Другі год запар Свіслач прымае гасцей, каб разам атрымаць асалоду ад смаку першага каравая з новага ўраджаю, дакрануцца да звычаяў і традыцый папярэдніх пакаленняў. З’явіўся фестываль пасля візіту Прэзідэнта Беларусі Аляксандра Лукашэнкі на мясцовую пякарню ў 2021 годзе. Свіслацкія майстры далі назву «Бацькава булка» самай папулярнай пляцёнцы, паведамляе БелТА.
Пекары з усёй краіны прадстаўляюць свае працы. Асаблівая ўвага мясцовай пляцёнцы — «Бацькавай булцы». Майстар-клас па яе вырабе праводзяць для ўсіх жадаючых. «Дзелім кавалачак цеста на тры часткі. Раскачваем ў скруткі і пераплятаем. Затым хвосцікі змацоўваем і падхінаем уніз», — распавядае пра працэс Марына Улявічус. Пасля печы булка атрымліваецца неверагодна смачнай, духмянай, пышнай. «Сакрэт — у добрым настроі, адкрытасці і любові, калі рыхтуеш нашу знакамітую булку», — дадае яна. Жанчына не хавае радасці, што ўвага сёння прыкавана да Свіслачы: «Выдатна, што людзі пра нас даведаліся, працягваюць пазнаваць. А мы даведаемся пра іншых, дзелімся сваім вопытам».
Рэцэптам з Маларыцкага раёна дзеліцца Валянціна Гатоўчыц. «Гэта наш вядомы ў Беларусі грэцкі хлеб. Ён здаўна ў нас у раёне выпякаўся як на святы, так і ў будні. Робім і на заквасцы, і на сыроватцы, і проста на вадзе. Грэчка перамолваецца, цяпер дадаем і пшанічную муку, сланечнікавы алей або сметанковы, часам яйка, проса. Наогул у кожнай гаспадыні свае нюансы, сакрэты і падыходы. Дбае наш хлеб у рускай печцы, таму і набывае дадатковую ўнікальнасць», — распавядае яна.
Побач размясціліся і мужчыны, і жанчыны, для якіх пякарская справа стала прафесіяй. Пасля першага каравай-фэсту, на якім работнік «Гроднахлебпрам» Яўген Гараўскі прадставіў макет драмтэатра з салёнага цеста, у маладога мужчыны з’явілася ідэя стварыць з цеста гродзенскі сабор. «Каля месяца пайшло на стварэнне. Займаўся адзін, таму так доўга давялося працаваць. Важыць ён каля 30 кг. Зразумела, есць яго немагчыма з-за салёнага густу, але затое хлебабулачны макет радуе сваёй прыгажосцю», — падзяліўся ён.
«Сёлета мы крыху змянілі падыход: замест вялізнага каравая напяклі шмат булачак, якія радуюць усіх гасцей свята. А яшчэ здзіўляем ювелірнай працай. Прыклад таму — журавель з цеста», — адзначыла начальнік булачнага цэха ААТ «Гроднахлебпрам» Святлана Пацехіна.
Што тычыцца асобы свята — каравая «Бацькава булка», то пекары ўключылі фантазію, зрабілі іншае аздабленне. Спяклі ноччу свежы пяцікілаграмовы каравай і прадставілі на тэматычным фесце.
Свята ў Свіслачы стала своеасаблівым турыстычным брэндам, які ўжо другі год запар збірае гасцей з усёй краіны і нават замежжа. «Мы рады, што дзякуючы візіту на пякарню нашага нацыянальнага лідара, Аляксандра Лукашэнкі, нарадзіўся такі выдатны фестываль, які збірае гасцей другі год запар. Мне хочацца падзякаваць нашых майстроў, якія працуюць у пякарні. Бо дзякуючы іх ласцы, дабрыні, любові і майстэрству з’яўляюцца такія выдатныя вырабы», — падкрэсліў старшыня Свіслацкага райвыканкама Аляксандр Вярсоцкі.
У праграме фестывалю таксама традыцыйныя, але любімыя гасцямі і ўдзельнікамі «Бацькаўшчына», экскурсія «Ад збожжа да хлеба». Гасцей чакае і вячэрняя праграма ад «Радыё «Мір», інтэрактыўная пляцоўка «Булка-варажбітка і ўсе-ўсе-ўсе», рэтра-танцпляцоўка Гродзенскай абласной філармоніі.
Фота БелТА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
