2 верасня 2023 года на тэрыторыі Цэнтральнага батанічнага саду Нацыянальнай акадэміі навук Беларусі адбудзецца масавае навукова-папулярнае мерапрыемства «Фестываль навукі». Традыцыйна на ім прадстаўлена шырокае кола беларускіх і замежных удзельнікаў, сярод якіх акадэмічныя інстытуты, вышэйшыя навучальныя ўстановы, музеі навукі, цэнтры дзіцячай творчасці, гурткі робататэхнікі. Фестываль уключае пляцоўкі з навукова-папулярнымі лекцыямі, майстар-класы, выставу распрацовак, інтэлектуальныя і забаўляльныя гульні, а таксама навуковыя шоу і маштабныя эксперыменты. Больш падрабязна аб яго падрыхтоўцы і правядзенні расказалі прадстаўнікі Нацыянальнай акадэміі навук.
За час свайго існавання фестываль ператварыўся ў маштабнае мерапрыемства, якое знаёміць мінчан і гасцей сталіцы з найноўшымі распрацоўкамі вучоных і дапамагае разабрацца ў новых ведах са свету навукі і тэхналогій.
«Мы знаходзімся напярэдадні цікавай і важнай у пэўных колах падзеі — пятага фестывалю навукі, — распавёў журналістам першы намеснік Старшыні Прэзідыума НАН Беларусі, акадэмік Сяргей Чыжык, — Гэтае мерапрыемства навукова-папулярнае. Мы прывыклі да строгіх сходаў, нарад, канферэнцый. Тут жа ідзе папулярызацыя, мерапрыемства для шырокага кола ўдзельнікаў, у першую чаргу, для моладзі і нават дзяцей. Вопыт паказвае, што ўдзельнікамі становяцца сем’і з дзецьмі, якія прыходзяць з цікавасцю».
Задума дадзенага мерапрыемства належыць Савету маладых вучоных. «Гэта міжведамаснае мерапрыемства. Запрошаны для ўдзелу міністэрствы адукацыі, аховы здароўя. Яны актыўна арганізуюць свае лакацыі. Акрамя таго, удзельнікамі стануць прыватныя кампаніі і фірмы, якія актыўна папулярызуюць навуку», — адзначыў Сяргей Чыжык.
Цэнтральны батанічны сад — гэта не толькі пляцоўка для адпачынку і забаў, але і навуковая ўстанова. Гэта ўзмацняе эфект фестывалю.
«Важны момант, што мы праводзім фестываль у пачатку верасня — адразу пасля Дня ведаў. Першага верасня маладыя людзі прыйдуць за парты і на ўніверсітэцкія лавы, а на наступны дзень — на фестываль. Я не сумняваюся, што многіх з іх ён зачэпіць, яны ўбачаць сваю магчымую кар’еру, перспектыву развіцця, звязаную з навукай. Тут будзе не толькі карысна і цікава, але і займальна. На эксперыментальных лакацыях кожны зможа нешта паспрабаваць, нешта зрабіць, даведацца аб новым. Таксама будуць сустрэчы з цікавымі людзьмі, вучонымі, будзе паказаны Космас. Фантастыка, якая здавалася ў дзяцінстве недасяжнай, будзе рэалізаваная на фестывалі. Робаты — займальная частка, якая чапляе моладзь. Яны будуць мець зносіны адзін з адным, вырашаць задачы, згуляюць паміж сабой у футбол, пазмагаюцца на рынгу», — расказаў Сяргей Чыжык.
На фестывалі будуць не толькі прадстаўнікі Беларусі, але і Расіі. «У гэтым годзе будзе прадстаўлена вядомая карпарацыя „Расатам“. У нас спеюць цікавыя сумесныя праграмы. Таксама будзе прадстаўлены Расійскі хіміка-тэхналагічны універсітэт імя Д. І. Мендзялеева», — дадаў першы намеснік Старшыні Прэзідыума НАН Белапусі.
Па словах Сяргея Чыжыка, пацвярджаецца на практыцы, што Беларусь — інтэлектуальная краіна. «Мы правялі выставу „Беларусь інтэлектуальная“, якая праехала па ўсіх абласцях нашай краіны. Бачым вялікую цікавасць з боку насельніцтва. Сумарна паўмільёна чалавек па ўсіх рэгіёнах наведалі нашы выставы. Гэты інтэлект беларусаў мы павінны падсілкоўваць, раскрываць, і фестываль навукі — гэта адна з такіх падзей, якія працуюць у цэлым на Беларусь інтэлектуальную. Кожны год фестываль прыносіць нешта новае. 2023 год — не выключэнне», — падагульніў ён.
Фестываль навукі будзе падзелены на шэраг пляцовак. Аб гэтым расказаў журналістам старшыня Савета маладых вучоных НАН Беларусі, дырэктар ДУ «Цэнтральная навуковая бібліятэка імя Якуба Коласа НАН Беларусі» Станіслаў Юрэцкі: «Асаблівасць пляцоўкі — „100 інавацый маладых вучоных“ у тым, што ў ёй удзельнічаюць маладыя вучоныя з праектамі, якія маюць высокую стадыю ўвасобленасці на практыцы. На лакацыі „Навуковая фантастыка“ гасцей чакаюць конкурсы і віктарыны на тэму навукі, навуковай фантастыкі і пераможцы атрымаюць прыемныя прызы. На пляцоўцы „Медыцына“ раскажуць аб „Вакцынах будучыні“. На лакацыі „Палігон“ можна паглядзець на розныя хімічныя, фізічныя працэсы».
Данііл ХМЯЛЬНІЦКІ
Фота scifest.by
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
