«Чыталку» для спецыялізаванай літаратуры стварыў студэнт з Віцебска

Студэнт лячэбнага факультэта Віцебскага дзяржаўнага медыцынскага ўніверсітэта Вячаслаў АФАНАСЬЕЎ — малады распрацоўшчык. У свае 19 гадоў ён з'яўляецца адным з пераможцаў рэспубліканскага конкурсу «100 ідэй для Беларусі» ў намінацыі «Грамадства, эканоміка і сацыяльная сфера», дзе сёлета прэзентаваў праект «Выкарыстанне Androіd-дадатку ў рамках інклюзіўнай адукацыі» і атрымаў высокую ацэнку сваёй работы.

ІT-сферай хлопец захапіўся даўно і кажа, што ў яго заўсёды былі ідэі карысных праектаў. Некаторыя нават удалося ажыццявіць, напрыклад, вучэбна-метадычны комплекс па дысцыпліне «Анатомія чалавека». Але прыйшоў час для чагосьці маштабнага.

— На рынку зараз шмат падобных прадуктаў, але мой дадатак адрозніваецца ад іншых тым, што гэта «чыталка» менавіта для спецыялізаванай літаратуры. Аналагаў у нашай краіне няма. Дадатак падыходзіць для ўсіх, і гэта яго плюс: як для інклюзіўнай адукацыі, так і для любога ахвотнага. Каб ім карыстацца, чалавек можа не быць інвалідам па зроку, ён у яго можа быць зніжаны або проста могуць балець вочы.

...На вучэбнай практыцы мне не раз даводзілася бываць у афтальмалагічным аддзяленні, у тым ліку дзіцячым, і я назіраў за тым, што многія пацыенты часова або пастаянна пазбаўлены магчымасці чытаць. Асабліва ў дзіцячым аддзяленні заўважная неабходнасць у стварэнні ўніверсальнага дадатку: каб можна было карыстацца літаратурай па школьнай праграме. Таму важным для нас пунктам была ў тым ліку інклюзіўная скіраванасць. Да таго ж і для студэнтаў праблема велізарнай колькасці вучэбнай літаратуры заўсёды актуальная. Узяць усё неабходнае на «пары» з сабой проста немагчыма. Таму тэарэтычнае навучанне з дапамогай мабільнай праграмы — вельмі актуальнае рашэнне. На ідэю стварыць яе мяне падштурхнула мая дзяўчына. Яна казала, што часам цяжка дастаць з паліцы нейкую кнігу, а вось проста ўключыць яе аўдыяверсію ў навушніках або прайсці пэўныя заданні праз зручны інтэрфейс дадатку — зусім іншая справа. Каця прапанавала, а мы рэалізавалі. Стварылі мабільны дадатак, які змяшчае не толькі тэкст падручніка, але і зручную «чыталку».

Суразмоўнік упэўнены, што распрацоўка мабільнага дадатку з уключэннем усіх відаў мультымедыя, інтэрактыўнасцю, магчымасцю дыстанцыйнай работы — прыярытэт сучаснай адукацыі.

— Наша каманда складаецца з пяці спецыялістаў. Я адказваў за кіраўніцкую дзейнасць, прасоўванне праекта, камунікацыю з патэнцыйнымі кліентамі. Таксама ёсць тэсціроўшчыкі-асістэнты з Беларускага дзяржаўнага ўніверсітэта і Віцебскага дзяржаўнага медыцынскага ўніверсітэта, валанцёры. Складанасці падчас работы былі, але мы знаходзім канструктыўныя рашэнні. За год стварэння праекта тэхналогіі мяняліся, і цяпер практычна ўвесь працэс аўтаматызаваны, выконваецца з дапамогай арыгінальных нейронных сетак, уласных распрацовак. Як працуе мабільны дадатак? Праграма складаецца з двух раздзелаў: тэарэтычнай часткі, з магчымасцю слухання тэксту, і практычнай, з магчымасцю выканання тэстаў да занятку. На сёння адна з састаўных частак праекта цалкам функцыянуе і гатовая да выкарыстання — гэта «Агульная гігіена», яна праходзіць стадыю апрабацыі ў нашым універсітэце. Ужо можна сказаць, што дадатак цалкам выконвае ўскладзеныя на яго функцыі. Цяпер нам патрэбна падтрымка ва ўкараненні распрацоўкі, іншымі словамі, чакаем заяўкі на выкарыстанне яе ў школах, гімназіях, ліцэях, ССНУ і ВНУ. Таксама было б цікава абмеркаваць прапановы ад бізнес-анёлаў і інвестараў. Дадатак даступны ў Play Market і плануецца дата рэлізу на іOS.

Дар'я ШЛАПАКОВА