Міжнародны круглы стол адбыўся ў Нацыянальным архіве Рэспублікі Беларусь

20 кастрычніка ў Нацыянальным архіве Рэспублікі Беларусь прайшоў Міжнародны круглы стол «Органы дзяржаўнай бяспекі СССР у Вялікай Айчыннай вайне (да 80-годдзя знішчэння гаўляйтара В.Кубэ)».

Перад пачаткам мерапрыемства ўдзельнікі і госці азнаёміліся з выставай архіўных дакументаў «Паляванне на гаўляйтара», якая распавядае аб падрыхтоўцы і правядзенні акцыі па знішчэнні В.Кубэ.

У мерапрыемстве прымаюць удзел вядучыя навукоўцы і спецыялісты па названай праблематыцы з Беларусі і Расіі.

Пасля прывітальных слоў дырэктара Дэпартамента па архівах і справаводстве Міністэрства юстыцыі Рэспублікі Беларусь Алега Воінава, дырэктара Нацыянальнага архіва Рэспублікі Беларусь Андрэя Дземянюка адбылося абмеркаванне тэм круглага стала: «Тэарэтыка-метадалагічныя аспекты даследавання гісторыі органаў бяспекі і спецслужбаў», «Дакументы аб знішчэнні гаўляйтара Вільгельма Кубэ: невядомыя і вядомыя», «Грані замаху на Вільгельма Кубе ў фотафонакінавідэадакументах БДАКФФД», «Аперацыя „Адплата“ ў мемуарах Алены Мазанік», «Мерапрыемствы НКДБ СССР і БШПР па ліквідацыі кіраўнікоў Генеральнай акругі „Белоруссия“ і РОА», «Асаблівасці падрыхтоўкі нямецкай разведвальна-дыверсійнай агентуры на акупаванай тэрыторыі Беларусі ў 1941-1944 гг. » і інш.

— Сёння ў сценах Нацыянальнага архіва Рэспублікі Беларусь сабраліся вядучыя спецыялісты ў нашай рэспубліцы па гісторыі органаў дзяржаўнай бяспекі перыяду Вялікай Айчыннай вайны, а таксама вядомыя замежныя навукоўцы. Прыемна бачыць сярод прысутных моладзь — вучняў з гімназіі № 21 г. Мінска, студэнтаў, маладых спецыялістаў, — сказаў у сваім выступленні Алег Воінаў. — Адзначу, што заяўленая праблематыка і тэмы дакладаў вельмі актуальныя для беларускай гістарыяграфіі. Многія аспекты ўдзелу савецкіх спецслужбаў у барацьбе з ворагам, фактычна, прагучаць упершыню. Сапраўды, падзеі 80-гадовай даўніны, звязаныя са знішчэннем гаўляйтара Кубэ дагэтуль дыскусійныя ў асяроддзі спецыялістаў і гісторыкаў. Гэта звязана з абмежаванай крынічнай базай па дадзенай тэме. Разам з гэтым унікальнасць і значнасць гэтай аперацыі не выклікае ніякіх сумневаў. Да яе паспяховай рэалізацыі прыклалі руку практычна ўсе савецкія спецслужбы, беларускія партызаны і падпольшчыкі!

Хачу сказаць, што і ў фондах НАРБ і ў архіве кінафотафонадакументаў ёсць матэрыялы па тэме знішчэння гаўляйтара Кубэ. Яны прадстаўлены на вітрынах. Акрамя таго, ёсць і іншыя матэрыялы пра ўдзел савецкіх спецслужбаў у барацьбе з ворагам. Гэта спецпаведамленні Л. Цанавы, спісы спецгруп, накіраваных у БССР, комплекс дакументаў аб рабоце асаблівых аддзелаў партызанскіх брыгад і атрадаў і шэраг іншых матэрыялаў, што дазваляе вывучаць розныя аспекты ўдзелу савецкіх чэкістаў у Вялікай Айчыннай вайне.

У падрыхтоўцы і арганізацыі мерапрыемства прынялі ўдзел Нацыянальны архіў Рэспублікі Беларусь, Беларускі дзяржаўны архіў кінафотафонадакументаў, Інстытут гісторыі Нацыянальнай акадэміі навук Беларусі, Полацкі дзяржаўны ўніверсітэт імя Еўфрасінні Полацкай.
Мерапрыемства завяршыцца сёння вечарам.