Качанава павіншавала выхаванцаў сацыяльна-педагагічнага цэнтра ў Мінску

18 гадаванцаў сацыяльна-педагагічнага цэнтра з прытулкам Ленінскага раёна Мінска атрымалі падарункі з рук Старшыні Савета Рэспублікі Наталлі Качанавай у рамках дабрачынай акцыі «Нашы дзеці».

Выхаванцы СПЦ вучацца ў сярэдняй школе № 40, гуляюць у тэніс, займаюцца дзюдо, робяць шмат падзелак на занятках у творчых аб’яднаннях «Цветафорык» і «Чароўны пэндзаль». Сустракалі гасцей яны сапраўдным прадстаўленнем: вершамі, танцамі, карагодамі. Завіталі ў госці да дзяцей не толькі Дзед Мароз са Снягуркай, але і сімвал надыходзячага года — Дракон, а скончыліся відовішчы гарбатай з прысмакамі.

У кожнага з дзяцей, якія тут знаходзяцца, няпросты лёс, і вельмі хацелася б, каб іх мары, а яны ў асноўным мараць пра сваю сям’ю, маму, тату, спраўджваліся. Вельмі важна, што ў нашай краіне шмат людзей, якія робяць усё не толькі для таго, каб працаваць у такіх цэнтрах, але і забіраць гэтых дзетак, выхоўваць іх, даваць адукацыю і цеплыню сваёй душы, заўважыла Наталля Качанава:

— Мы вельмі ўдзячныя нашым суайчыннікам, якія дапамагаюць нашым дзеткам у гэтым жыцці, і заўжды шчыра рады бываць у такіх установах, віншаваць іх. Калі прыходзіш у такія цэнтры, бачыш, што тут ёсць усё для таго, каб дзеці ні ў чым не мелі патрэбы.

Ва ўстанове выхоўваюцца дзеці, якіх забралі з праблемных сем’яў, расказала дырэктар сацыяльна-педагагічнага цэнтра (СПЦ) з прытулкам Ленінскага раёна Мінска Аксана Говен:

— Каб дзіця не знаходзілася ў сям’і, куды прыйшла бяда, яго змяшчаюць да нас, дзе пануе атмасфера дзяцінства і радасці, а іх бацькі тым часам (з нашай дапамогай і ўдзелам суб’ектаў прафілактыкі) пераадольваюць праблемы, якія існуюць у сям’і. Дзеці чакалі навагодняга цуду і свята, вучылі вершы, песні, рыхтавалі падарункі блізкім і гасцям, пісалі лісты Дзеду Марозу. Яны, як і ўсе звычайныя малыя, замаўлялі яму цацкі, моднае адзенне, сучасныя гаджэты.

З Саветам Рэспублікі ў СПЦ склаліся добрыя стасункі, і яго Старшыня сёлета ўжо трэці раз наведала гадаванцаў цэнтра, каб павіншаваць малых з надыходзячым святам.

— Калі Наталля Іванаўна прыехала да нас упершыню, дзеці настолькі былі рады сустрэчы, што вельмі доўга не адпускалі яе. І тады Наталля Іванаўна запрасіла малых на экскурсію ў Савет Рэспублікі, і слова сваё стрымала, — успамінае дырэктар. — Мы разам з дзецьмі наведалі Савет Рэспублікі, і гэта сустрэча пакінула ў нашых выхаванцаў уражанні на доўгі час.

— Добрая традыцыя віншаваць дзяцей з Новым годам дапамагае стаць добрымі сябрамі. Мы прыходзім да вас не першы год і хочам, каб вы заўжды памяталі: вы нам патрэбныя, мы вельмі вас любім. Займайцеся спортам, творчасцю, заўжды шукайце добрых сяброў, — пажадала Наталля Качанава і ўручыла цэнтру сертыфікат на набыццё камп’ютарнай тэхнікі.

У адказ дзеці падарылі Наталлі Качанавай ёлачную цацку шар, што таксама стала традыцыяй — у Савеце Рэспублікі гэта ўжо не першае ўпрыгажэнне ад выхаванцаў СПЦ, а таксама карціну, намаляваную дзеткамі. А Старшыня паабяцала, што яшчэ абавязкова сустрэнецца з малымі.

Пасля канцэртнай праграмы і карагодаў дзеці разам з госцяй пілі гарбату з прысмакамі, паказвалі майстар-класы па роспісе імбірных пернікаў і расказвалі пра сваё жыццё і жаданні. Мяркуючы па размовах, тут падрастаюць і будучыя тэлевізіёншчыкі, і навукоўцы, і ратавальнікі. Прычым развагі ў малых часта зусім не дзіцячыя... Дзеткі вельмі кантактныя, і яны па-асабліваму цэняць дабрыню і тое, што яны маюць у дадзены момант, падкрэсліла Наталля Качанава:

— Ім давялося пабачыць тое, з чым не хацелася б, каб сутыкаліся нашы дзеці. Гэта цяжка, калі дзіця забіраюць з сям’і, каб абараніць. І важна, што дзяржава робіць усё, каб дзеці адчувалі сябе паўнавартаснымі грамадзянамі і разумелі, што яны патрэбны нам, нашай краіне.

Ірына СІДАРОК
Фота аўтара