Крыху больш за два тыдні засталося да таго, як 2020-ы год сыдзе ў гісторыю. Таму беларуская пошта ўжо традыцыйна рыхтуецца да навагодніх свят. Рубеж снежня адыходзячага года і студзеня надыходзячага — для паштавікоў заўжды час напружанай работы. Гэта і нядзіўна, бо шмат людзей жадаюць даслаць напісаную ад рукі паштоўку сваім блізкім, родным і знаёмым. А пошта дапаможа выбраць патрэбны фармат і даставіць каштоўнае для чалавечага сэрца адпраўленне.
— У беларускай пошты ёсць выдатная традыцыя: штогод распрацоўваць да навагодніх і калядных свят калекцыі мастацкіх марак, паштовак і картак, канвертаў і паштовых набораў, — паведамілі ў прэс-службе РУП «Белпошта».
Так, сёлета яшчэ ў канцы кастрычніка быў аддрукаваны спецыяльны набор мастацкіх марак «З Новым годам і Калядамі!». На іх змешчана выява Дзеда Мароза на фоне галоўнага навагодняга атрыбута — ёлкі — і анёл, які ляціць над зямлёй і абвяшчае навіну пра Раство Хрыстова. Маркі аддрукаваны тыражом у 30 тысяч экзэмпляраў кожная. Яны таксама выйшлі і ў малым лісце. Кожны такі ліст (а іх выйшла з тыпаграфіі сем тысяч) змяшчае ў сабе чатыры маркі. Намінал адпавядае тарыфу на перасылку простага ліста масай да 20 грамаў у межах Беларусі.
— Таксама ўпершыню па сюжэтах паштовых марак зроблены спецыяльныя магніты навагодняй і каляднай тэматыкі, — адзначылі ў прэс-службе. — Два магніты пры гэтым можна «ажывіць» пры дапамозе бясплатнай мабільнай праграмы AR MARKA BELARUS.
Добрая навіна і для пасткросераў. Яны змогуць адправіць сваім сябрам у краіны замежжа паштовыя карткі навагодняй гумарыстычнай тэматыкі.
— Данесці сваю любоў і ўвагу блізкім і дарагім людзям напярэдадні светлага свята Божага Нараджэння і Новага года — лёгка: трэба прыйсці ў «Паштовы салон», які месціцца ў будынку Галоўпаштамта, выбраць прыгожую паштоўку і канверт, напісаць добрыя, трапяткія словы, а беларуская пошта своечасова даставіць ваша пасланне! — расказалі ў прэс-службе прадпрыемства. — Дарэчы, у «Паштовым салоне» працуе адмысловая навагодняя фотазона.
Ліст Дзеду Марозу
Акрамя таго, да 22 снежня дзякуючы пошце можна замовіць віншаванне ад Дзеда Мароза. Зрабіць гэта можна, абраўшы адзін з двух варыянтаў. Першы — гэта ліст ад навагодняга чараўніка. Ён прыйдзе ў арыгінальным канверце. А ў ім адрасат знойдзе святочную паштоўку. Ды яшчэ якую — незвычайную! Пасланне ў ёй будзе аформлена пры дапамозе дапоўненай рэальнасці. Таксама ад Дзеда Мароза можна атрымаць і мяккую цацку-падушку. Памерам яна невялікая — усяго 30 на 30 сантыметраў. Але на ёй будзе выява сімвала года — Белага Металічнага Быка. Падушка таксама змяшчае пасланне ў фармаце дапоўненай рэальнасці. Такі незвычайны падарунак можна атрымаць з 26 да 31 снежня. Паштальён прынясе яго ў дом.
Да таго ж сёлета ў буйных аддзяленнях паштовай сувязі ўстаноўлены спецыяльныя скрыні, куды можна апусціць ліст са сваімі пажаданнямі і марамі. Яго даставяць непасрэдна Дзеду Марозу і Снягурцы. Але навагодняе пасланне можна адправіць і звычайным спосабам з любога аддзялення паштовай сувязі. Усё, што трэба, гэта правільна ўказаць адрас: 225063, рэзідэнцыя Дзеда Мароза ў Белавежскай пушчы (вёска Каменюкі, Брэсцкая вобласць).
Але варта паспяшацца з адпраўленнем ліста ўжо цяпер. Справа ў тым, што калі ў канцы снежня Дзеду Марозу адначасова даставяць некалькі мяшкоў лістоў, то прачытаць іх усе своечасова ён не зможа.
Валяр'ян ШКЛЕННІК
Фота дадзены РУП «Белпошта»
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
