Гомельская абласная арганізацыя Беларускага Чырвонага Крыжа накіравала гуманітарны груз для без малога двух дзясяткаў жыхароў вёскі Галкі Брагінскага раёна. Падтоплены пад’езд да населенага пункта — праехаць на транспарце ў вёску зараз немагчыма.
— У населеным пункце ў некаторых студнях з-за паводкі пагоршылася якасць вады. Таму было прынята рашэнне даставіць у кожны дом 20-літровыя бутлі з пітной вадой. У далейшым сельвыканкам сумесна з ратавальнікамі таксама будзе дастаўляць ваду належнай якасці, — адзначыў начальнік арганізацыйна-кадравага аддзела Гомельскай абласной арганізацыі Беларускага Чырвонага Крыжа Арцём Карпенка.
Беларускі Чырвоны Крыж узаемадзейнічае з упраўленнем МНС Гомельскай вобласці і абласной арганізацыяй Таварыства выратавання на водах, якія манітораць паводкавую сітуацыю ў рэгіёне.
— У вёсцы Галкі пражывае 11 сямей, у тым ліку адна шматдзетная, дзе трое школьнікаў. Падтрымка неабходна і жыхарам сталага ўзросту, людзям з інваліднасцю. Усім сем’ям перададзены харчовыя наборы і неабходныя гігіенічныя прыналежнасці, — патлумачыў Арцём Карпенка.
Сярод жыхароў вёскі, з якімі сустрэліся валанцёры, — інвалід другой групы Вольга Гардзіенка і адзінокая пенсіянерка Марыя Набок. Як высветлілася, Марыя Рыгораўна — адрасат надомнай сацыяльнай дапамогі. Цяпер з-за паводкі сацработніку таксама складана дабірацца да пажылога чалавека.
Аказалі дапамогу жыхарам вёскі і ратавальнікі. Разам з работнікамі газавай службы раёна яны даставілі газавыя балоны ў домаўладанні, дзе была такая патрэба.
Як расказала старшыня Брагінскай раённай арганізацыі Беларускага Чырвонага Крыжа Людміла Бурак, жыхары вёскі шчыра ўдзячныя ўсім за дапамогу. Валанцёры Беларускага Чырвонага Крыжа будуць і надалей выконваць сваю місію — дапамагаць людзям у цяжкіх сітуацыях.
Наталля КАПРЫЛЕНКА
Фота Брагінскай раённай арганізацыі БЧК
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
