У сучаснай установе аховы здароўя створаны ўсе ўмовы — як для медыцынскага персаналу, так і для пацыентаў. Ваеннаслужачыя, а таксама члены іх сем'яў, ветэраны Вялікай Айчыннай вайны і Узброеных Сіл атрымалі магчымасць у адным месцы прайсці дыягностыку па шырокім спектры захворванняў, пракансультавацца ў высокакваліфікаваных спецыялістаў, скарыстацца комплексам працэдур і паклапаціцца аб прафілактыцы тых ці іншых захворванняў. Дарэчы, усе паслугі цэнтра даступныя і для грамадзянскага насельніцтва, праўда, на платнай аснове.
Як адзначыў падчас урачыстага адкрыцця цэнтра намеснік міністра абароны па тыле — начальнік тылу Узброеных Сіл генерал-маёр Андрэй Бурдыка, у нашай дзяржаве здароўю насельніцтва (і ваеннаслужачыя — не выключэнне) удзяляецца вялікая ўвага. «Самае галоўнае — вы павінны разумець, што не пацыент вам нешта павінен, а вы — пацыенту, — звяртаючыся да медыцынскага персаналу цэнтра, заўважыў ён. — Да пацыентаў патрэбна асаблівая ўвага».
Намеснік міністра пажадаў супрацоўнікам плёну ў паўсядзённай дзейнасці, а таксама падтрымання высокага ўзроўню медыцынскага забеспячэння, якім славіцца 432-і галоўны ваенны клінічны медыцынскі цэнтр Узброеных Сіл.
Амбулаторны цэнтр, рэканструкцыя якога ажыццяўлялася на працягу двух гадоў, — гэта шматпрофільны комплекс, які мае 15 аддзяленняў і 11 спецыялізаваных кабінетаў, прызначаных для аказання медыцынскай дапамогі. Цэнтр абсталяваны самым сучасным медыцынскім абсталяваннем, якое дазваляе праводзіць рэнтгенаўскія, ультрагукавыя, эндаскапічныя і іншыя даследаванні. Усё абсталяванне поўнасцю новае.
Як расказала начальнік амбулаторнага цэнтра 432-га галоўнага ваеннага клінічнага медыцынскага цэнтра Узброеных Сіл палкоўнік медыцынскай службы Вольга Лаўрэцкая, у цэнтры з'явіўся такі ўнікальны апарат, як дэнсітометр, які дазваляе вымяраць шчыльнасць касцей. Гэтае абсталяванне, па яе словах, вельмі неабходнае ў дыягностыцы астэапарозу. «Рэнтген-аддзяленне абсталявана шасцю навейшымі апаратамі, у тым ліку айчыннай вытворчасці, з вельмі высокай адрознівальнай здольнасцю», — адзначыла начальнік амбулаторнага цэнтра.
Што датычыцца кадраў, медыцынскае падраздзяленне практычна поўнасцю ўкамплектавана. Згодна са штатным раскладам, у цэнтры працуе 165 чалавек, сярод іх — сем ваеннаслужачых і 158 асоб грамадзянскага персаналу. Праўда, як адзначыла кіраўнік установы, маюцца і вакантныя пасады: у прыватнасці, урачоў і сярэдняга медперсаналу.
— У Беларусі ёсць добрая традыцыя — адкрываць знакавыя сацыяльныя аб'екты перад святамі, — звярнуў увагу начальнік ваенна-медыцынскага ўпраўлення Міністэрства абароны палкоўнік медыцынскай службы Аляксандр Малюх. — Гэта сведчыць аб сацыяльнай палітыцы нашай дзяржавы, накіраванай у тым ліку і на клопат аб здароўі нашых грамадзян. Амбулаторны цэнтр не саступае многім шматпрофільным цэнтрам краіны. Eн з'яўляецца адным з асноўных падраздзяленняў 432-га галоўнага ваеннага клінічнага медыцынскага цэнтра Узброеных Сіл. Ваенны шпіталь, як у народзе называюць 432-гі цэнтр (быў адкрыты ў жніўні 1805 года. — «Зв».), з'яўляецца найстарэйшай медыцынскай установай краіны. З уводам у эксплуатацыю амбулаторнага цэнтра рэканструкцыя шпіталя поўнасцю завершана.
Нягледзячы на функцыянаванне амбулаторнага цэнтра ў новым рэжыме, сюды звяртаецца да тысячы чалавек у суткі. Варта заўважыць, што сяміпавярховы будынак цэнтр дзеліць разам з кафедрай ваенна-палявой тэрапіі, аддзяленнем лабараторнай дыягностыкі і цэнтральнай ваенна-ўрачэбнай камісіяй.
Вераніка КАНЮТА
Фота БелТА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.