Вы тут

Адкрылася выстава мастацкага тэкстылю «Надзея, вера і любоў»


17 верасня ў Гарадской мастацкай галерэі твораў Л.Д. Шчамялёва адбылося адкрыццё выставы мастацкага тэкстылю «Надзея, вера і любоў» Маргарыты Шчамялёвай і Хрысціны Высоцкай.


Тэма выставы — гэта тэма творчага шляху, пераасэнсавання жыцця. Бо стварэнне габелена можа асацыявацца з жыццём, а ніткі тканіны — з пачаткам шляху. Мастак займаецца доўгай і карпатлівай працай, калі прасоўвае адну нітку за адной, ствараючы малюнак палатна. Так і ў жыцці — крок за крокам пражываеш жыццё, ствараеш новую рэальнасць, дзе нельга вярнуцца ў пачатак шляху. Учынкі, думкі, рашэнні — гэта тое, з чаго складаецца палатно жыцця. І абедзве мастачкі выдатна перадалі сваю думку. Як выказвалася Маргарыта Шчамялёва: «Надзея дае нам сілу, вера — шлях, а любоў — жыццё». Без гэтых трох складнікаў немагчыма жыць, як немагчыма тварыць сапраўднае мастацтва.

Галоўным тэкстыльным напрамкам у творчасці Маргарыты Шчамялёвай з’яўляецца габелен. Яе незвычайным працам уласцівыя мяккія лініі, яркія фарбы, выразная графіка. У яе творах угадваюцца думкі аб вечным і паўсядзённым, а таксама асабістыя перажыванні і разважанні мастачкі. Напрыклад, вельмі цікавымі падаюцца габелены «Пані трошкі ў гадах» (2019 г.), «Пра любоў» (2020 г.) і інш.

Больш за 40 гадоў Маргарыта Шчамялёва вучыць сваіх студэнтаў не баяцца насычаных колераў, надаваць увагу дэталям, фактурам у матэрыяле і «будаваць» творы з глыбокім сэнсам. Гэтыя запаведзі і пераняла яе вучаніца і калега па цэху Хрысціна Высоцкая. Мастачка стварае працы ў кірунку аб’ёмна-прасторавага тэкстылю. Гэта абстрактныя тэкстыльныя скульптуры, у якіх майстрыха сваёй справы камбінуе розныя тэхнікі ручнога ткацтва з асаблівымі аўтарскімі прыёмамі. У сваіх арт-аб’ектах надае ўвагу не толькі колеру, фактуры, але і форме і ўзаемадзеянню з прасторай. Таксама яна ўжывае нетэкстыльныя матэрыялы, сярод іх: дрэва, пластык, лёска, касетная плёнка і метал.

Хрысціна Высоцкая выкарыстоўвае сувязь паміж унутранай і знешняй прасторай, каб працы з тэкстылю ў гледачоў асацыяваліся з душой чалавека, яго адносінамі са светам. Самай значнай з’яўляецца скульптура «Душы лесу» (2020 г.). Вельмі ўнікальнымі можна назваць «Стварэнне Евы» (2019 г.), «Эдэм» (2019 г.) і інш.

Дзве выдатныя мастачкі, Маргарыта Шчамялёва і Хрысціна Высоцкая, прадстаўляюць гледачу, будзь той мастацтвазнаўцам або простым назіральнікам прыгожага, розныя пакаленні ў гісторыі беларускага тэкстылю. Яны перакананы ў тым, што мастацтва нясе ў сабе зарад станоўчай энергіі, бо кожная ніць праходзіць праз рукі, думкі і сэрца стваральніка.

 

Пабачыць працы з мастацкага тэкстылю Маргарыты Шчамялёвай і Хрысціны Высоцкай можна ў Гарадской мастацкай галерэі твораў Л.Д. Шчамялёва да 1 лістапада.

Кацярына САРОКА

Загаловак у газеце: Фарбы душы

Выбар рэдакцыі

Грамадства

Жыццёвы шлях Якава Крэйзера. Першы камдзiў, якi атрымаў Зорку Героя, заслужыў яе, абараняючы Барысаў

Жыццёвы шлях Якава Крэйзера. Першы камдзiў, якi атрымаў Зорку Героя, заслужыў яе, абараняючы Барысаў

У пачатковы перыяд Вялiкай Айчыннай вайны зацятыя баi разгарнулiся пры абароне Барысава — старадаўняга беларускага горада на Бярэзiне. 

Грамадства

Схадзіць на «Куфар» і застацца без грошай. На папулярным сайце можна сустрэць махляра, замаскіраванага пад пакупніка

Схадзіць на «Куфар» і застацца без грошай. На папулярным сайце можна сустрэць махляра, замаскіраванага пад пакупніка

«Лічбавыя жулікі», якія здымаюць грошы з чужых банкаўскіх карт, звычайна маскіруюцца пад інтэрнэт-рэсурсы, вартыя даверу.