Паласа дажджоў, моцнага ветру і пахаладання

Усё ў гэтым свеце цыклічна. І пасля надзвычай дажджлівага красавіка першая дэкада мая дала прасохнуць залішне мокрай глебе, бо ў сярэднім па краіне за першыя 10 дзён мая колькасць ападкаў склала ўсяго 23 % ад нормы. Другая дэкада мая пачалася з цёплага надвор'я, калі ў разгар дня паветра награвалася да плюс 19—25 градусаў. А, напрыклад, у чацвер было яшчэ цяплей, калі дзённыя максімумы па краіне склалі плюс 17—23 градусы, а па поўдні і паўднёвым усходзе — і зусім летнія значэнні: плюс 24—29 градусаў.

Паводле прагнозаў сіноптыкаў, у пятніцу франтальныя раздзелы пакінуць тэрыторыю Беларусі, таму дажджоў стане менш. У няўстойлівым паветры чакаецца лакальнае развіццё воблачнасці, і месцамі па краіне пройдуць кароткачасовыя дажджы.

А вось у суботу, пры паступленні прахалоднай паветранай масы з Балтыйскага мора кароткачасовыя дажджы чакаюцца на большай частцы тэрыторыі краіны. Удзень месцамі па паўднёвым захадзе нашага рэгіёна будзе ўзмацняцца вецер да моцнага парывістага. Тэмпература паветра ў начныя гадзіны складзе плюс 5—11 градусаў, а днём пры гэтым стане крыху халадней — плюс 12—19 градусаў, па поўдні будзе да 21 цяпла.

На наступным тыдні чакаецца яшчэ большае пахаладанне. У нядзелю і панядзелак у няўстойлівай паветранай масе кароткачасовыя дажджы пройдуць у асноўным па паўночна-ўсходняй частцы краіны. Тэмпература паветра ў ноч на нядзелю складзе плюс 4—10 градусаў, удзень будзе 13—20 градусаў вышэй за нуль. У панядзелак уначы мінімальная тэмпература паветра акажацца ў межах плюс 2—7 градусаў, днём складзе плюс 11—18 градусаў, а па паўднёвым захадзе — 19—20 цяпла.

Паводле папярэдніх прагнозаў айчынных сіноптыкаў, паніжэнне тэмпературнага фону працягнецца і ў наступныя дні тыдня. У аўторак месцамі, пераважна па паўночна-ўсходняй частцы краіны, пройдуць кароткачасовыя дажджы. Тэмпература паветра ноччу апусціцца да плюс 1—7 градусаў, удзень — плюс 8—14 градусаў, а па паўднёвым захадзе 15—18 цяпла.

Сяргей КУРКАЧ

Фота Маргарыты ПАЛЮХОВІЧ