Калі ў пачатку тыдня ў нас стаяла халоднае для ліпеня надвор'е, то днямі ў краіну пачалі паступаць больш цёплыя паветраныя масы. А выхадныя адзначацца цёплым, а ў нядзелю па паўднёвым захадзе краіны нават спякотным надвор'ем з тэмпературным фонам на некалькі градусаў вышэй за кліматычную норму, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Істотных ападкаў па краіне не чакаецца, толькі днём у нядзелю да паўночна-заходніх межаў нашай краіны наблізіцца франтальны раздзел і тут магчымыя лакальныя кароткачасовыя дажджы, месцамі з навальніцамі.
У пятніцу пераважна па паўднёвай палове Беларусі будуць кароткачасовыя дажджы, у асобных раёнах з навальніцамі. Тэмпература паветра ўначы складзе плюс 12—18 градусаў, удзень — 21—27 градусаў. Не будзе ападкаў і ў суботу. У начныя і ранішнія гадзіны ў асобных раёнах згусціцца слабы туман. Уначы тэмпература будзе вагацца ад 8 да 13 градусаў, удзень — ад 23 да 29 градусаў.
Дастаткова сонечна і без ападкаў прагназуецца і ў нядзелю. Толькі днём у асобных раёнах па паўночным захадзе краіны магчымы кароткачасовы дождж, навальніца. Тэмпература паветра ўначы будзе вагацца ад 8 да плюс 14 градусаў, у паўднёва-заходніх раёнах да плюс 17 градусаў. Удзень чакаецца ад 25 градусаў па ўсходзе да 33 градусаў па паўднёвым захадзе краіны.
У Белгідрамеце адзначылі, што ў панядзелак у Беларусі яшчэ захаваецца вельмі цёплае надвор'е, пры гэтым без летніх навальнічных дажджоў не абыдзецца. У далейшым ініцыятыву перахопяць франтальныя раздзелы, якія прынясуць у краіну не толькі новыя порцыі ападкаў, але і больш свежую паветраную масу з паўночнага захаду Еўропы.
Будзе дастаткова душна ў панядзелак у цёмны час сутак. У гэтыя суткі ноччу пераважна па заходняй палове, днём месцамі па краіне пройдуць кароткачасовыя дажджы, у асобных раёнах прагрымяць навальніцы. Уначы слупок тэрмометра падымецца да 13—20 градусаў (гэта начны максімум), днём — да 26—33 градусаў.
У аўторак ужо з ападкамі, але яшчэ душна ноччу і досыць горача днём. У гэты дзень на большай частцы тэрыторыі краіны чакаюцца кароткачасовыя дажджы, месцамі навальніцы. Тэмпература паветра ўначы складзе 13—20 градусаў. Днём паветра прагрэецца да 20—27 градусаў, а па паўднёвым усходзе — да 29 градусаў.
Спецыялісты таксама нагадалі аб асноўных правілах паводзін у спякоту. Па-першае, трэба выбіраць для прагулак ранішні або вячэрні час, у перыяд максімальнага прагрэву паветра апранаць галаўны ўбор і браць з сабой ваду. Асабліва асцярожнымі варта быць людзям з сардэчна-сасудзістымі захворваннямі.
Паводле слоў сіноптыкаў, пры такіх спрыяльных умовах тэмпература ў рэках і вадаёмах працягвае павышацца і цяпер складае 19—23 градусы.
Сяргей КУРКАЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.