Вера, слова Божае і адчуванне еднасці — менавіта гэта дае надзею, супакаенне ў наш няпросты час хвароб і ўзрушэнняў. Магчымасць далучыцца да агульнай малітвы для кожнага верніка вельмі важная, якія б акалічнасці не былі таму перашкодай. І ў першую нядзелю Адвэнту, калі каталікі ўсяго свету пачалі падрыхтоўку да вялікага свята Раства, у эфіры Першага нацыянальнага канала Беларускага радыё правялі прамую трансляцыю набажэнства аб міры, адзінстве і згодзе. Аднаўленне нядзельнай малітвы ў эфіры рэалізавалася пры садзейнічанні Упаўнаважанага па справах рэлігій і нацыянальнасцяў Рэспублікі Беларусь сумесна з Мінска-Магілёўскай архідыяцэзіяй Рымска-каталіцкага касцёла ў Рэспубліцы Беларусь.
— Мы пачалі рэгулярныя трансляцыі нядзельных мес напрыканцы лістапада ў першы дзень каталіцкага Адвэнту. А яшчэ сёлета ў нас была трансляцыя ў красавіку, якую мы прымяркоўвалі да Вялікадня. Праводзілася акцыя «Малітва за мір і адзінства», дзе трансліраваліся малітвы розных канфесій: каталіцкай, праваслаўнай, мусульманскай, іўдзейскай, — расказвае генеральны прадзюсар Беларускага радыё Антон Васюкевіч. — Напярэдадні посту перад Нараджэннем Хрыстовым у нас адбылася сустрэча з новым мітрапалітам каталіцкай царквы ў Беларусі Ёзафам Станеўскім. Мы дамовіліся, што вось гэтыя дні Адвэнту ў нас будуць магчымасцю для ўсіх вернікаў маліцца дыстанцыйна. Таму і зараз, і на Раство ў нас адбудуцца трансляцыі святочных набажэнстваў. Калі ў тым будзе запатрабаванасць сярод вернікаў, то чаму б не рабіць гэта і далей? Мы заўсёды адкрытыя для абмеркавання розных ідэй і супрацоўніцтва. І гэта была менавіта ініцыятыва Беларускага радыё прадэманстраваць у нашым эфіры ўсю рознабаковасць і шматканфесійнасць і тую згоду, якая ў нас існуе. Тым больш што сёлета ў Беларусі Год народнага адзінства. Такая добрая справа адлюстроўвае шмат і пачуццяў, і памкненняў, і таму ініцыятыва была ўспрынята станоўча кіраўніцтвам канфесій, яны адгукнуліся і прынялі ўдзел у агульнай малітве.
...Адзінства і мір — вялікая каштоўнасць як для асобнага чалавека, так і для ўсяго грамадства. Беларусь заўсёды была прыкладам таго, як павінны ставіцца адзін да аднаго людзі розных нацыянальнасцяў і веравызнанняў. Этнаканфесіянальны свет можа быць моцным і даўгавечным толькі на аснове агульных каштоўнасцяў. У нашай краіне вернікі разам стаяць на абароне Айчыны, паважаюць нацыянальныя традыцыі і дзяржаўныя сімвалы. Усё гэта надзвычай важна сёння, калі па ўсім свеце адбываецца раздзяленне і канфлікты. Людзі з трывогай выказваюцца супраць расколу нашага грамадства, асабліва калі для гэтага выкарыстоўваюцца пачуцці вернікаў. У адрас Белтэлерадыёкампаніі рэгулярна паступаюць звароты ад прадстаўнікоў розных канфесій, у якіх адзначаецца, як важна захаваць мір і згоду на беларускай зямлі. Просьбы аб гэтым гучаць і ў малітвах, аднак з-за пандэміі многія вернікі не могуць наведваць храмы. Адзінай магчымасцю далучыцца да духоўнага слова застаецца трансляцыя ў радыёэфіры богаслужэнняў, зваротаў кіраўнікоў рэлігійных канфесій, духоўна-асветніцкіх праектаў.
Напрыклад, па выхадных у эфіры Першага нацыянальнага канала Беларускага радыё можна пачуць перадачы «Духоўнае слова» і «Святло душы», дзе знаходзяць адлюстраванне падзеі з жыцця праваслаўнай канфесіі. На Міжнародным радыё «Беларусь» трансліруюцца ў тым ліку і каталіцкія праграмы. Не абмінаюць у эфірнай прасторы значныя падзеі і важныя святы розных канфесій. Яшчэ варта адзначыць, што ў хуткім часе на радыё «Культура» мы зможам пачуць сумесны праект з расійскім праваслаўным «Радыё «Вера». Пакуль рана казаць адназначна, у якім фармаце будзе ўсё адбывацца, але тут маюць планы на шчыльнае і плённае супрацоўніцтва. Духоўнасць актуальная ва ўсе часы.
Алена ДРАПКО
Прэв’ю: pexels.com
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
