Чым здзіўлялі на адкрыцці Фестывалю нацыянальных культур

Верхні горад Мінска цудоўным цёплым восеньскім днём прымаў прадстаўнікоў 24 нацыянальнасцяў. У сэрцы краіны адкрыўся XІV Рэспубліканскі фестываль нацыянальных культур. Праходзіць ён будзе да чэрвеня наступнага года і завершыцца заключнымі мерапрыемствамі ў Гродне. Мяркуецца, што фінал стане яшчэ больш маштабным: культуру сваіх народаў прадставяць некалькі дзясяткаў нацыянальнасцяў, адзначыла БелТА.

Выставачныя экспазіцыі нацыянальна-культурных грамадскіх аб'яднанняў не пуставалі. Паток цікаўных мінчан не спыняўся ўвесь дзень. Адны слухалі народныя песні і глядзелі аўтэнтычныя танцы, другія каштавалі нацыянальныя стравы, трэція прымяралі нацыянальныя касцюмы і спрабавалі напісаць сваё імя на розных мовах.

«Мы адкрываем фестываль нацыянальных культур. Гэтае свята сімвалізуе, што нашу любімую сінявокую краіну любяць не толькі беларусы, але ўсе, для каго яна адкрывае вялікія магчымасці незалежна ад нацыянальнай прыналежнасці», — адзначыў міністр культуры Анатоль Маркевіч.

Паводле яго слоў, сёння ў Беларусі жывуць людзі розных нацыянальнасцяў адзінай дружнай сям'ёй. Сваёй стваральнай працай яны ўмацоўваюць суверэнітэт і незалежнасць нашай краіны. І кожны, хто прыязджае сюды з дабром, можа адпачыць і знайсці заняткі па інтарэсах.

Міністр падкрэсліў, што фестываль — вельмі важная пляцоўка для таго, каб калектывы, выканаўцы, мастакі маглі прадэманстраваць сваё майстэрства. Ён упэўнены, што прысутныя на фестывалі атрымаюць сапраўднае задавальненне ад іх выступленняў.

Упаўнаважаны па справах рэлігій і нацыянальнасцяў Аляксандр Румак падкрэсліў, што менавіта мір і згода — сімвал рэспубліканскага фестывалю і адначасова брэнд Беларусі. «На працягу многіх стагоддзяў фарміравалася самасвядомасць беларускага народа — прымаць прыязна ўсіх, хто прыехаў на гэтую зямлю. Людзі ўцякалі ад вайны, катастроф, людзі ажаніліся, стваралі сям'і. І ўсе знаходзілі ўтульнасць на нашай зямлі», — заўважыў ён.

І сёння беларускім заканадаўствам замацаваны роўныя правы — палітычныя, сацыяльныя, эканамічныя — для ўсіх, хто пражывае ў Беларусі, падкрэсліў Аляксандр Румак. «Кожны чалавек роўны ў нашай краіне. І дзякуючы сваім намаганням ён можа пабудаваць прафесійную кар'еру і сваё жыццё. Дзяржава вельмі шмат робіць, каб прадстаўнікі розных нацыянальнасцяў маглі данесці сваю культуру», — дадаў ён.

Намеснік старшыні Мінгарвыканкама Арцём Цуран адзначыў, што фестываль праходзіць на шырока вядомай пляцоўцы, дзе ладзяцца музычныя вечары на працягу ўсяго музычнага сезона пачынаючы з мая. «Такім прыгожым фінальным акордам завяршаем наш музычны турыстычны сезон. Словы ўдзячнасці прадстаўнікам дыяспар, якія дэманструюць сваю творчасць. Упэўнены, што ўсе атрымаюць толькі станоўчыя эмоцыі ад свята», — перакананы намеснік старшыні Мінгарвыканкама.

Пасля афіцыйных прамоў канцэртная праграма свята працягнулася самабытнымі нумарамі. І кожны сустракалі бурнымі авацыямі. На сцэне музычная культура прадстаўнікоў азербайджанскай, аргенцінскай, армянскай, афганскай, башкірскай, грэчаскай, грузінскай, дагестанскай, яўрэйскай, кітайскай, карэйскай, малдаўскай, нямецкай, палесцінскай, пакістанскай, польскай, рому, рускай, татарскай, туркменскай, украінскай, чувашскай і эстонскай культур.

«Здзівіць мінчан немагчыма — мінчане самі здзіўляюць», — заўважыў былы старшыня палесцінскай абшчыны ў Беларусі Хасан Камаль Махмуд.

Выставачная экспазіцыя Палесціны прыцягнула сваім каларытам. Чэргі да яе не заканчваліся. «Мы здзіўляем нашай культурай і асабліва кухняй. Вось музычныя інструменты, розныя ручныя вырабы з аліўкавага дрэва, у тым ліку карта Палесціны, вырабы з марскіх ракаў», — паказаў ён.

Тут можна было пачаставацца сапраўдным, найлепшым аліўкавым алеем, прывезеным непасрэдна з Палесціны. Яго прапаноўвалі пакаштаваць з белым хлебам і затарам — прыправай, якая атрымала сваю назву ад расліны, што з'яўляецца галоўным яе інгрэдыентам.

Непадалёк размясцілася экспазіцыя Саюза палякаў у Беларусі. Па словах старшыні грамадскага аб'яднання Аляксандра Сонгіна, распавесці аб польскай нацыянальнай культуры і паказаць яе шматграннасць за адзін дзень немагчыма, таму тут толькі яе асобныя элементы. Зрэшты, польская культура сугучная з беларускай, заўважыў ён.

Народным малдаўскім гумарам і сумам дзяліўся на сцэне Верхняга горада гурт «Плай» (у перакладзе з малдаўскага — «край» ). Старшыня рэспубліканскай грамадскай арганізацыі «Суполка малдаван» Антаніна Валько раскрыла сэнс некаторых выкананых народных песень. А наогул група «Плай» на сцэнах краіны і за мяжой больш за 25 гадоў. «Мы стараемся паказаць культуру народа, да якога мы належым. А народ у нас вельмі прыгожы, тэмпераментны, заўсёды спявае песні — і ў горы, і ў радасці. Ёсць песні для сцэны, для весялосці, для суму. Рэпертуар нашай групы гадзіны на тры. Мы ўсё лета ў раз'ездах: ездзілі на вішнёвы фестываль у Глыбокае, у Моталь, дзе выступілі на дзвюх пляцоўках. Вярнуліся вельмі задаволеныя», — сказала Антаніна Валько.

Напрыканцы яна прызналася: «Вельмі люблю кіраўніка нашай дзяржавы. Я і песню яму прысвяціла. А чаму не? Бо ён заслужыў нашу любоў», — прызналася старшыня рэспубліканскай грамадскай арганізацыі.

Больш за сотню работ-вышыванак прадставіла дыяспара ўкраінцаў. Адна з самых ранніх датуецца 1885 годам. «Гэтыя работы засталіся ад бабуль, і мы іх захоўваем. Раней вышыўкі рабілі на канапляным палатне, таму што набыць іншы матэрыял было вельмі дорага. Акрамя таго, у нас ёсць работы майстроў, якія і сёння вышываюць», — распавяла старшыня Мінскага гарадскога грамадскага аб'яднання ўкраінцаў «Заповіт» Галіна Калюжная.

Увогуле, старт фестывалю стаў яркім. Беларусы з нецярпеннем будуць чакаць заключных маштабных мерапрыемстваў летам наступнага года ў Гродне: шэсце, вялікая канцэртная праграма, якая будзе транслявацца па тэлебачанні, у другі дзень — работа падворкаў. Усе атрыбуты — нацыянальныя касцюмы, творчасць, кухня — там будуць прадстаўлены значна шырэй, заўважыла мастацкі кіраўнік Рэспубліканскага цэнтра нацыянальных культур Алена Госцева.

«Людзі розных нацыянальнасцяў жадаюць, каб часцінка іх радзімы заваявала беларусаў, іх каларыт дапоўніў нашу рэспубліку, — адзначыла начальнік упраўлення культуры і народнай творчасці Міністэрства культуры Ірына Карповіч. — А мы паказваем, што Беларусь — гасцінная, добразычлівая краіна для жыцця прадстаўнікоў усіх нацыянальнасцяў, якія прыходзяць сюды з дабром».

Фота Віктара ІВАНЧЫКАВА