За гады правядзення форум ТІБА стаў самай прадстаўнічай з'явай у сферы інфармацыйна-камунікацыйных тэхналогій (ІКТ) у Беларусі, якая садзейнічае лічбаваму развіццю і ўкараненню інавацыйных тэхналогій ва ўсе сферы жыццядзейнасці. У краіне ўжо звыш 11,7 мільёна сотавых абанентаў, а ў рэйтынгу паштовага развіцця Сусветнага паштовага саюза Беларусь займае 13 месца сярод 172 краін. Па леташніх выніках, у структуры ВУП удзельная вага галіны лічбавізацыі склала 6,6 %. Сёлета форум сабраў звыш 260 айчынных і замежных удзельнікаў выстаўкі, а падчас дзелавой праграмы цягам чатырох дзён тут пройдзе больш як 30 мерапрыемстваў.
Штучны інтэлект — новы мозг у творчасці, упраўленні і камунікацыі. Робаты са штучным інтэлектам — «рукі» ў вытворчасці, а беспілотны транспарт — новыя «ногі» ў перавозках і лагістыцы, заўважыў, вітаючы гасцей форуму падчас яго афіцыйнага адкрыцця, прэм'ер-міністр краіны Раман Галоўчанка:
— Ужо амаль 30 гадоў ТІБА збірае на сваёй пляцоўцы людзей, чыя дзейнасць, а ў многім і жыццё, звязана з вялізнай сферай ІКТ, тых, хто развівае, арганізоўвае практычнае ўкараненне ці імкнецца эфектыўна выкарыстоўваць магчымасці гэтых амаль бязмежных тэхналогій. Цяпер мы будуем якасна новую мадэль функцыянавання эканомікі, грамадства і дзяржавы. Маё выступленне магло б быць цалкам сгенерыравана з дапамогай нейрасеткі, і вы б гэтага нават не заўважылі.
Асноўнымі кірункамі работы праграмістаў 30 гадоў таму былі бухгалтарскія і навуковыя разлікі, а цяпер практычна любую сферу жыццядзейнасці можна алічбаваць і надзяліць зручнай для карыстальніка мабільнай праграмай. Контуры новага лічбавага свету значна бліжэйшыя, чым здаецца, і задача форуму ТІБА-2023 — даць комплекснае бачанне дасягненняў і магчымасцяў для максімальнага раскрыцця інавацыйнага патэнцыялу ІT-сферы ў інтарэсах грамадства і дзяржавы, а таксама партнёраў, найперш у межах Еўразійскага эканамічнага саюза, дадаў прэм'ер:
— Ва ўмовах складанай геапалітычнай сітуацыі вельмі важна забяспечваць тэхналагічную незалежнасць і лічбавы суверэнітэт.
Правядзенне ў межах ТІБА Еўразійскага лічбавага форуму, які збірае прадстаўнікоў прафесійнай суполкі краін — удзельніц ЕАЭС, стала неад'емнай і значнай часткай мерапрыемства, зазначыў намеснік прэм'ер-міністра Ігар Петрышэнка:
— Развіццё лічбавай эканомікі вельмі важнае для фарміравання адзінай эканамічнай прасторы ЕАЭС і паглыблення супрацоўніцтва яго ўдзельнікаў. Неабходна актывізаваць работу па рэалізацыі агульных працэсаў у сферы лічбавізацыі. Ва ўмовах высокіх тэмпаў тэхналагічнага развіцця ІT-сферы лічбавы парадак дня патрабуе актуалізацыі, найперш інтэграванай інфармацыйнай сістэмы ЕАЭС, якая забяспечвае сумесную работу дзяржаўных інфармрэсурсаў і сістэм дзяржаў саюза. Тэндэнцыю па павелічэнні спектра лічбавых задач, якія вырашаюцца на базе ЕАЭС, трэба падтрымаць і прапанаваць перадавыя напрацоўкі калегам у межах СНД, ШАС і БРІКС.
Лічбавізацыя выводзіць эканоміку на якасна новы ўзровень і становіцца адной з умоў поспеху ў канкурэнтнай барацьбе на сусветных рынках. Узмацняецца ўплыў перадавых тэхналогій на жыццё людзей, асабліва ў будаўніцтве, адукацыі, галіне аховы здароўя, забеспячэнні ўсіх сфер нацыянальнай бяспекі, таму акцэнт выстаўкі на ўкараненні рашэнняў, якія павышаюць даступнасць тэхналогій разумнага горада, вельмі важны, упэўнены Аляксандр Вальфовіч, дзяржсакратар Савета бяспекі:
— Кіберзлачынцы прымяняюць найноўшыя дасягненні ў сферы інфармацыйных тэхналогій, у сувязі з чым як ніколі важным становіцца развіццё нацыянальнай сістэмы кібербяспекі.
Лічба існуе паўсюдна, і вынікі, якія ўжо дасягнуты ў лічбавізацыі ў краіне, дазваляюць ганарыцца імі, перакананы Канстанцін Шульган, міністр сувязі і інфарматызацыі, старшыня арганізацыйнага камітэта форуму ТІБА, які абвясціў мерапрыемста афіцыйна адкрытым і пажадаў прысутным плённай працы:
— ТІБА сапраўды стаў унікальным брэндавым беларускім мерапрыемствам, у якое ўваходзіць выставачная частка, дзе дэманструецца тое, што ўжо ўкаранілі ў жыццё і плануем укараняць. А на дзелавой частцы мы можам абмеркаваць тое, што ў нас у праектах і планах, пачуць меркаванне іншых спецыялістаў, што важна для прыняцця маштабных рашэнняў, ад якіх залежыць эфектыўнасць работы дзяржавы і галін эканомікі.
На шматлікіх стэндах выстаўкі цягам чатырох дзён можна «пакаштаваць» лічбавыя прадукты айчынных кампаній і ведамстваў; паблукаць па «адукацыйнай алеі», якую стварылі беларускія і расійскія ўстановы адукацыі; даведацца пра міжнароднае і сумеснае лічбавае супрацоўніцтва на экспазіцыях «РусатамБел», прадпрыемстваў Масквы, Санкт-Пецярбурга, Ніжагародскай і Курскай абласцей, Беларуска-кітайскага індустрыяльнага парка «Вялікі камень» і іншых.
Ірына СІДАРОК
Фота Віктара ІВАНЧЫКАВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.