Інжынерны факультэт створаны ў Палескім універсітэце

У Палескім дзяржаўным універсітэце заснаваны пяты факультэт - інжынерны, паведамілі БЕЛТА ў рэктараце ВНУ.

Ключавой ідэяй стварэння новай структуры ВНУ стала падрыхтоўка кадраў для развіцця інжынірынгавага напрамку эканомікі краіны. У склад факультэта ўвайшлі тры кафедры: інфармацыйных тэхналогій і інтэлектуальных сістэм, прамысловага рыбаводства і перапрацоўкі рыбнай прадукцыі, ландшафтнага праектавання. Факультэт будзе рыхтаваць інжынераў-праграмістаў-эканамістаў, інжынераў-тэхнолагаў у рыбаводстве, інжынераў садова-паркавага будаўніцтва. Тэрмін навучання па ўсіх спецыяльнасцях - 4 гады.

"У аснову канцэпцыі факультэта пакладзены інжынірынгавыя падыходы - папулярны напрамак ва ўсім свеце. Па сутнасці, гэта комплекснае рашэнне тэхналагічных задач - ад распрацоўкі схем фінансавання і праектавання да забеспячэння вытворчасці і рэалізацыі прадукцыі або паслуг. Пры гэтым упор будзе рабіцца на праектную мадэль падрыхтоўкі інжынераў", - адзначыў дэкан факультэта кандыдат тэхнічных навук Уладзімір Штэпа.

Мяркуецца, што фактычна з другога курса студэнты разам з выкладчыкамі будуць рыхтаваць уласныя бізнес-праекты. Свае распрацоўкі будучыя інжынеры змогуць прадстаўляць на конкурсе інавацыйных праектаў Pinsk Invest Weekend, іншых стартап-мерапрыемствах. Пры падтрымцы тэхнапарку "Палессе" студэнты атрымаюць магчымасць апрабаваць атрыманыя ва ўніверсітэце веды на вытворчых прадпрыемствах і ў рэальных бізнес-структурах.

Па словах дэкана, неабходны патэнцыял ужо напрацоўваецца ў супрацоўніцтве са старажыламі навукова-тэхнічнай дзейнасці. У прыватнасці, у гэтым годзе адкрылася Міжнародная навуковая лабараторыя, дзе партнёрам выступіў Запарожскі нацыянальны ўніверсітэт. З украінскімі калегамі ў ПалесДУ ўжо пачалі рэалізоўваць праект па стварэнні комплексных сістэм ачысткі камунальна-прамысловых сцёкавых вод і энергаэфектыўных азанатараў падвышанай прадукцыйнасці. Выконваюцца сумесныя праекты і з іншымі ВНУ блізкага і далёкага замежжа.

Плануецца, што ў наступным годзе інжынерны факультэт папоўніцца кафедрай інжынерных сістэм, дзе будуць навучаць спецыяльнасці "эксплуатацыя інтэлектуальных транспартных сістэм у аўтамабільным і гарадскім транспарце". А ў хуткім часе ў Палескім дзяржаўным універсітэце будзе створана вучэбна-навуковая лабараторыя інжынірынгу.