Прафсаюзы параілі набываць гародніну ў запас

Цэны на макарону, ячныя крупы, рыс, маргарын, масла, алей, пшанічную муку, цукар, соль, малако і тварог за апошні месяц не змяніліся, а рэальная зарплата жніўня аказалася на 15,1 % вышэйшай, чым заробак леташняга жніўня. Пры гэтым агульны ўзровень спажывецкіх цэн у жніўні ў параўнанні з ліпенем 2023-га знізіўся на 0,3 %. Да такіх высноў прыйшлі прафсаюзныя работнікі ў выніку маніторынгу.

Федэрацыя прафсаюзаў Беларусі штомесяц аналізуе кошт і наяўнасць спажывецкіх тавараў у рознічнай гандлёвай сетцы, робячы высновы, як суадносіцца рост цэн і заробку. У верасні даследаванне правялі ў 218 крамах — сеткавых супермаркетах і крамах крокавай даступнасці.

Спецыялісты сцвярджаюць, што сярэдні кошт плодаагародніннага набору — капуста, бульба, морква, бурак, цыбуля, яблык (усё па кілаграме) у верасні склаў 8,17 рубля. У параўнанні са жніўнем цана зменшылася на 26 %.

Найтаннейшы набор аказаўся на Брэстчыне — 7,75 рубля, а самы дарагі — у Магілёўскай (8,29 рубля) і Мінскай (8,71 рубля) абласцях. Так што цяпер самы час набываць гародніну пра запас, тым больш што гэта можна зрабіць на шматлікіх кірмашах, параілі прадстаўнікі ФПБ.

Цэны на іншыя тавары вагаюцца. У параўнанні з пачаткам 2023-га значна паменшаў кошт алею (амаль на 20 %), растваральнай кавы (на 7 %) і паўцвёрдага сыру (на 4 %). А вось каўбасныя вырабы, рыба (жывая і марожаная), селядзец і «кандытарка» ў верасні нязначна падаражэлі.

— Цэны знаходзяцца пад кантролем, выкананне задач, пастаўленых Прэзідэнтам, утрымлівае рынак ад рэзкіх хістанняў, — падсумавала вынікі маніторынгу Алена МАНКЕВІЧ, намеснік старшыні Федэрацыі прафсаюзаў Беларусі. — Нязначная дэфляцыя, якая назіраецца па харчовай групе, — станоўчая тэндэнцыя. У той жа час мы бачым рост рэальных зарплат, а таксама тое, што інфляцыя знаходзіцца ніжэй нават прагнозных паказчыкаў. Прафсаюзы толькі вітаюць гэта і заўжды выступаюць за тое, каб заробкі раслі хутчэй за цэны.

У ФПБ удакладнілі, што зніжэнне сярэдняга ўзроўню цэн на значную групу прадуктаў харчавання адбываецца на фоне заўважнага росту заробку. Намінальная налічаная сярэдняя зарплата ў студзені—жніўні склала 1834,4 рубля, а за жнівень 2023-га — 1962,4 рубля.Адпаведна вырасла і рэальная зарплата, якая разлічваецца з папраўкай на ўзровень інфляцыі. У студзені—жніўні сёлета тэмп росту рэальнага заробку склаў 109,3 % у параўнанні з аналагічным леташнім перыядам.

Ірына СІДАРОК

Прэв’ю: pexels.com