Рэспубліканская выстаўка студэнцкіх творчых работ «У колеры падарожжа — уражанні і ўяўленні» дэманструецца ў мастацкай галерэі «Універсітэт культуры» апошнія дні. Гэты праект праводзіцца ў рамках Рэспубліканскага фестывалю творчасці замежных студэнтаў устаноў вышэйшай адукацыі «F.—ART.bу» і культурна-асветніцкай акцыі «Грані творчасці». Арганізатары — міністэрствы адукацыі і культуры, Нацыянальны цэнтр мастацкай творчасці дзяцей і моладзі, Беларускі дзяржаўны ўніверсітэт культуры і мастацтваў, а таксама галерэя «Універсітэт культуры».
Экспазіцыя «У колеры падарожжа — уражанні і ўяўленнi» была адкрыта яшчэ ў канцы 2023-га і прымеркавана да Года міру і стваральнай працы. Арганізатары падкрэсліваюць, што для ўдзелу было накіравана больш за 150 аўтарскіх работ замежных і беларускіх студэнтаў 14 устаноў вышэйшай адукацыі ў такіх відах выяўленчага мастацтва, як жывапіс, графіка, дэкаратыўна-прыкладная творчасць. Усе работы так ці інакш адлюстроўвалі ўражанні аўтараў аб прыродзе, культуры, нацыянальных традыцыях Беларусі. Ухіл — на архітэктуру і памятныя мясціны, паэзію і музыку... Так, толькі найлепшыя работы сфарміравалі адмысловую экспазіцыю.
Мэты і задачы рэспубліканскай выстаўкі высакародныя: удасканаленне работы ўстаноў вышэйшай адукацыі па полікультурнай адукацыі, інтэнсіфікацыя крос-культурнага ўзаемадзеяння і арганізацыя камунікацыі замежных і беларускіх студэнтаў, укараненне інавацыйных і эфектыўных форм арганізацыі міжнацыянальных зносін, падтрымка сацыякультурных ініцыятыў, стварэнне аптымальных умоў для рэалізацыі творчага патэнцыялу моладзі. Гэтая і падобныя ініцыятывы робяць свой унёсак у справу паразумення, сяброўства і супрацоўніцтва маладых мастакоў розных краін. Ды і арганізатары ўпэўнены: культура, мастацтва, творчасць здольны аб’яднаць.
— Праз культуру сапраўды прыходзіць узаемаразуменне. І з дапамогай такога супрацоўніцтва мы можам праводзіць дыялог міру і стварэння сярод нашай моладзі. Гэта вельмі добра. 30 лістапада прайшла выдатная гала-праграма замежных студэнтаў, якія прадстаўлялі сваю творчасць на сцэне, а сёння мы сталі сведкамі свята візуальнага мастацтва. Тут выяўлены ўяўленні, пачуцці і перажыванні беларускіх і замежных студэнтаў. Усе яны з’яўляюцца патрыётамі сваіх краін, а таксама патрыётамі Беларусі, дзе вучацца. Тут мы насамрэч адчуваем: нас аб’ядноўвае агульная планета і задачы па захаванні міру і ўзаемаразумення для таго, каб усім людзям на гэтай планеце жылося добра і цікава, — выказалася падчас адкрыцця выстаўкі дырэктар Нацыянальнага цэнтра мастацкай творчасці дзяцей і моладзі Надзея Васільчанка.
Выказваючы падзяку ўдзельнікам і арганізатарам, яна асобна адзначыла намаганні вышэйшых навучальных устаноў Мінска і Універсітэта культуры, які прапанаваў пляцоўку для экспазіцыі і прыняў удзел у праекце.
— Работы студэнтаў Беларускага дзяржаўнага ўніверсітэта культуры і мастацтваў аб’ядноўваюць творы навучэнцаў іншых устаноў, дэманструючы адзіны сэнс выстаўкі — дружбу розных краін. Гэта выдатна, што столькі студэнтаў захоплены творчасцю, — рэзюмавала Надзея Васільчанка.
Вядома, што сёлета экспазіцыю плануюць паказаць на розных выставачных пляцоўках краіны. Так, навучэнцы з розных ВНУ змогуць пазнаёміцца з творчасцю іншых студэнтаў, паразважаць пра іх навыкі і ўменні,
а таксама ацаніць сябе ды іншых.
Ёсць гіпотэза, што дзяцей лепей адчуваюць іншыя дзеці, маладых дакладней разумеюць маладыя, ну і далей па спісе... Ці тычыцца гэта ацэнкі мастацкай работы, творчых памкненняў яе аўтара? У пэўнай ступені так, і гісторыя мастацтва, напрыклад, мінулага стагоддзя ведае безліч прыкладаў, калі непрынятыя суровымі крытыкамі і строгімі мастацтвазнаўцамі старэйшага пакалення, прыхільнікамі традыцый маладыя жывапісцы ці скульптары мянялі ход па-дзей, уплывалі на думкі людзей розных пакаленняў. То-бок, сучаснасць прымала іх, і гэта ўплывала на прамежкавы вынік — на ўвагу, папулярнасць, поспех. А далей ужо толькі час мог рассудзіць.
Гэтыя развагі для таго, каб нагадаць аб цярпімасці і паблажлівасці да тых, хто толькі адкрывае ў сабе мастака. Ад знаўцаў, настаўнікаў і такіх жа пачаткоўцаў ім неабходны хаця б крупінкі зацікаўленасці, добрае слова. І якраз тут не дзіва апынуцца на раздарожжы. Падтрымаць аўтара слабай работы або зрабіць заўвагу, даць падказку, што можа выклікаць нечаканую рэакцыю і нежаданне маладога мастака працягваць працаваць над сабой... Звярнуць увагу на кідкае, яркае, нетыповае і з-за гэтай акалічнасці прайсці міма чагосьці насамрэч вартага ўвагі, не падштурхнуць таленавітага аўтара да адкрыццяў... Сумненні, праз якія праходзяць многія, вядуць да розных высноў.
Не абысціся без іх і падчас знаёмства з выстаўкай «У колеры падарожжа — уражанні і ўяўленнi». Сумненні ў тым, ці на правільным шляху той ці іншы мастак, ці адпавядаюць многія задумы вынікам, ці дастаткова свабоды даецца студэнтам у іх творчых пошуках. Натуральна, ёсць і даволі пасрэдныя работы, і займальныя экспанаты. Меней разнастайным паўстае жывапіс, болей цікавымі здаюцца творы дэкаратыўна-прыкладнога мастацтва, графікі, а таксама фатаграфія. На канкрэтных кампазіцыях і аўтарах гэтым разам засяроджвацца не хацелася б, аднак ёсць намер вылучыць некаторых выкладчыкаў, пад кіраўніцтвам якіх працуюць студэнты з Беларусі і замежжа, — Тамару Васюк, Наталлю Лінькову, Наталлю Бедзюх, Наталлю Зубрыцкую. Іх намаганні недарэмныя.
Ва ўсякім разе каштоўна паназіраць за тым, якой замежная моладзь бачыць нашу краіну, што цікавіць і хвалюе пачаткоўцаў, на што, між іншым, скіроўваюць сёння іх увагу (куды ж без гэтага). Хочацца пажадаць аўтарам толькі ўсяго новага — ведаў, адкрыццяў і, вядома, падарожжаў. Беларусь у сваёй прыгажосці і загадкавасці гатовая адкрываць таямніцы.
Яўгенія ШЫЦЬКА
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
