Абаяльны Рысік развітаўся і адправіўся дадому ў Белавежскую пушчу, усе медалі знайшлі сваіх герояў, арганізатары выдыхнулі — ІІ Гульні краін СНД сталі гісторыяй, незабыўнай, непаўторнай гісторыяй. Заўсёды сумна развітвацца. Але як прыемна захоўваць ва ўласнай памяці яркія моманты, у памяці тэлефона — вясёлыя фотаздымкі і як карысна мець самае каштоўнае — вопыт.
ІІ Гульні краін СНД сталі экзаменам для ўсёй краіны, упершыню спартыўны форум праходзіў ва ўсіх рэгіёнах. Гомель паказаў гарачыню на татамі, Жлобін закахаўся ў самба. Магілёў паказаў вытрыманую прыгажосць стральбы з лука, а затым здзівіў энергіяй каратэ. Брэст пацвердзіў званне гандбольнай сталіцы і горада, дзе ўсё атрымліваецца ў плыўцоў. Гродна працягнуў чэмпіёнскія традыцыі ў цяжкай атлетыцы і заклаў новыя ў хакеі на траве. Віцебскі летні амфітэатр упершыню прымаў не канцэрт, а спаборніцтвы па тайландскім боксе, у Оршы панавалі баксёры. Горад сонца Маладзечна прыняў турнір па самым летнім відзе спорту — пляжным валейболе. У горадзе моцным духам людзей — Салігорску — выступалі моцныя целам барцы. Мінск стаў сталіцай лёгкай атлетыкі, мастацкай гімнастыкі, валейбола, баскетбола, пляжнага футбола, міні-футбола, сучаснага пяціборства. Свята адчула ўся краіна. «У Гомелі прайшлі спаборніцтвы па дзюдо — запоўненыя трыбуны. У Гродне на спаборніцтвах па цяжкай атлетыцы таксама запоўненыя трыбуны. У Оршы спаборніцтвы па боксе — яблыку няма дзе ўпасці. У Мінску ідзе звычайны матч па валейболе, гуляюць жаночыя і мужчынскія зборныя Беларусі і Арменіі — поўнасцю запоўненыя трыбуны. Спаборніцтвы праводзяцца для людзей, і самы галоўны індыкатар — увага гледачоў», — адзначаў міністр спорту і турызму Сяргей Кавальчук. Ідэя правядзення спартыўнага форуму ў розных наградах асабліва спадабался гасцям, якія змаглі пазнаёміцца з некалькімі гарадамі. Ацанілі яе і прадстаўнікі Азербайджана, якія ў 2025 годзе будуць прымаць ІІІ Гульні краін СНД. Намеснік міністра спорту Мар'яна Васільева адзначала, што ідэя з рознымі гарадамі атрымае працяг і ў 2025 годзе.
Галоўнае дзейства разгортвалася, безумоўна, унутры спартыўных арэн. Але і побач з імі было чым заняцца і на што паглядзець. У кожным без выключэння горадзе дзейнічалі фан-зоны. Фантазія арганізатараў не ведала межаў, на фан-зонах было ўсё і нават больш. А самае галоўнае — у месцах правядзення мерапрыемстваў было бяспечна. Як паведамілі ў Міністэрстве ўнутраных спраў, правапарушэнняў, злачынстваў і надзвычайных сітуацый у час правядзення ІІ Гульняў краін СНД дапушчана не было. Грамадскі парадак і бяспеку забяспечылі ў поўнай меры.
Дэвіз Гульняў «Моцны характар — яркая гульня» стаў вызначальным для кожнага ўдзельніка спаборніцтваў. І гэта дало свае вынікі: у Беларусі 236 медалёў, з іх 48 залатых, 78 сярэбраных і 110 бронзавых. У медальным заліку наша краіна саступіла толькі Расіі, спартсмены якой сабралі 288 медалёў. А галоўнымі ўзнагародамі для ўсіх аматараў сталі незабыўныя моманты спаборніцтваў. Хіба можна забыць, як беларускія гандбалісты ў апошнія імгненні фінальнага матча вырвалі перамогу ў сапернікаў з Расіі і перамаглі з розніцай у адзін бал — 38:37. Нагоду для радасці для ўсіх аматараў беларускага футбола дала зборная па пляжным футболе. Нарэшце беларускія футбалісты сталі чэмпіёнамі! «Фантастыку» ў гульнявых відах спорту паказалі беларускія баскетбалісты, якія ў турніры 3х3 заваявалі чатыры медалі. Спякотнымі атрымаліся спаборніцтвы па пляжным валейболе, якія прынеслі «бронзу» мужчынскаму дуэту і «серабро» жаночаму. Медалі беларускім спартсменам прынеслі і спаборніцтвы па класічным валейболе: мужчынская юніёрская зборная стала сярэбраным прызёрам, а жаночая — чэмпіёнам ІІ Гульняў краін СНД. Хакей на траве быў прадстаўлены ў новым фармаце — 5х5, які для многіх спартсменаў можа быць нязвыклым. Але беларусы не разгубіліся — і мужчынскія, і жаночыя каманды сталі чэмпіёнамі. У гульнявых відах спорту беларусы засталіся без узнагарод толькі ў спаборніцтвах па міні-фуболе — занялі чацвёртае месца. Але спорт ёсць спорт. Гульнявыя віды спорту ў Беларусі перамогамі на буйных міжнародных стартах не распешчаныя. Таму ІІ Гульні краін СНД прынеслі не толькі жаданыя медалі, але і веру ў тое, што ў гульнявых відах расце моцная моладзь.
Традыцыйна радуе сваімі поспехамі айчынная лёгкая атлетыка. А на ІІ Гульнях краін СНД яна пераўзышла ўсе чаканні. Па словах дзяржаўнага трэнера па лёгкай атлетыцы Ігара Сівадзедава, медалістамі ІІ Гульняў краін СНД сталі 96 працэнтаў каманды. Беларускія спартсмены заваявалі 39 медалёў, з іх — 11 залатых. У Гродне, горадзе, дзе вырас двухразовы алімпійскі чэмпіён Аляксандр Курловіч, не перамагаць беларускія цяжкаатлеты проста не мелі права. Усяго ў беларусаў 22 медалі. На гродзенскі памост выйшла сярэбраны прызёр Алімпійскіх гульняў Дар'я Наумава. Сапраўды фурор выклікала выступленне алімпійскага чэмпіёна 2008 года Андрэя Арамнава, які заняў трэцяе месца.
У кожнага віду адзінаборства свая прыгажосць і свая філасофія. У гэтым усе ўпэўніліся падчас ІІ Гульняў краін СНД. «Відаць, што працуе федэрацыя, што моладзь ідзе ў барацьбу, ёсць канкурэнтнае асяроддзе. Атрымалася сапраўднае свята спорту. Мне тут радасна і камфортна», — дзяліўся сваімі ўражаннямі ад спаборніцтваў па барацьбе алімпійскі чэмпіён Раман Уласаў. У скарбонцы беларускай зборнай па спартыўнай барацьбе 21 медаль: 6 залатых, 7 сярэбраных, 8 бронзавых.
Беларускія дзюдаісты на ІІ Гульнях краін СНД сабралі адзін сярэбраны і сем бронзавых медалёў. Таму, як падкрэслілі трэнеры, наперадзе ў іх шмат працы. І гэта вельмі важна, бо цяпер у нацыянальнай камандзе ідзе змена пакаленняў. «Шчыра кажучы, мы не чакалі, што дасягнём такога поспеху. Калі планавалі гэтае мерапрыемства, разлічвалі, што ў нас будзе дзесьці чатыры медалі. А па факце двух дзён бескампраміснай і яркай барацьбы мы атрымалі 11 медалёў — 4 сярэбраныя і 7 бронзавы», — падвёў вынікі спаборніцтваў па каратэ старшыня Беларускай федэрацыі Аляксей Багданаў. І гэтым усё сказана. Спаборніцтвы па самба ў Жлобіне прывялі да таго, што мясцовыя ўлады задумаліся аб адкрыцці тут аддзялення па гэтым відзе. Самбісты ў горадзе металургаў выступілі на дзясятку — сабралі 10 медалёў (6 бронзавых, два сярэбраныя і два бронзавыя). Беларускія баксёры заваявалі на ім два залатыя, сем сярэбраных і дванаццаць бронзавых медалёў. І, па словах галоўнага трэнера маладзёжнай зборнай Алега Каракова, выканалі 150 працэнтаў з таго, што маглі. Чатыры залатыя медалі заваявалі беларусы і ў спаборніцтвах па тайскім боксе.
Зборная Беларусі па плаванні на ІІ Гульнях краін СНД заваявала 32 медалі, у тым ліку адзін залаты, 11 сярэбраных і 20 бронзавых. Для таго каб зразумець значнасць гэтага поспеху, варта ўлічвабць, што для спартсменаў гэта першы міжнародны старт. Не падвялі і пяціборцы, а дакладней пяціборкі: Марыя Гнедчык стала чэмпіёнкай ІІ Гульняў краін СНД, Міра Бурая заняла другое месца ў індывідуальным турніры. А разам дзяўчаты сталі пераможцамі ў эстафеце. Сапраўдны фурор, як і заўсёды, выклікалі гімнасткі. Аліна Гарнасько, Арына Аверына, Лала Крамарэнка выступалі на дыване. А з трыбун за імі назіралі Аліна Кабаева, Святлана Хоркіна, Яўгенія Канаева і іншыя славутыя чэмпіёнкі.
Адстраляліся на «золата» і стралкі. У плане на ІІ Гульні краін СНД былі заяўлены 17 медалёў, у тым ліку 8 асабістых. «План аказаўся выкананы на ўсе 100 працэнтаў: як ні дзіўна, менавіта такі расклад ад асноўнай каманды мы і атрымалі — 8 індывідуальных узнагарод і 17 у суме», — расказала старшы трэнер нацыянальнай каманды Вікторыя Чайка. Сярэбраныя медалі ў камандным турніры мужчын і жанчын, у спаборніцтвах змешаных пар ад беларускіх стралкоў з лука сталі найлепшым падарункам для старшыні Беларускай федэрацыі Мікалая Марусава. І для ўсіх аматараў.
ІІ Гульні краін СНД вылучаліся сваім наватарскім падыходам да многіх рэчаў. Але захавалі адну традыцыю, уласцівую Беларусі, — форум прайшоў на высокім арганізацыйным узроўні. Але сутнасць спорту — у пастаянным удасканаленні. На гэта звярнуў увагу і міністр спорту і турызму Сяргей Кавальчук, ацэньваючы перспектывы Гульняў краін СНД: «Гульні, якія два гады таму прайшлі ў Казані, былі пробныя. Беларусь узняла планку, і яна знаходзіцца на дастаткова высокім узроўні. У Азербайджане, які праз два гады будзе іх праводзіць, думаю, агульнымі намаганнямі выведзем Гульні на яшчэ больш высокі ўзровень. Гэта цікава і спартсменам, і гледачам, і нам, функцыянерам, якія арганізоўваюць такія мерапрыемствы».
Валерыя СЦЯЦКО
Фота Віктара ІВАНЧЫКАВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.