Вы тут

У КДК абнародавалі факты супрацьпраўнай дзейнасці Віктара Бабарыкі


Дэпартамент фінансавых расследаванняў КДК падчас расследавання крымінальных спраў, якія знаходзяцца ў вядзенні, устанавіў новыя факты супрацьпраўнай дзейнасці арганізаванай групы, у склад якой уваходзяць былыя і дзеючыя супрацоўнікі Белгазпрамбанка.


«Цяпер вядзецца работа па шэрагу кірункаў, у тым ліку ў дачыненні да махінацый з вэксалямі на суму больш як $60 млн, — цытуе Івана Тэртэля БЕЛТА. — У выніку на замежныя рахункі ў падкантрольныя структуры членамі злачыннай групы выведзеныя буйныя сумы валюты. Акрамя таго, намі ўстаноўлены адмывальныя схемы, па якіх ажыццяўлялася вывядзенне ў замежныя банкі вялікіх сум валюты ў падкантрольныя структуры».

Адной з такіх структур з’яўляўся латвійскі АBLV-банк.

«Па інфармацыі нашых латвійскіх калег, за некалькі гадоў толькі ў інтарэсах гэтага банка на яго рахункі з рахункаў Белгазпрамбанка было выведзена звыш $430 млн», — адзначыў кіраўнік КДК. Ён выказаў асаблівую падзяку праваахоўным органам Латвіі, якія аператыўна адгукнуліся на запыты, выявілі на рахунках АBLV-банка грошы, што належаць дзеючым супрацоўнікам Белгазпрамбанка, у тым ліку намесніку начальніка юрыдычнага ўпраўлення Шаўчуку. Ён выконваў непасрэдныя ўказанні Бабарыкі, ствараў юрыдычныя асобы ў афшорах і суправаджаў іх дзейнасць.

Акрамя таго, падчас следчых мерапрыемстваў устаноўлены і задакументаваныя факты атрымання буйных хабараў топ-менеджарамі банка за выдачу шматмільённых крэдытаў прадпрымальнікам і фізічным асобам з так званай дрэннай крэдытнай гісторыяй. Устаноўлена таксама дачыненне шэрагу службовых асоб банка да арганізацыі схем, звязаных з фактычным прымусам грамадзян да атрымання крэдытаў з наступнай перадачай грошай іншым асобам з катэгорыі дрэнных крэдытаатрымальнікаў.

«Па гэтых фактах Дэпартамент фінансавых расследаванняў распачаў шэраг крымінальных спраў па арт. 243 (ухіленне ад выплаты сум падаткаў і збораў у асабліва буйным памеры), арт. 235 (легалізацыя сродкаў, здабытых злачынным шляхам), арт. 210 (крадзеж у асабліва буйным памеры ), арт. 209 (махлярства), а таксама па арт. 430 (атрыманне хабару) і арт. 431 (дача хабару). Намі затрымана каля 20 чалавек, якія непасрэдна прымалі ўдзел у супрацьпраўнай дзейнасці, у тым ліку Бабарыка, — сказаў Іван Церцель. — Бабарыка затрыманы ў сувязі з тым, што з’яўляўся непасрэдным арганізатарам і кіраўніком супрацьпраўнай дзейнасці, спрабаваў уздзейнічаць на паказанні сведак, рабіў спробы ўтойвання слядоў учыненых злачынстваў і літаральна на днях зняў буйную суму грошай з падкантрольных яму рахункаў».

На брыфінгу журналістам паказалі дакументы, якія пацвярджаюць факты супрацьпраўнай дзейнасці Віктара Бабарыкі. Старшыня КДК адзначыў, што практычна ўсе затрыманыя супрацоўнічаюць са следствам, даюць прызнальныя паказанні, у тым ліку аб кіруючай і арганізуючай ролі экс-кіраўніка Белгазпрамбанка ў згаданых злачынных схемах.

Іван Церцель падкрэсліў, што злачынная дзейнасць такога кшталту адносіцца да найбольш удасканаленых, патрабуе ўзаемадзеяння з партнёрамі з шэрагу замежных краін. Цяпер найбольш шчыльныя кантакты ўстаноўленыя з латвійскімі праваахоўнымі органамі. Запыты аб аказанні садзейнічання накіраваны таксама ў кампетэнтныя структуры 18 дзяржаў, у тым ліку ў Вялікабрытанію, Іспанію, Нідэрланды, Чэхію. Акрамя таго, беларускія праваахоўнікі звярнуліся па садзейнічанне да кампетэнтных спецыялістаў ЗША. Паводле слоў Івана Церцеля, гэта асабліва важна, таму што Злучаныя Штаты маюць магчымасць кантролю за патокамі разлікаў у доларах ЗША праз сістэму SWІFT.

«Усе дзеянні намі праводзяцца ў адпаведнасці з дзеючым заканадаўствам. Плануем працаваць адкрыта, максімальна інфармуючы грамадскасць аб праводзімых мерапрыемствах», — гарантаваў старшыня КДК. Крымінальныя справы ва ўстаноўленым парадку перададзены ў Генеральную пракуратуру для вызначэння падследнасці.

Журналісты папрасілі кіраўніка КДК пракаментаваць тое, што асобныя СМІ звязваюць крымінальную справу ў дачыненні да топ-менеджараў Белгазпрамбанка з выбарчай кампаніяй, якая праходзіць у краіне. «Гэтыя падзеі паміж сабой ніяк не звязаныя. Камітэт дзяржаўнага кантролю дзейнічае ў строгай адпаведнасці з заканадаўствам, а таксама выконвае абавязацельствы Беларусі перад сусветнай супольнасцю па супрацьдзеянні адмыванню грошай, атрыманых незаконным шляхам», — падкрэсліў Іван Церцель.

Адказваючы на пытанні журналістаў, Іван Церцель таксама пракаментаваў заявы Віктара Бабарыкі, што знойдзеныя ў затрыманых па гэтай справе грошы належаць яму. «Сапраўды, Бабарыка заявіў, што гэтыя грошы належаць яму. Разам з тым мы дакладна ведаем з паказанняў затрыманых асоб, што гэтыя грашовыя сродкі былі незаконна выведзеныя з Беларусі па сістэме афшораў, затым размеркаваныя паміж удзельнікамі супрацьпраўнай дзейнасці ў адпаведнасці з раней абумоўленымі працэнтамі», — растлумачыў ён.

«Уяўляецца, што Бабарыка спрабуе пагуляць у высакароднасць. Мы ў сваю чаргу ведаем, што лялькаводы, якія стаяць за яго дзейнасцю, асцерагаюцца, што нашы дзеянні прывядуць да атрымання даных і пацвярджэння іх дачынення да гэтай супрацьпраўнай дзейнасці. Такімі асобамі з’яўляюцца, мы ведаем, вялікія начальнікі ў «Газпраме», а, можа быць, і вышэй», — сказаў Іван Церцель.

Выбар рэдакцыі

Эканоміка

Як абараняцца ад рыэлтараў, якія не хочуць працаваць па законе

Як абараняцца ад рыэлтараў, якія не хочуць працаваць па законе

Лiцэнзiя агенцтва «Гатовыя рашэннi» скасавана, «Iмперыi нерухомасцi» — прыпынена, а «Тваёй сталiцы» выпiсана прадпiсанне.

Палітыка

Аляксандр Лукашэнка: Гэта адна з самых складаных выбарчых кампаній

Аляксандр Лукашэнка: Гэта адна з самых складаных выбарчых кампаній

Кіраўнік дзяржавы прагаласаваў на выбарах Прэзідэнта.

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.