Традыцыйна на Вадохрышча для ахвотных акунуцца ў палонку будуць арганізаваны спецыяльныя месцы, дзе зрабіць гэта можна бяспечна. У сталіцы ўсе яны будуць размешчаны на ратавальных станцыях вадасховішчаў, абсталяваны цёплымі распранальнямі і выязным гандлем, там будуць дзяжурыць ратавальнікі і супрацоўнікі міліцыі. Як правільна падысці да гэтага абраду, каб не нашкодзіць сабе, расказалі медыкі і ратавальнікі.
У Мінску для аматараў вадохрышчанскіх купанняў будзе арганізавана тры пляцоўкі на ратавальных станцыях Дразды, Камсамольская, Цнянская. Побач будуць усталяваны ўцепленыя распранальні і пункты выязнога гандлю з перакусам і напоямі. Усіх ахвотных тут чакаюць з 18:00 гадзін 18 студзеня да 00 гадзін 19 студзеня.
Ва ўсіх рэгіёнах краінах таксама будуць арганізаваны адпаведныя месцы з купелямі.
— Месцы для акунання абсталёўваюцца ўдалечыні ад скіду сцёкавых вод і іншых крыніц забруджвання. Дно мусіць быць пакатым, ачышчаным ад расліннасці, без смецця і рэзкіх перападаў глыбіні, яна не павінна перавышаць 1,8 метра, — расказаў начальнік аддзела вадалазнай падрыхтоўкі Цэнтра вадалазна-ратавальнай службы Рэспубліканскага атрада спецыяльнага прызначэння «ЗУБР» МНС Андрэй Войцік.
Паблізу купелі абсталёўваецца ратавальны пост, а побач дзяжурыць нарад міліцыі. Палонка агароджваецца леернай або металічнай агароджай. У цёмны час сутак купель і месца падыходу падсвечваецца. Усходы або трап павінны быць металічнымі ці драўлянымі, а поручні апрацаваны грубым матэрыялам або аборкай. Таўшчыня лёду ў месцах абсталявання купелі павінна быць не меншай за 15 см. Калі па кліматычных умовах такое немагчыма, то сыход у купель абсталёўваецца з берага.
— Акунацца рэкамендуецца толькі ў спецыяльна абсталяваных месцах з дзяжурствам ратавальнікаў. Перад купаннем у палонцы неабходна разагрэць цела, зрабіць якія-небудзь інтэнсіўныя практыкаванні. Да палонкі неабходна падыходзіць у няслізкім абутку. Акунацца лепш за ўсё па шыю, не замачыўшы галаву. Ныранне з галавой забараняецца, бо гэта можа прывесці да звужэння сасудаў галаўнога мозгу. Неабходна ўлічваць, што пры апусканні ў халодную ваду, як правіла, пачашчаецца дыханне. Пры ўваходзе неабходна адразу старацца дасягнуць патрабаванай глыбіні і не рэкамендуецца плаваць. У халоднай вадзе не варта знаходзіцца больш за хвіліну. Пасля выхаду рэкамендуецца разагрэць цела, расцерці ручніком, апрануць сухое адзенне. Для ўмацавання імунітэту і выключэння пераахаладжэння рэкамендуецца выпіць гарбату — травяную ці ягадную, — парэкамендаваў Андрэй Войцік.
Забараняецца акунацца ў стане алкагольнага ап’янення, ныраць і плаваць, падаваць ілжывыя сігналы трывогі, засмечваць водныя аб’екты, збірацца групамі каля краю палонкі, заходзіць за агароджу, купацца з дзецьмі. Акунаць дзяцей неабходна пад наглядам дарослых.
— Дома трэба падрыхтавацца: прыгатаваць тэрмас з гарачым чаем. Апрануцца па надвор’і, каб не дапускаць пераахаладжэння. Перад акунаннем пажадана нічога не піць, таму што пры паніжэнні тэмпературы арганізм імкнецца пазбавіцца ад лішняй вадкасці. Важна ў гэты дзень сябе добра адчуваць. Пасля акунання неабходна мець запасны камплект сухой бялізны, — дадаў галоўны вадалазны спецыяліст аддзела рэспубліканскай вадалазна-ратавальнай службы РДГА «АСВОД» Аляксандр Галіцкі.
Аднак зімовае купанне ў палонцы паказана не ўсім. Супрацьпаказаннямі з’яўляюцца вострыя захворванні і цяжкія хранічныя ці іх абвастрэнне. Не варта акунацца дзецям да 7 гадоў і састарэлым ва ўзросце старэй за 70–75 гадоў. Таксама забаронена купанне цяжарным жанчынам.
— Калі мы вырашым акунуцца, маючы хранічныя захворванні, гэта можа прывесці да іх абвастрэння. Таму з асцярожнасцю варта гэта рабіць людзям з артэрыяльнай гіпертэнзіяй, тым, хто перанёс у мінулым інфаркт міякарда і вострыя парушэнні мазгавога кровазвароту. Пры наяўнасці неўралагічных захворванняў, у прыватнасці эпілепсіі, з сутаргавымі прыступамі акунацца нельга, бо халодная вада можа справакаваць прыступ. І ў цэлым, калі ёсць нейкія хранічныя захворванні, але цягне акунуцца ў палонку, рэкамендуецца звярнуцца да свайго доктара і ў індывідуальным парадку атрымаць кансультацыю, ці можна гэта ажыццявіць і як падрыхтавацца, — параіў урач хуткай медыцынскай дапамогі загадчык падстанцыі № 11 УАЗ «Гарадская станцыя хуткай медыцынскай дапамогі» Яўген Юдакоў.
Алена КРАВЕЦ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.