Пераважная большасць дарослых расіян (97 працэнтаў) памятае імя свайго першага настаўніка, паказала апытанне SuperJob. Толькі тры працэнты апытаных забыліся, як звалі іх педагога ў першым класе.
Жанчыны памятаюць імя першага настаўніка часцей за мужчын (98 працэнтаў супраць 96 працэнтаў), а рэспандэнты з больш высокім даходам — часцей за тых, хто атрымлівае менш.
Цікава, што на вынікі даследавання практычна не ўплываў узрост апытаных: сярод рэспандэнтаў ва ўзросце да 34 гадоў імя першага настаўніка забыўся адзін працэнт, у групе ад 35 да 44 гадоў — тры працэнты, у групе старэйшых за 45 гадоў — два працэнты.
Ва Узбекістане з’явілася дадатковая стыпендыя для студэнтаў, якія валодаюць замежнай мовай на высокім узроўні, паведамляе прэс-служба міністэрства аховы здароўя рэспублікі.
Выплата пачала дзейнічаць ужо з 2023/2024 навучальнага года. Заахвочваюць ёю студэнтаў медыцынскіх ВНУ і тэхнікумаў, якія маюць міжнародна прызнаны сертыфікат па англійскай, нямецкай або французскай мове з вынікам, не ніжэйшым за ўзровень С1. Выплачваюць стыпендыю ў памеры трох базавых разліковых велічынь штомесяц у дадатак да звычайных выплат на працягу ўсяго тэрміну дзеяння сертыфіката.
Для назначэння стыпендыі рэктары ВНУ і тэхнікумаў павінны штоквартальна падаваць спісы ў Дэпартамент навукі і адукацыі міністэрства. Як удакладнілі ў яго прэс-службе, цяпер у дзевяці медыцынскіх ВНУ краіны навучаецца 56 студэнтаў з высокім веданнем замежных моў.
Лідар партыі «Новыя людзі» Аляксей Нячаеў звярнуўся да кіраўніка Расспажыўнагляду Ганны Паповай з прапановай уключыць мёд у меню школьных сталовых. На думку аўтара ініцыятывы, гэта «павысіць імунітэт школьнікаў і знізіць агульную стамляльнасць», паведамляе ТАСС.
Дэпутат нагадаў, што ў некаторых расійскіх рэгіёнах мёд ужо ўключаны ў рацыён школьнікаў. У той жа час у метадычных рэкамендацыях Расспажыўнагляду мёд паказаны толькі як харчовы прадукт, які можа быць выкарыстаны для фарміравання конкурснай дакументацыі для арганізацыі харчавання навучэнцаў.
«Адсутнасць мёду ў рэкамендаваным прыкладным меню, а таксама ў неабходных сярэднясутачных наборах харчовых прадуктаў для навучэнцаў цягне да сітуацыі, калі большасць школ у Расіі не ўключаюць яго ў рацыён харчавання школьнікаў. Уключэнне мёду ў іх харчаванне здольнае прыкметна ўмацаваць здароўе. Замест цукру дастаткова дзесяці яго грамаў у дзень».
Да таго ж, на думку дэпутата, рэалізацыя гэтай ініцыятывы падтрымае малы і сярэдні бізнес, які займаецца вытворчасцю мёду, а прыярытэтнымі яго пастаўшчыкамі ў школы краіны могуць стаць лакальныя малыя гаспадаркі і фермеры.
У Карфагенскі каледж, размешчаны ў Кеношы, амерыканскі штат Вісконсін, сёлета паступілі прадстаўніцы трох пакаленняў адной сям’і. У навучальнай установе ўпершыню ў гісторыі ВНУ будуць адначасова атрымліваць адукацыю бабуля, маці і дзве дачкі. Пра гэта паведамляе CNN.
Сёстры Саманта Мальчэўскі і Мія Картэр нават будуць жыць у адным пакоі ў інтэрнаце. Першая атрымлівае спецыяльнасць медсястры, а другая будзе вывучаць бухгалтарскі ўлік. Іх маці, Эмі Мальчэўскі, больш за 20 гадоў працуе на кампусе Карфагенскага каледжа, яна выкладае графічны дызайн і займаецца кар’ерным кансультаваннем студэнтаў, а дочкі бывалі ў яе на працы з самага дзяцінства. У гэтым годзе Эмі вырашыла працягнуць сваю адукацыю і паступіла ў магістратуру каледжа. Калі Эмі прыняла гэтае рашэнне, яна прапанавала пайсці павучыцца і сваёй маме і бабулі дзяўчынак, Крысці Шван. Тая, нядоўга думаючы, пагадзілася. Бабуля Саманты і Міі выбрала кірунак «Бізнес-дызайн і інавацыі».
Па словах віцэ-прэзідэнта прыёмнай камісіі каледжа Эшлі Хэнсан, ёй сустракаліся сем’і, у якіх усе дзеці вучыліся ў іх. Таксама даволі часта ў Карфаген ідуць вучыцца дзеці і ўнукі выпускнікоў. Сёлета сярод тых, хто паступіў, іх каля 70 чалавек. Аднак каб бабуля, маці і ўнучкі-дачкі вучыліся адначасова... «Я, спадзяюся, паступленне Крысці Шван паслужыць прыкладам для многіх і доказам таго, што вучыцца можна на працягу ўсяго жыцця. Я, можа, сама пайду абараняць доктарскую, калі мне будзе 80 гадоў», — сказала віцэ-прэзідэнт прыёмнай камісіі.
Сяргей СТАРЫНАЎ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.