«Кожная сітуацыя індывідуальная». Даведаліся пра тонкасці працы з замежнікамі

Сачыць за выкананнем міграцыйнага заканадаўства, ведаць усіх замежных студэнтаў у твар, дапамагаць непамятлівым мінчанам абмяняць пашпарт на новы ў самыя кароткія тэрміны, заўважаць і папярэджваць негатыўнае ў паводзінах замежнікаў, уручаць галоўны дакумент стогадовым жыхарам, перадаваць вопыт маладым супрацоўнікам — гэта яшчэ не ўсе задачы, якія выконвае начальнік аддзела па грамадзянстве і міграцыі Першамайскага РУУС сталіцы падпалкоўнік міліцыі Святлана Рудзішкіна, якая служыць у гэтым падраздзяленні без малога 20 гадоў.

Карэспандэнты «Звязды» даведаліся ў яе пра тонкасці працы з замежнымі грамадзянамі. «У Першамайскім раёне Мінска пражывае каля сямі тысяч замежных грамадзян, — заўважае Святлана Рудзішкіна. — І гэта без уліку асоб, якія могуць знаходзіцца ў нашай краіне ў межах пагадненняў. Ёсць і тыя, хто па нейкіх прычынах вырашыў згубіцца сярод беларусаў. За мінулы перыяд гэтага года на тэрыторыі раёна вартавыя правапарадку затрымалі дваіх грамадзян суседняй дзяржавы, якія знаходзіліся ў вышуку за ўчыненне злачынстваў. Яны ва ўстаноўленым парадку належалі экстрадыцыі, каб у сябе на радзіме панесці пакаранне за ўчыненыя супрацьзаконныя дзеянні».

Асаблівую ўвагу супрацоўнікі аддзела па грамадзянстве і міграцыі надаюць студэнтам з-за мяжы. У Першамайскім раёне пражываюць навучэнцы з Расіі, Туркменістана, Азербайджана, Кітая і афрыканскіх дзяржаў. Разам з прадстаўнікамі навучальных устаноў міліцыянеры праводзяць прафілактычныя мерапрыемствы, дзе для іх тлумачыцца заканадаўства Беларусі, асновы прававога становішча замежных грамадзян. На планавай аснове правяраюцца і ўмовы пражывання замежных студэнтаў у інтэрнаце.

Што тычыцца працы з беларусамі, то ўсе механізмы па выдачы і замене пашпартоў і ID-карт вывераныя і не выклікаюць пытанняў. За 11 месяцаў гэтага года было выдадзена 7952 біяметрычных дакумента (пашпарт і ID-карты). Біяметрычны пашпарт неабходны для выезду за мяжу. Вонкава ён падобны да звычайнага, але мае дадатковы адметны значок і адну пластыкавую старонку, усярэдзіне якой устаўлены чып з біяметрычнымі дадзенымі ўладальніка. Пры гэтым традыцыйныя пашпарты па-ранейшаму дзейнічаюць. ID-карта — гэта сучасная тэхналогія, якая заўважна спрашчае жыццё. Аднак пашпарт старога ўзору ніхто не адмяняў.

— Нягледзячы на прапісаныя тэрміны атрымання новага дакумента, кожная сітуацыя разглядаецца індывідуальна, — удакладняе начальнік АГіМ Першамайскага РУУС. — У выпадку, калі чалавеку неабходна тэрмінова выехаць за мяжу, напрыклад, на лячэнне, а пашпарт пратэрмінаваны ці сапсаваны, інспектары імкнуцца дапамагчы. Часта да нас звяртаюцца сем’і, якія збіраліся паляцець у адпачынак, але пашпарт дзіцяці або іншага члена сям’і аказаўся са скончаным тэрмінам дзеяння. Нашы супрацоўнікі аператыўна і прафесійна вырашаюць такія праблемы, каб водпуск у людзей не быў сарваны.

Гатоўнасць прыйсці на выручку грамадзянам пацвярджае практычна два дзясяткі падзяк у кнізе заўваг і прапаноў АГІМ Першамайскага РУУС. «Заўсёды радасна дапамагаць людзям, быць датычным да іх лёсу, — адзначае Святлана Рудзішкіна. — Калі пры нашым садзейнічанні сітуацыя ў грамадзян вырашаецца найлепшым чынам, то мы на сваім месцы — там, дзе мы патрэбныя».

Вераніка КАНЮТА