Кніга «Табой я жыў, табой жыву...», якая выйшла сёлета ў Выдавецкім доме «Звязда», прымеркавана да 140-годдзя з дня нараджэння народнага паэта Беларусі Якуба Коласа і прысвечана яго жонцы — Марыі Дзмітрыеўне Каменскай, у замужжы — Міцкевіч.
Укладальніцы выдання — унучка паэта Вера Міцкевіч і праўнучка песняра Васіліна Міцкевіч.
Кніга складаецца з некалькіх раздзелаў, у якіх змешчаны гісторыка-літаратурныя артыкулы, сямейнае ліставанне, выбранае з ліставання Марыі Міцкевіч і яе адрасатаў, успаміны пра спадарожніцу жыцця Якуба Коласа, дакументы і спачуванні на яе смерць. Апошнім раздзелам друкуюцца вершы, прысвечаныя Марыі Дзмітрыеўне.
З усяго таго багатага і разнастайнага матэрыялу паўстае вобраз жанчыны разумнай, далікатнай, сардэчнай, клапатлівай маці і жонкі. «Яна была чалавекам, поўным любові да людзей, вельмі сціплай, нават самаахвярнай. Мама з вялікай любоўю і пяшчотай ставілася да нас, сваіх дзяцей, вучыла нас быць добрымі, сумленнымі, працавітымі... У нашай сям’і заўсёды панавала атмасфера любові і дабрыні», — пісаў Даніла Міцкевіч.
Нарадзілася Марыя Каменская ў сям’і святара, вучылася ў духоўным вучылішчы, працавала настаўніцай. З Якубам Коласам пазнаёмілася ў Пінску ў 1912 годзе. Дасканала ведала беларускую мову, народныя беларускія песні. Да яе сардэчна ставіліся Янка Купала, Максім Гарэцкі, Змітрок Бядуля і іншыя вядомыя сучаснікі.
Жыццё сям’і было нялёгкім. Давялося спазнаць голад, бежанства, эвакуацыю; у 1941 годзе на фронце прапаў без вестак Юрый — сярэдні сын Якуба Коласа і Марыі Міцкевіч. Праз выпрабаванні і горкія страты Марыя Дзмітрыеўна гадавала дзяцей, несла на сваіх плячах цяжкасці тагачаснага быту, стварала ўтульнасць у доме. Яна была першым чытачом і крытыкам твораў свайго мужа. Мноства цудоўных вершаў беларускі нацыянальны геній прысвяціў «сваёй Марусі» — жонцы, музе, каханай.
Менавіта родную бабулю нагадаў Веры Міцкевіч вобраз Сымонкавай Ганны з паэмы «Сымон-музыка». У лісце да жонкі Якуб Колас пісаў: «Такія людзі, як ты, у жыцці вельмі патрэбныя, як жыватворчыя сокі гэтага жыцця, бо жывеш ты не для сябе...»
Марыя Дзмітрыеўна была побач са сваім знакамітым мужам, але не навідавоку, а як бы за яго плячыма. У тым, што Якуб Колас рэалізаваў сябе напоўніцу, стаў тым, кім ён ёсць для беларускай літаратуры, вялікая заслуга яго спадарожніцы жыцця. Дзякуючы ўкладальнікам кнігі, яе аўтарам і выдавецтву дэталізаваны партрэт Марыі Міцкевіч цяпер даступны шырокаму колу чытачоў.
Алена БРАВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
