Натхніцца асобай і космасам

У сучасным свеце культура і мастацтва павінны быць асновай міру і супрацоўніцтва паміж народамі. У гэтым перакананы стваральнікі міжнароднага выставачнага праекта «Сто ўсмешак Гагарына: усмешка для Міру». Ён нацэлены дапамагчы шырокай аўдыторыі зразумець, ці магчыма «заслужыць права на подзвіг» і абудзіць у людзях «талент дабрыні». Напярэдадні старту экспазіцыі арганізатары распавялі, што чакае наведвальнікаў і якімі ідэямі прырастае творчая ініцыятыва ў працэсе падрыхтоўкі.

Выстаўка — вынік супрацоўніцтва Нацыянальнага цэнтра сучасных мастацтваў Рэспублікі Беларусь і ФДБУК «Аб’яднаны музей-запаведнік Ю. А. Гагарына» (Расія). Яна прымеркавана да 90-годдзя Юрыя Гагарына, запланаванага палёту ў космас першай беларускі Марыны Васілеўскай, а таксама да Дня яднання народаў Беларусі і Расіі і Дня касманаўтыкі.

— Адкрываем выстаўку «Сто ўсмешак Гагарына: усмешка для Міру» мы 29 лютага. Гэта ўжо трэці наш сумесны праект, створаны разам з мемарыяльным музеем Юрыя Гагарына. І магу сказаць, што супрацоўніцтва, распачатае некалькі гадоў таму, дасць вялікі вынік, таму што ў гэтым праекце нам хочацца не проста паказаць экспанаты, не проста прадставіць новыя творы мастацтва, а стварыць прастору для міратворчага праекта з удзелам Беларусі і Расіі, — адзначыў дырэктар Нацыянальнага цэнтра сучасных мастацтваў Рэспублікі Беларусь Сяргей Крыштаповіч. — Мінск ужо шмат гадоў з’яўляецца пляцоўкай для ўрэгулявання палітычных канфліктаў. А мы прыйшлі да меркавання, што варта падключыць да такіх працэсаў культуру, якая з’яўляецца самым магутным фактарам уплыву на свядомасць чалавека, на яго настрой і погляды... Сёння свет рухаецца, на вялікі жаль, не ў тым напрамку, у якім павінен рухацца. Бо чалавецтва з’явілася для таго, каб ствараць, паляпшаць жыццё на планеце. І сваім праектам мы, як некалі зрабіў тое сваёй місіяй Юрый Гагарын, таксама хочам агульнымі намаганнямі даць імпульс міру, надзеі і перамозе над неканструктыўнымі палітычнымі працэсамі.

Выстаўка «Сто ўсмешак Гагарына: усмешка для Міру» аб’яднае ў сабе як экспанаты з музея-запаведніка Юрыя Аляксеевіча Гагарына, так і творчы ўклад у праект міжнароднай супольнасці. Справа ў тым, што ў працэсе работы над будучай экспазіцыяй творчыя ідэі стваральнікаў выстаўкі падтрымала Міністэрства замежных спраў нашай краіны, і ў выніку да яе далучыліся 36 краін, прадстаўнікі якіх скарысталіся магчымасцю творчага самавыяўлення, даслаўшы фотаздымкі і малюнкі па прапанаванай тэме. Адкрыецца выстаўка сінхронна ў Мінску і ў родным горадзе першага касманаўта — Гагарыне. Там з нагоды шэрагу святочных дат запланаваны цікавыя мерапрыемствы.

— Сёлета мы адзначаем 90-годдзе Юрыя Аляксеевіча Гагарына. І ў яго дзень нараджэння 9 сакавіка ў нашым музеі традыцыйна пройдуць 51-я грамадска-навуковыя чытанні, прысвечаныя памяці першага касманаўта. У рабоце самых розных секцый прымаюць удзел і моладзь, і вучоныя, і канструктары, і касманаўты. Сёлета мы чакаем зноў прыезд вялікай дэлегацыі з Беларусі. Маладыя людзі са Слуцка, Чэрвеня, Смалявіч выступаюць у нас у секцыі «Касманаўтыка і моладзь», — распавядае куратар міжнародных выставачных праектаў ФДБУК «Аб’яднаны мемарыяльны музей-запаведнік Ю. А. Гагарына» Наталля Гагарына. — Што датычыцца сумеснага праекта «Сто ўсмешак Гагарына...», то ў нашым музеі на пастаяннай аснове дзейнічае аднайменная фотаэкспазіцыя. І менавіта лічбавыя яе копіі мы перадалі Цэнтру сучасных мастацтваў, дапоўніўшы гэта некаторымі прадметамі з нашых фондаў, рэчамі з сямейнага архіва Юрыя Аляксеевіча. Са стартам у Мінску выставачнага праекта «Сто ўсмешак Гагарына: усмешка для Міру» ў нас адкрыюцца выстаўкі «Гагарын — першы назаўсёды» і «Якая прыгожая наша планета» з такой жа тэматыкай. Але хачу сказаць, што асобу Юрыя Гагарына нельга асацыіраваць толькі з яго ўсмешкай. Ён — той чалавек, які ў ходзе доўгага адбору атрымаў права на подзвіг, прычым даводзіў гэта на працягу ўсяго свайго жыцця... Мабыць, у яго быў талент аб’ядноўваць людзей розных краін, розных кантынентаў і нацыянальнасцяў.

Аб ролі міжнароднай супольнасці ў выставачным праекце распавёў намеснік начальніка галоўнага інфармацыйна-аналітычнага ўпраўлення — начальнік упраўлення інфармацыі і лічбавай дыпламатыі, прэс-сакратар Міністэрства замежных спраў Рэспублікі Беларусь Анатоль Глаз:

— Для Міністэрства замежных спраў і нашых калег за мяжой, бо асноўная праца легла на іх плечы, вялікі гонар далучыцца да гэтага праекта. Мы абсалютна падзяляем думку, што культура — фактар уплыву. І перакананы, што ўплыў гэты павінен быць пазітыўны. Культура павінна выхоўваць і вучыць дабру, бо дрэннаму ў наш час лёгка навучыцца. Праект «Сто ўсмешак Гагарына: усмешка для Міру» вельмі правільны ў дадзеным кантэксце. Таму што міралюбнасць — у генетыцы беларусаў і людзей постсавецкай прасторы. І яна чырвонай ніткай праходзіць у дзейнасці нашага міністэрства, што не толькі сёння, але і раней скептычна ўспрымалася некаторымі нашымі партнёрамі. Яны спрабавалі наша міралюбства тлумачыць як слабасць. Аднак мы заўсёды будзем прытрымлівацца мірнай, міратворчай палітыкі, бо гэта адпавядае нашаму бачанню свету.

Алена ДРАПКО