарыс складаецца з кароткіх раздзелаў: «На казачным востраве горад цудоўны», «Рэальнасць і фантазіі», «Адна з любімых мясцін», «Вядомым зрабіцца — вучыцца трэба», «Ад афіш, тэатра і гісторый — да творчасці»..." Як і ён сам, персанажы яго гісторый і бессмяротныя, і бясстрашныя...Сядзіць на камяні бронзавая Русалачка, гераіня знакамітай яго казкі — сімвал Капенгагена. Маракі з усяго свету дораць ёй кветкі; гавораць, што яна прыносіць шчасце..." — так завяршае Таццяна Маісеева аповяд і пра свайго любімага пісьменніка. 

Кніга «Великий сказочник» выйшла накладам 1 000 экзэмпляраў. Ілюстрацыі аформіў мастак Алег Грубін. Між іншым, ілюстрацыі даволі красамоўныя, гаваркія, дапамагаюць уявіць атмасферу, якая суправаджала класіка сусветнай літаратуры на ўсіх этапах яго жыцця. 

Таццяна Маісеева — член Саюза пісьменнікаў Беларусі, член Саюза пісьменнікаў Расіі. Друкуецца ў часопісе «Родная прырода», з’яўляецца аўтарам папулярнага маскоўскага выдання «Юный натуралист». У сааўтарстве з Андрэем Матвеенка выдала кнігі для дзяцей: «Знакомые незнакомцы. Рассказы о природе», «Спасибо, Марта! Животные рядом с нами», «Лесов таинственная сень...Сказки и были для детей и взрослых», «Услышать листика шуршанье... Рассказы о природе». 

Новую кнігу Таццяны Маісеевай «Великий сказочник» можна набыць непасрэдна ў Выдавецкім дломе «Звязда» па адрасе: Мінск, вул. Захарава, 19 альбо — у кнігарнях ААТ «Белкніга» па ўсёй краіне ці кнігарні «Акадэмкніга» у Мінску па адрасе: праспект Незалежнасці, 72.