У гэтай салаце нават узімку захаваюцца смак і водар свежых агурочкаў, быццам толькі што сарваных з градкі.
Спатрэбіцца на 6 літровых слоікаў: агуркі свежыя — 5 кг, рэпчатая цыбуля — 1 кг, зяленіва кропу — 300 г, воцат 9 % — 100 мл, цукар — 5 ст. л., соль — 2 ст. л., чорны перац (гарошак) — 1 ч. л.
Агуркі папярэдне замачыць на гадзіну ў халоднай вадзе. Памытыя агуркі і ачышчаную цыбулю нарэзаць паўкольцамі. Вылажыць у вялікую міску. Пасаліць і пакінуць пастаяць 30 хвілін, каб агуркі далі сок.
Кроп памыць і дробна нарэзаць, дадаць да агуркоў.
У вялікай каструлі змяшаць воцат, цукар і перац. Дадаць падрыхтаваную гародніну, старанна перамяшаць.
Паставіць каструлю на невялікі агонь, давесці да кіпення, перыядычна памешваць. Калі агуркі крыху зменяць колер, зняць салату з агню і хутка раскласці ў прастэрылізаваныя слоікі.
Слоікі трэба запоўніць даверху такім чынам, каб марынад цалкам пакрыў агуркі. Салату закруціць і ахінуць да астывання (стэрылізацыя не патрабуецца).
Спатрэбіцца: яблыкі — 5 кг, згушчанае малако з цукрам — 1 бляшанка, цукар — 100 г, вада — 250 мл.
Яблыкі памыць, даць сцячы вадзе, затым ачысціць іх ад скуркі і асяродкаў, разрэзаўшы на 4 часткі, затым парэзаць кавалачкамі. На дно посуду, у якім будзеце варыць, уліць ваду (пажадана ўзяць каструлю з тоўстым дном, каб пюрэ не прыгарэла), вылажыць яблыкі, накрыць вечкам і варыць на слабым агні, пакуль яблыкі не стануць вельмі мяккімі (хвілін 30).
Затым выключыць агонь і яблыкі старанна расцерці ў пюрэ, можна паглыбным блэндарам або проста таўкачыкам. Потым у яблычнае пюрэ ўсыпаць цукар, перамяшаць і давесці да кіпення, уліць згушчанае малако, размяшаць, давесці да кіпення і варыць, часам памешваючы, 5 хвілін (сачыце, каб пюрэ не прыгарэла). Затым гатовае пюрэ раскласці па стэрыльных слоічках і закаркаваць пракіпячонымі вечкамі.
Ахінуць і пакінуць так слоічкі да астывання.
Гэта вельмі смачная і хрусткая салата. Яе падаюць пад пікантным мядова-часночным соусам. Гатаваць яе пажадана роўна столькі, колькі зможа з'есці ваша сям'я. Пакідаць на наступны дзень не рэкамендуецца, паколькі яна можа страціць першапачатковыя смакавыя якасці.
Спатрэбіцца: малады кабачок; нерафінаваны алей — 50 г; 9 % воцат — 2 ст. л.; часнок — 3 долькі; вадкі мёд — 1 ст. л.; буйнакрышталічная соль, свежы молаты перац і зяленіва кропу.
Памыты кабачок нарэзаць тонкімі кружочкамі і пакласці ў глыбокую місачку. Пасыпаць чайнай лыжкай солі і пакінуць на 30 хвілін. Для запраўкі змяшаць сечаны кроп, здробнены часнок, вадкі мёд, воцат, алей і перац. Кружочкі кабачка лёгенька адціснуць ад соку, які ўтварыўся, вылажыць на талерку, паліць мядова-часночным соусам і пакінуць на дваццаць хвілін. І толькі пасля салату можна падаваць да стала.
Спатрэбіцца: капуста — 0,5 невялікага качана, морква — 2 шт., малады кабачок — 1 шт., агурок — 2 шт., сцябло сельдэрэю — 1 шт., свежы молаты перац — 0,5 ч. л. зерне каляндры — ч. л., па некалькі галінак зяленіва кропу і пятрушкі, невялікі лімон — 1 шт., соль і алей.
Кабачкі і моркву ачысціць ад лупіны, надзерці на тарцы для карэйскай морквы і вылажыць у аб'ёмную міску. Туды ж дадаць тонка нашаткаваную капусту, лустачкі агурка, сечанае зяленіва і дробна нарэзаны сельдэрэй. Усё гэта паліць сокам лімона і пасыпаць растоўчаным зернем каляндры. Пасаліць і паперчыць, заправіць алеем і даць настаяцца паўгадзіны.
Падаюць такую салату з мяснымі або рыбнымі стравамі.
Спатрэбіцца: маладыя кабачкі — 300 г, кісла-салодкія яблыкі — 2 шт., салёныя ці марынаваныя агуркі — 2 шт., рэпчатая цыбуля — 2 шт., зяленіва кропу і пятрушкі — па парачцы галінак, цукар, соль і маянэз — на смак.
Пачышчаныя і памытыя яблыкі надзіраюць на бурачнай тарцы. Гэтак жа робяць і з кабачкамі. Усё гэта злучаюць у адной місачцы. Туды ж дадаюць сечанае зяленіва, парэзаныя кубікам агуркі і дробна пакрышаную цыбулю. У самым канцы салату падсольваюць і падсалоджваюць, запраўляюць маянэзам і акуратна змешваюць.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
