У Брэсцкай вобласці эфектыўна працуюць з перспектыўным кадравым рэзервам. Аб гэтым заявіў кіраўнік Адміністрацыі Прэзідэнта Ігар Сергеенка, перадае карэспандэнт БелТА.
У Брэсце арганізаваны двухдзённы семінар з перспектыўным кадравым рэзервам. У ім удзельнічаюць каля 50 чалавек — гэта студэнты і спецыялісты з усіх гарадоў і раёнаў вобласці, якія працуюць у розных галінах. Ігар Сергеенка адзначыў важнасць такіх сустрэч. Ён заклікаў маладых людзей падыходзіць да работы без фармалізму, будаваць кар’еру, вучачыся кіраваць і пераймаючы вопыт калег. Кіраўнік Адміністрацыі Прэзідэнта звярнуў увагу, што Брэсцкая вобласць эфектыўна працуе са сваім кадравым рэзервам.
«У цэлым у рэзерв уключаны 1,1 тысячы маладых людзей да 31 года. Праводзіцца адбор на падставе прафесійных дасягненняў, кампетэнцый, актыўнай грамадзянскай пазіцыі, удзелу ў грамадска-палітычным жыцці рэгіёна і краіны. У кадравым рэзерве — прыкладна 85 працэнтаў маладых спецыялістаў і 15 працэнтаў студэнтаў. У Брэсцкай вобласці работа выбудавана даволі цікава, вядзецца яна актыўна. Студэнтаў-старшакурснікаў тут нават больш, чым у цэлым па краіне. Гэта сведчыць аб тым, што ВНУ ўдзяляюць павышаную ўвагу», — сказаў Ігар Сергеенка.
Мерапрыемства прайшло ў фармаце дыялогу. Маладыя людзі скарысталіся магчымасцю задаць хвалюючыя пытанні: аб сацыяльнай падтрымцы, маладзёжнай палітыцы і замацаванні маладых спецыялістаў, рабоце педагогаў, службе ў арміі і абароне граніц, аб развіцці сферы высокіх тэхналогій. Асаблівую актыўнасць праявілі студэнты ўніверсітэтаў Брэста, Пінска і Баранавіч.
Ігар Сергеенка падкрэсліў, што трапіць у кадравы рэзерв — гэта толькі першая ступень. «Такая работа дае магчымасць людзям праявіць сябе, пераканацца ў іх здольнасцях узначальваць калектывы, ствараць, тварыць. Сведчаннем эфектыўнасці з’яўляецца тое, што толькі ў бягучым годзе на вышэйшыя пасады ў Брэсцкай вобласці было назначана 11 маладых людзей», — заўважыў кіраўнік Адміністрацыі Прэзідэнта.
Размова са студэнтамі і спецыялістамі закранула і Дзень народнага адзінства. Ігар Сергеенка звярнуў увагу на важнасць даты 17 верасня 1939 года ў гісторыі Беларусі, якая захавалася ў назве вуліц і прадпрыемстваў. У бягучым годзе беларусы будуць адзначаць Дзень народнага адзінства толькі трэці раз. Ёсць перадумовы, што гэта свята зойме сваё месца сярод любімых — Дня Перамогі, Дня Незалежнасці.
Паводле слоў кіраўніка Адміністрацыі Прэзідэнта, у краіне цяпер шмат гавораць аб падзеях, якія датычацца ўз’яднання Беларусі. «Яны пакладзены ў аснову абвяшчэння свята — Дня народнага адзінства. Адзначаем яго канкрэтнымі справамі (адкрываем аб’екты сацыяльнай сферы, новыя дарогі) і патрыятычнымі акцыямі, расказваем у розных аўдыторыях аб тых часах і аб значнасці гэтага свята. Дзякуючы адзінству мы можам ганарыцца дасягненнямі нашай краіны», — рэзюмаваў Ігар Сергеенка.
У сустрэчы з маладымі людзьмі таксама прынялі ўдзел старшыня Брэсцкага аблвыканкама Юрый Шулейка і памочнік Прэзідэнта—інспектар па Брэсцкай вобласці Валерый Вакульчык.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.