Вальфовіч: абноўленая Канцэпцыя нацбяспекі выклікала інтарэс у грамадстве

Абноўленая Канцэпцыя нацыянальнай бяспекі выклікала інтарэс у грамадстве, заявіў журналістам дзяржаўны сакратар Савета бяспекі Аляксандр Вальфовіч. Сёння ён прымае ўдзел у нарадзе з кіраўнікамі ўстаноў вышэйшай адукацыі ў Міністэрстве адукацыі, перадае БелТА.

Паводле яго слоў, праект абноўленай Канцэпцыі нацыянальнай бяспекі — гэта адзін з механізмаў забеспячэння нацыянальнай бяспекі, абароны нашых нацыянальных інтарэсаў. «Сёння па даручэнні кіраўніка дзяржавы пачата работа па абмеркаванні гэтага дакумента на розных дыскусійных пляцоўках. Я папрашу кіраўнікоў ВНУ гэту работу актывізаваць на базе сваіх вышэйшых навучальных устаноў, закрану тыя новаўвядзенні, якія закладзены ў праекце канцэпцыі, чаму мы абнавілі канцэпцыю, у сувязі з чым. Хаця многія з іх самі прымалі ўдзел у падрыхтоўцы праекта абноўленай канцэпцыі і былі ўключаны ў склад навукова-экспертнай супольнасці. Я прапанаваў расійскім калегам пры рабоце над Канцэпцыяй бяспекі Саюзнай дзяржавы таксама задзейнічаць нашу навукова-экспертную супольнасць для таго, каб гэтыя дакументы сапраўды былі падмацаваны не проста словамі, але і тэарэтычнымі выкладкамі», — расказаў Аляксандр Вальфовіч.

Дзяржсакратар адзначыў, што ўсе навелы абноўленай канцэпцыі зведзены ў пяць блокаў. «Гэта датычыцца паняційна-катэгарыяльнага апарату, аналізу сучаснай ацэнкі абстаноўкі, гэта абнаўленне асноўнай базы паняццяў, карэкціроўка некаторых індыкатараў ацэнкі нацыянальнай бяспекі, зыходзячы з новых выклікаў і пагроз. І пяты блок — з’яўленне новай сферы — біялагічнай бяспекі. Паспрабую прайсціся па кожным гэтым блоку. Выслухаю меркаванні, можа, у некага ўжо нейкія ёсць пытанні, паспрабую адказаць на гэтыя пытанні. Калі трэба супрацоўнікі дзяржсакратарыята прымуць удзел у дыялогавых пляцоўках у ВНУ пры абмеркаванні гэтага дакумента. Думаю, што за гэты год мы даволі добра абкатаем гэты дакумент, выверым усе шурпатасці і вынесем яго на даклад на Усебеларускі народны сход для зацвярджэння яго нашым народам», — падкрэсліў ён.

«Мы гэту работу толькі пачалі, але інтарэс, сапраўды, у грамадстве ёсць. Тыя дыскусійныя пляцоўкі, якія прайшлі ўжо, паказваюць, што людзі з інтарэсам і разуменнем успрымаюць тое, што такі дакумент патрэбны сёння, проста неабходны, — дадаў Аляксандр Вальфовіч. — Сёння вельмі шмат рызык, выклікаў для нацыянальнай бяспекі, якія мяжуюць з пагрозай. І перш за ўсё вельмі хочацца, каб не грымнуў гром на тэрыторыі Рэспублікі Беларусь, гэта значыць не пачалі грукатаць гарматы. А для гэтага трэба своечасова ўключаць рычагі, механізмы для рэагавання на тыя рызыкі і выклікі, каб прадухіліць бяду па вялікім рахунку. Таму Канцэпцыя нацыянальнай бяспекі — гэта алгарытм работы дзяржаўных органаў усіх сфер для таго, каб, перш за ўсё, засцерагчы ад небяспекі краіну, засцерагчы ад небяспекі насельніцтва, абараніць нашы нацыянальныя інтарэсы».