Да ll Гульняў краін СНД падобныя лакацыі беларускія міліцыянеры падрыхтавалі і ва ўсіх абласных цэнтрах, а таксама ў Маладзечне, Оршы, Салігорску і Жлобіне. Пляцоўка ў Мінску пачала сваю працу ўчора, будзе сустракаць гасцей сёння і на наступных выхадных — 12 і 13 жніўня. Як будуць працаваць рэгіянальныя пляцоўкі акцыі МУС «За бяспеку разам!», можна паглядзець па спасылцы.
Аднымі з першых гасцей галоўнай міліцэйскай пляцоўкі сталі міністр унутраных спраў Іван Кубракоў, яго намеснікі Генадзь Казакевіч і Дзмітрый Карзюк, начальнік ГУУС Мінгарвыканкама Міхаіл Грыб. Кіраўнікі міліцэйскага ведамства праінспектавалі ахову грамадскага парадку на тэрыторыі каля Палаца спорту. Іван Кубракоў паразмаўляў з супрацоўнікамі і азнаёміўся з ведамаснай лакацыяй.
У тым, што яна карыстаецца папулярнасцю ў мінчан і гасцей сталіцы, можна было пераканацца з першых хвілін. Дзеці і дарослыя з задавальненнем знаёміліся з сімвалам акцыі — Сцяпанычам. Хлапчукі ўсіх узростаў канцэнтраваліся каля выставы рэтра- і сучаснай тэхнікі, самастойна складалі фотаробат і спрабавалі здымаць адбіткі пальцаў: сваю дактакарту можна атрымаць на памяць.
Лакацыя адметная не толькі тым, што дзеці могуць паспрабаваць сябе ў ролі міліцыянераў, а і атрымаць каштоўную інфармацыю з першых вуснаў. Супрацоўнікі розных службаў цэнтральнага апарата МУС, сталічнай міліцыі і ўстаноў адукацыі з задавальненнем дадуць кампетэнтныя адказы на любыя пытанні. Гэтым ужо актыўна карыстаюцца будучыя абітурыенты і іх бацькі — цікавяцца ўмовамі паступлення і вучобы ў Акадэміі і Спецыялізаваным ліцэі МУС, размаўляюць з курсантамі, ліцэістамі і выкладчыкамі.
Атмасферу свята падтрымліваюць вядомыя музычныя кампазіцыі ў выкананні духавога аркестра ГУУС Мінгарвыканкама. Арганізатары абяцаюць яшчэ мноства сюрпрызаў! Прыходзьце да Палаца спорту сёння да 21:00.
— Імкнёмся ў тым ліку ў гульнявой форме растлумачыць нашым грамадзянам і гасцям Беларусі асаблівасці заканадаўства, а таксама данесці правілы паводзін у грамадскіх месцах, асновы дарожнай бяспекі, — адзначыў міністр унутраных спраў Іван КУБРАКОЎ, кажучы аб акцыі МУС «За бяспеку — разам!». — Актыўна працуем і з дзецьмі. І гэта дае вынік — скарацілася колькасць непаўналетніх, якія загінулі на дарогах.
З міліцэйскай лакацыі кіраўнікі ведамства на чале з міністрам унутраных спраў адправіліся на «Мінск-Арэну» для ўдзелу ў цырымоніі адкрыцця ll Гульняў краін СНД. Падчас размовы з журналістамі, Іван Кубракоў адзначыў, што ў беларускай міліцыі ёсць велізарны досвед забеспячэння грамадскага парадку на буйных спартыўных і іншых масавых мерапрыемствах. «Пры гэтым да кожнага з іх мы рыхтуемся вельмі ўважліва, вывучаем навацыі іншых дзяржаў, улічваем аператыўнае становішча ў краіне і тое, што адбываецца вакол нашых граніц, — падкрэсліў ён. — Так, пры ажыццяўленні кантрольна-прапускнога рэжыму на спартыўныя аб’екты ўводзяцца пэўныя абмежаванні, але ўсе яны ў першую чаргу накіраваны на карысць саміх грамадзян».
Як звярнуў увагу кіраўнік міліцэйскага ведамства, для бяспекі беларусаў і гасцей краіны зроблена ўсё. Больш за сем тысяч відэакамер працуе ў сістэме маніторынгу грамадскай бяспекі. Найменшае парушэнне грамадскага парадку — і супрацоўнікі міліцыі адразу рэагуюць. «Пастараліся арганізаваць службу так, каб наша прысутнасць была мінімальнай, пры гэтым сітуацыя цалкам кантралявалася, — удакладніў ён. — Прыняты ўсе неабходныя меры, бяспека будзе забяспечана як на аб’ектах Гульняў, так і ў цэлым па краіне».
Вераніка КАНЮТА
Фота прэс-службы МУС
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.