НАН прадставіць у фінале конкурсу «100 ідэй для Беларусі» 20 праектаў

Экспертным саветам, у склад якога ўвайшлі члены бюро Прэзідыума Нацыянальнай акадэміі навук Беларусі і кіраўнікі навуковых арганізацый НАН, адабраны для ўдзелу ў фінале рэспубліканскага маладзёжнага праекта «100 ідэй для Беларусі» 20 лепшых інавацыйных распрацовак маладых вучоных НАН. Усяго на суд строгага журы было прадстаўлена 48 праектаў, паведамляе БелТА са спасылкай на прэс-службу Акадэміі навук.

У фінале конкурсу будуць прадстаўлены праекты маладых вучоных у розных сферах: інфармацыйныя тэхналогіі, атамная энергетыка, аграрны сектар, прамысловыя і будаўнічыя тэхналогіі; інавацыйныя медыцынскія, біялагічныя і хімічныя тэхналогіі, ахова навакольнага асяроддзя, захаванне гісторыка-культурнай спадчыны і інш. Усе распрацоўкі маюць перспектыву ўкаранення ў рэальны сектар эканомікі краіны.

У Нацыянальнай акадэміі навук Беларусі адбыўся адборачны тур моладзевага праекта «100 ідэй для Беларусі». Падчас мерапрыемства была прадстаўлена выстава навукова-тэхнічных распрацовак маладых вучоных НАН Беларусі, з якімі падрабязна азнаёміліся намеснік прэм’ер-міністра Пётр Пархомчык, мтаршыня Прэзідыума НАН Уладзімір Гусакоў, другі сакратар ЦК БРСМ Аляксандр Прохараў, кіраўнікі арганізацый НАН Беларусі, акадэмікі-сакратары аддзяленняў і вядучыя вучоныя Акадэміі навук, а таксама ўдзельнікі рэспубліканскай канферэнцыі навучэнцаў «Першы крок у навуку».

Згодна з Палажэннем аб правядзенні Рэспубліканскага маладзёжнага праекта «100 ідэй для Беларусі», зацверджаным Пастановай Бюро ЦК ГА «БРСМ» ад 9 кастрычніка 2023 года № 16, Нацыянальная акадэмія навук Беларусі праводзіць свой конкурсны адбор і арганізоўвае навучанне ўдзельнікаў праекта для чацвёртага (заключнага) этапу.

Рэспубліканскі маладзёжны праект «100 ідэй для Беларусі» праводзіцца з мэтай прыцягнення моладзі да вырашэння задач сацыяльна-эканамічнага развіцця краіны, шырокага прадстаўлення вынікаў навукова-даследчай дзейнасці маладых вучоных. Фінал конкурсу запланаваны на сакавік бягучага года.