Тры матчы — тры перамогі беларускіх гандбалістаў

Нацыянальная мужчынская зборная па гандболе зноў сабралася разам. На гэты раз для ўдзелу ў Суперсерыі са зборнай Расіі. Тры таварыскіх матчы прайшлі ў трох розных гарадах і прынеслі беларусам тры перамогі. 

Першы матч прайшоў у Магілёве 1 лістапада. З самага пачатку падапечныя Юрыя Шаўцова захапілі лідараства і не аддалі яго да канца. Вынік сустрэчы — 32:28. Лепшым у беларускай камандзе быў прызнаны Арцём Каралёк, які закінуў 6 галоў у вароты суперніка. Другі раз каманды сустрэліся 3 лістапада ўжо ў Гомелі. Гэта была надзвычай непрадказальная гульня. У другой палове сустрэчы расіяне зраўнялі лічбы на табло — 17:17. Але беларускія гандбалісты змаглі вырвацца наперад і перамаглі з мінімальнай перавагай — 27:26. Трэці матч адбыўся 5 лістапада ў сталічным палацу спорта «Уручча». І ў трэці раз гаспадары бескампрамісна захапілі лідарства і не аддавалі яго да канца матчу. Вынік сустрэчы — 25:23. Лепшым гульцом у складзе беларускай каманды прызнаны Мікіта Вайлупаў, які 9 раз паразіў вароты сапернікаў. 

«Нашы хлопцы праявілі сябе з лепшага боку і гэта заслужаная перамога. Мне падаецца, расійскай камандзе не хапіла ўпэўненасці ў сабе і яны не даціснулі там, дзе трэба было даціскаць. Хлопцам нашым было цяжка, яны малайцы, выстаялі і падарылі яркую, прыгожую гульню», — адзначыў першы намеснік кіраўніка Адміністрацыі Прэзідэнта Максім Рыжанкоў, які назіраў за матчам у Мінску. Ён таксама звярнуў увагу, што на матчы ў Мінску сабраліся поўныя трыбыны. «Гэта сведчыць аб тым, што спорт у нашай краіне любяць, шануюць і хочуць яго глядзець. Нашы людзі нават хварэлі за расіян, калі была вялікая розніца, крычалі „забівай“. У гэтым і ёсць прыгажосць гульні», — падкрэсліў Максім Рыжанкоў. 

Галоўны трэнер нацыянальнай зборнай Юрый Шаўцоў расказаў, што ўсё задуманае на Суперсерыю спраўдзілася. «Мы хацелі прадставіць сваю зборную, а для гэтага нам патрэбны былі гульні, якіх нам не хапае. Выдатная арганізацыя ў Магілёве, выдатная арганізацыя ў Гомелі, у Мінску сабраліся поўныя трыбуны. Усё задуманае ўдалося. Я як трэнер убачыў шмат добрага, я ўбачыў гульцоў, якія выраслі за гэты час, пакуль мы не гулялі, якія прэтэндуюць на месца ў зборнай. А працаваць заўжды ёсць над чым. У зборнай цудоўная атмасфера. Я вельмі рады, што прыехалі ўсе хлопцы. Усе ігракі з задавальненнем едуць у зборную. У нас выдатны мікраклімат, ёсць вядучыя гульцы, якія яго падтрымліваюць і мне як трэнеру прыемна з імі працаваць», — сказаў ён. Наступны раз мужчынская зборная сустрэнецца з расійскімі сапернікамі ў студзені на турніры ў Расіі. Але галоўнае надзея — на хуткае вяртанне на міжнародныя старты. 

Застаўся задаволены вынікамі Суперсерыі і старшыня Беларускай федэрацыі гандбола Уладзімір Канаплёў. «Наша каманда згуляла самааддана, расіяне нашы традыцыйныя сапернікі. Гэта толькі ў назве таварыскія гульні. Яны праходзілі дастаткова напружана, як на чэмпіянатах Еўропы і свету, калі мы сустракаліся паміж сабой. Гэта былі сапраўды прынцыповыя сустрэчы. Невялікі разрыў у ліку ва ўсіх гульнях паказвае, што нашы каманды раўнасільныя. Але гэта не значыць, што калі мы тры гульні выйгралі, то расійская зборная мацнейшая за нашу. Не, яны зараз і па рэйтынгу вышэйшыя і ў расіян не прыехалі шэраг моцных гульцоў. Што тычыцца нашай зборнай, Юры Шаўцоў і Дзмітрый Нікуленкаў малайцы. З нападзеннем у нас заўсёды нядрэнна было, яны папрацавалі добра на абарону. Я думаю, нашая зборная свой узровень не страціла і будзем далей яго трымаць», — падкрэсліў ён. 

Валерыя СЦЯЦКО

Фота БелТА