Сучаснае дынамічнае жыццё дыктуе жанчынам свае правілы пры выбары прычосак. Час складаных укладак прайшоў. У трэндзе — мінімальныя намаганні і максімальны вынік. Модная прычоска павінна быць простай, стыльнай і не патрабаваць шмат часу на стварэнне. Да таго ж, сезон 2021 прапануе вялікую колькасць аксэсуараў для валасоў, якія дапамогуць вам і час зэканоміць, і знайсці свой непаўторны стыль.
1. ЗАВІТКІ. Аб’ёмныя і пругкія локаны — гэта ўчарашні дзень. На змену ім прыйшлі лёгкія і крыху нядбайныя. Асабліва папулярная зараз галівудская хваля.
2. ПРАМЫ ЗРЭЗ ВАЛАСОЎ. Безумоўна, сярод трэндаў 2021 года. Ідэальны варыянт для ўладальніц доўгіх прамых валасоў. Прамы зрэз надасць вобразу дзёрзкасць і ў той жа час лаканічнасць. Да таго ж, такая прычоска патрабуе мінімум клопатаў. Валасы дастаткова правільна памыць і высушыць пры дапамозе брашынгу.
3. ПУЧОК. Сапраўдная палачка-выручалачка для жанчын. Будзе дарэчы і ў офісе, і на важнай нарадзе, і на рамантычным спатканні, і падчас адпачынку. Зараз актуальныя як гладкія, так і нядбайныя пучкі.
4. КОСЫ. Класіка, якая ніколі не выйдзе з моды. Варыянтаў заплесці косы шмат. Перавагу ў гэтым сезоне аддаем класічнаму пляценню. Асабліва модныя косы, якія можна заплесці з хваста. Галоўнае, каб проста і хутка.
5. ХВОСТ. Адна з самых любімых прычосак уладальніц доўгіх валасоў. І калі раней жанчына павінна была пільна сачыць за пасмамі вакол твару ці зачэсваць хвост «валасок да валаска», то ў гэтым сезоне невялікая нядбайнасць — гэта трэнд.
6. ЗАКОЛКІ. У модзе мінімалістычныя варыянты. Напрыклад, звычайныя «невідзімкі». Стылісты прапануюць насіць іх адразу па некалькі штук, каб стварыць большы эфект. Ну, а калі ў вас ёсць жаданне ззяць, то звярніце ўвагу на заколкі з пазалотай. Простыя і лаканічныя па форме і дызайне зараз вельмі актуальныя.
7. АБ’ЁМНЫЯ ГУМКІ З ШОЎКУ. Аксэсуары з шоўку ў гэтым сезоне — бясспрэчны лідар. Пры іх выбары маем на ўвазе: памер мае важнае значэнне. Дыктаваць моду працягваюць аб’ёмныя вырабы. Яны павінны быць мяккімі, каб дапамагчы захаваць прыгажосць і здароўе вашых валасоў.
8. ШАЎКОВЫЯ ХУСТКІ. Хусткі зноў вярнуліся ў моду. Каралева Лізавета ІІ, Жаклін Кенэдзі, Одры Хэпберн… Многія вядомыя жанчыны выкарыстоўвалі і выкарыстоўваюць хустку ў сваіх непаўторных вобразах. Сапраўды, хустка — адзін з самых стыльных і многафункцыянальных аксэсуараў. Просты і ў той жа час элегантны спосаб упрыгожыць валасы: ідэальна як для высокага, так і нізкага хваста, пучка ці распушчаных валасоў. Аднатонныя варыянты ці з прынтамі? Усё залежыць ад вашага стылю і густу.
Кацярына ТУМАС-ЦІШКЕВІЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
