Памятаеце айчынную сацыяльную рэкламу пра тое, што збіраць смецце — наш клопат, а не янота? І сапраўды, чаго гэтым павінен займацца янот? Вось у Швецыі, калі верыць паведамленню, хочуць навучыць крумкачоў за ежу збіраць на вуліцах недакуркі і іншае дробнае смецце і прыносіць яго ў аўтамат, які абменьвае «працу» на корм. Чаго толькі часам не прыдумаюць што людзі, што звяры...
Самцы гладкіх марскіх змей пераследуюць чалавека ў вадзе, прымаючы яго за самку свайго віду. Пры гэтым іх самкі, у сваю чаргу, бачаць у дайверах шанц пазбавіцца ад назойлівых кавалераў. («— Чым вы захапляецеся?» — «Сачу за ядавітымі змеямі». — «Працуеце ў жаночым калектыве?» — «Так».) Такія змеі даўжынёй да двух метраў і вагой да трох кілаграмаў сустракаюцца на ўсходзе Індыйскага і на захадзе Ціхага акіянаў. Пры гэтым ніхто з іх не спрабаваў укусіць нырца, хоць змеі даволі ядавітыя. («Мужчынская жыццёвая мудрасць: часам чым ярчэйшая афарбоўка, тым больш небяспечная асобіна».) Замест гэтага некаторыя самцы нават абвівалі канечнасці чалавека — гэтак жа, як яны робяць з целамі самак падчас заляцанняў. Усе падобныя выпадкі здараліся ў сезон размнажэння. Самцы «атакавалі» дайвера ў асноўным адразу пасля няўдалай спробы дагнаць самку ці канфлікту з сапернікам, а самкі — калі спрабавалі ўцячы ад самца. («— Лёня, што ты бегаеш туды-сюды з гэтай мухалапкай?» — «Маша, не перашкаджай! Я забіў пяць мух... Тры самцы і дзве самкі!» — «А як ты даведаўся?» — «А што тут даведвацца? Тры на канапе, а дзве на тэлефоне...»)
У самак дэльфінаў знайшлі такі ж палавы орган, як і ў... жанчын, які можа дапамагаць ім адчуваць задавальненне падчас спароўвання. («Жонка: — «З цягам часу гаспадары становяцца падобнымі на сваіх гадаванцаў». Муж, усхвалявана: — «Слухай, Люсь, давай не будзем ката кастрыраваць».) Раней навукоўцы даведаліся, што дэльфіны могуць займацца сексам не толькі для таго, каб размнажацца, але і для атрымання асалоды. («У акіяне вакол самкі кружыць кіт і выгаворвае той: «Мы — від, які вымірае! Мільёны людзей ва ўсім свеце занепакоеныя лёсам нашай папуляцыі! Сотні экалагічных арганізацый намагаюцца зрабіць нешта для нашага захавання! А ты мне што?! «Галава баліць, галава баліць...»)
Пяціметровага кракадзіла асядлаў дацкі турыст у Аўстраліі. Біёлаг Нільс Джэнсан і яго таварышы падчас падарожжа па парку дзікай прыроды знялі на відэа смяротна небяспечны трук з грабянёвым кракадзілам. («Чабурашка, чуеш мяне?» — «Гена, ну што за пытанні? Паглядзі на мяне. Вядома, чую!») Турыст прынадзіў рэптылію, а калі драпежнік пачаў есці, 22-гадовы Нільс сеў яму на спіну, а потым паўтарыў такія дзеянні яшчэ некалькі разоў. Біёлаг сказаў, што гэта было вельмі цікава, але рызыкоўна. («Кракадзіл сцішыўся і паўгадзіны прыкідваўся бервяном, калі на яго выпадкова прысеў адпачыць Мікалай Валуеў».) Аўстралійскія ўлады асудзілі ўчынак. Яны заклікалі турыстаў паводзіць сябе асцярожна побач з кракадзіламі, асабліва з грабянёвымі, якія з'яўляюцца найбуйнейшымі з усіх існуючых рэптылій. («Займальная заалогія. Ці ведаеце вы, што больш за ўсіх таварышаў у тамбоўскага ваўка?»)
У Новай Зеландыі апосум узяў... у заложнікі жанчыну і не выпускаў яе з дому да прыезду паліцыі. Паводле слоў гаспадыні, яна спрабавала выйсці з жылля і дайсці да машыны, калі жывёліна ўстала ў яе на дарозе і прымусіла вярнуцца назад. «Тэрарыста» злавілі, адвезлі далей ад жылых раёнаў і выпусцілі на волю. Паліцыя выказала здагадку, што апосум мог быць нейчым збеглым гадаванцам або дзіцянём, нядаўна разлучаным з маці. («Вакол дзяўчыны трэба віцца чмялём. З кожным колам робячыся ўсё чмялей і чмялей...»)
Алень уварваўся ў цырульню і ўчыніў пагром у цэнтры Нью-Ёрка. Жывёліна разбіла вітрыну і трапіла ў памяшканне, перад гэтым пераскочыўшы праз кліентку, якая яшчэ і атрымала ад аленя капытом па галаве. Некаторы час нечаканы госць бегаў па салоне прыгажосці, а потым выбег на вуліцу праз дзверы і знік у невядомым кірунку. («Паводле кацінага фэн-шуй ёлка не павінна быць устаноўлена вертыкальна. Нават тэарэтычна».) Алень напалохаў наведвальнікаў і работнікаў салона, аднак больш цікавіць іншае: як жывёліна апынулася ў цэнтры Нью-Ёрка?
У Пінску быў выпадак, калі наведвальніца начнога клуба адсцябала сваім бюстгальтарам ахоўніка. На знятым відэа відаць, як аголеная да пояса жанчына нападае на супрацоўніка ўстановы і б'е яго. («Убачыла павука. Закрычала. Тата спытаў, чаму крычу. «— Таму што павук». — «Ты ж большая за яго». — «А ён страшны». — «Ну, ведаеш, ты таксама не прыгажуня».) Што было прычынай канфлікту, не паведамлялася, аднак, хутчэй за ўсё, на такія дзеянні прадстаўніцу прыгожага полу натхніў алкаголь. Пагадзіцеся, ну чым не «алень»? («Леў — цар звяроў. Пакуль не прачнулася львіца...»)
...Калі чытаеш такія гісторыі, міжволі думаеш, што паміж намі часам бывае нешта агульнае. Паміж людзьмі і звярамі... («Чалавек не горш за мураша можа пераносіць цяжар у 20 разоў большы за ўласную вагу. Але за большую колькасць разоў і пры гэтым страшэнна мацюкаючыся».)
Кастусь ХАЦЕЛАЎ-ЗМАГЕЛАЎ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
