У Цэнтры падрыхтоўкі касманаўтаў у падмаскоўным Зорным гарадку ўчора было людна. Тут сабраліся моладзь, старэйшыя людзі і нават дзеці. Нагода самая што ні на ёсць урачыстая: на касмадром Байканур праводзілі асноўны і дубліруючы экіпажы 21-й экспедыцыі наведвання Міжнароднай касмічнай станцыі. Сярод іх — і нашы суайчынніцы Марына Васілеўская і Анастасія Лянкова, да якіх таксама прыехалі самыя блізкія і родныя людзі. Слёз развітання не было. Толькі радасць і гордасць за дзяўчат, якім выпаў гонар прадстаўляць нашу краіну ў бязмежнай касмічнай прасторы. Да якога, дарэчы кажучы, першаму касманаўту ў гісторыі суверэннай Беларусі застаўся літаральна адзін крок — двухтыднёвая перадстартавая падрыхтоўка. Карэспандэнты БелТА сталі сведкамі гэтага кранальнага моманту і гатовы расказаць, што адчувалі сваякі беларусак, праводзячы дачок на Байканур.
«Кіраўніцтва пажадала нам штатнай работы. Было прыемна, што вельмі шмат людзей сабраліся на ўрачысты сняданак перад адпраўленнем на Байканур. Мы выказалі ўсім словы падзякі за праведзеную падрыхтоўку і такія душэўныя праводзіны», — расказаў журналістам камандзір асноўнага экіпажа, касманаўт «Раскосмасу» Алег Навіцкі.
«Кіраўніцтва Цэнтра падрыхтоўкі касманаўтаў пажадала нам удачы, поспехаў, каб асноўны экіпаж вылецеў па плане. У сваю чаргу мы гатовы да палёту і выканаем усё на 100 працэнтаў, нават лепш. З такім экіпажам — толькі ў космас», — падтрымала камандзіра Марына Васілеўская.
Алег Навіцкі таксама адзначыў, што ў кампаніі Марыны Васілеўскай і астранаўта НАСА адчувае сябе надзейна. «Экіпаж вельмі надзейны і вельмі прыгожы», — дадаў ён. Напярэдадні Міжнароднага жаночага дня Алег Навіцкі пажадаў цудоўнай палове чалавецтва такога ж настрою, як і ў дзяўчат экіпажа ЭП-21.
Астранаўт НАСА Трэйсі Дайсан пры гэтым адзначыла, што вельмі ганарыцца тым, што прайшла падрыхтоўку ў ЦПК імя Ю. А. Гагарына і стала часткай экіпажа. «Тут арганізавана цудоўная падрыхтоўка касманаўтаў і астранаўтаў. Я рада, што прадстаўляю НАСА ў гэтай місіі», — сказала астранаўт.
У журналістаў была магчымасць паразмаўляць з роднымі і блізкімі Марыны Васілеўскай і Анастасіі Лянковай. Бацька Марыны Віталь Васілеўскі расказаў, што дачка яшчэ падчас работы бортправадніцай марыла пераадолець вышыню 10 тысяч метраў.
Бацька Марыны Васілеўскай таксама расказаў, ці лёгка было адпусціць дачку ў космас: «Яна гэтага захацела, значыць, трэба адпусціць. У яе была мара — узляцець вышэй за неба яшчэ падчас работы бортправадніцай "Белавія". І вось яна дасягнула сваёй мэты». Па словах Віталя Васілеўскага, дачка да апошняга не казала яму аб тым, што плануе стаць удзельніцай касмічнага палёту. «Калі даведаліся, то хваляваліся, перажывалі. А зараз толькі радасць», — сказаў на заканчэнне бацька Марыны Васілеўскай.
Анастасія Лянкова ўваходзіць у склад дубліруючага экіпажа разам з камандзірам, касманаўтам «Раскосмасу» Іванам Вагнерам і астранаўтам НАСА Дональдам Петытам. Разам з тым Анастасія запэўнівае: пры неабходнасці дубліруючы экіпаж гатовы падмяніць асноўны. Пра космас дзяўчына і зусім марыла з дзяцінства і маленькімі, але ўпэўненымі крокамі рухалася да мары.
«Калі я даведалася, што дачка можа паляцець у космас, то адчула хваляванне. Але ўсяго, чаго дачка хацела дабіцца, яна дабівалася сама — так бы мовіць, маленькімі крокамі. І для маці гэта вялікае шчасце — бачыць, як дзіця набліжаецца да сваёй мэты. Мне гэта вельмі радасна. Яна з дзяцінства марыла аб космасе, купляла часопісы па гэтай тэме», — сказала маці Анастасіі Наталля Лянкова.
Яна дадала, што рэгулярна стэлефаноўвалася з дачкой, цікавілася, як праходзіць яе падрыхтоўка. «У якасці талісмана я перадала дачцэ цацку-Нязнайку, якую яна ўзяла на Байканур», — адзначыла Наталля Лянкова.
На касмадроме экіпажы чакае перадстартавая двухтыднёвая падрыхтоўка. А далей – толькі космас. Да без усякіх перабольшанняў знакавага і гістарычнага моманту для нашай краіны засталося зусім няшмат.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.