«Нядаўна сваякі ў вёсцы пачаставалі кляновым сокам, які самі сабралі ў красавіку. Напой нам вельмі спадабаўся. Мяркуем, што па сваёй карысці ён не саступае бярозаваму соку. Ці так гэта?
Марыя і Сяргей Монічы»
Здагадка нашых чытачоў не пазбаўлена падстаў. Вось што расказала ўрач-гігіеніст Мінскага абласнога цэнтра гігіены, эпідэміялогіі і грамадскага здароўя Алена Смірнова:
Амалоджвае і ўмацоўвае
— У склад кляновага соку ўваходзяць вада, цукроза, алігацукрыды, мінералы, арганічныя і тлустыя кіслоты, глюкоза, караціноіды, дэкстроза, вітаміны Е, РР, В, С, — адзначыла ўрач. — Гэты прыродны напой карысны пры авітамінозе, ён умацоўвае імунітэт, чысціць крывяносныя сасуды ад таксінаў, зніжае крывяны ціск, спрыяе памяншэнню вязкасці крыві і з’яўляецца прафілактычным сродкам супраць утварэння тромбаў у сасудах, запавольвае развіццё анкалагічных працэсаў і запаленняў. Акрамя гэтага, сок клёну аказвае мачагоннае і жаўцягоннае дзеянне, садзейнічае запаволенню старэння, паляпшэнню рэгенерацыі тканак, зніжэнню ўзроўню халестэрыну, нармалізацыі функцыянавання ЖКТ, паскарэнню абмену рэчываў, умацаванню касцей і нерваў.
Нягледзячы на вялікую колькасць станоўчых уласцівасцей, кляновы сок мае супрацьпаказанні, падкрэсліла Алена Смірнова:
— Сок утрымлівае цукар, таму людзям з цукровым дыябетам не рэкамендуецца ўжываць яго. Ён таксама можа выклікаць моцную алергічную рэакцыю. Гэты прыродны напой супрацьпаказаны дзецям да трох гадоў. Дзіця старэйшага ўзросту можа ўжываць яго ў аб’ёме не больш за 100 мл у дзень. Кляновы сок мае мачагоннае дзеянне, таму пры праблемах з мочавыдзяляльнай сістэмай ён рэкамендуецца ў невялікіх колькасцях.
Тэрмін захоўвання свежага соку не перавышае трох дзён. У замарожаным выглядзе напой можа захоўвацца да года. Самае распаўсюджанае выкарыстанне соку — перапрацоўка яго ў кляновы сіроп. Пры гэтым вада з драўніннай вадкасці выпарваецца, салодкі прадукт гусне і ператвараецца ў цягучую масу з характэрнымі смакавымі якасцямі.
Усе станоўчыя ўласцівасці прыроднага прадукту захаваюцца пры ўмове, што клён для збору соку выбраны ўдалечыні ад забруджаных месцаў, аўтамагістраляў і прамысловых прадпрыемстваў, адзначыла Алена Смірнова. Дрэва павінна мець дыяметр ствала не менш за 20 см і пышную крону. Збіраюць карысны напой вясной, а распусканне пупышак на клёне сведчыць аб заканчэнні сезона збору соку.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.