Вы тут

У Мінску ўшанавалі памяць воінаў-інтэрнацыяналістаў


15 лютага на Востраве слёз у Мінску ўшанавалі памяць ваяроў, якія загінулі ў Афганістане. Яшчэ за паўгадзіны да пачатку ўрачыстай цырымоніі ля мемарыяла сабралася некалькі соцень чалавек. Чырвоныя гваздзікі неслі да помніка тыя, хто сам ацалеў у той калатнечы, і людзі, якія страцілі там сваіх блізкіх і родных. Прыйшло да капліцы і шмат кадэтаў, курсантаў сілавых устаноў, школьнікаў, членаў грамадскіх аб’яднанняў. Навучэнцы Сувораўскага вучылішча выстраіліся ў жывы ланцуг, трымаючы ў руках партрэты загінулых...


Першы намеснік кіраўніка Адміністрацыі Прэзідэнта Максім Рыжанкоў агучыў зварот Аляксандра Лукашэнкі да воінаў-інтэрнацыяналістаў, ветэранаў вайны ў Афганістане. «Разам з бацькамі, жонкамі, дзецьмі салдат і афіцэраў, якія загінулі ў далёкім Афганістане, мы памятаем і смуткуем аб сваіх земляках. Ганарымся мужнасцю і стойкасцю беларусаў, якія, праявіўшы гераізм і захаваўшы вернасць прысязе, сумленна выканалі свой воінскі абавязак»

Кіраўнік дзяржавы адзначыў, што дзесяцігадовы ўдзел у баявых дзеяннях абмежаванага кантынгенту савецкіх войскаў на афганскай зямлі ўжо тады паказаў, наколькі вялікія могуць быць геапалітычныя амбіцыі асобных краін і як высока цэняцца мір, стабільнасць і бяспека. «Гэтыя ўрокі актуальныя і цяпер, калі ва ўмовах разрастання міжнароднага тэрарызму і экстрэмізму адной з галоўных задач для нашай маладой суверэннай краіны застаецца захаванне і ўмацаванне незалежнасці, — падкрэсліў Прэзідэнт. — Перакананы, што воіны-інтэрнацыяналісты і надалей будуць прыкладам адвагі і гонару для маладога пакалення абаронцаў нашай Радзімы».

Ад імя членаў сямей загінулых прамаўляла Тамара Доўнар.

- Штогод люты пераносіць нас назад у 80-я гады, калі кожная маці, якая праводзіла сына ў войска, думала і малілася — толькі б не ў Афганістан... Дзесяць год «чорныя цюльпаны» прывозілі ў Беларусь труны з целамі салдат і афіцэраў. Але Афганістан у кожнага свой — як у воінаў-інтэрнацыяналістаў, так і ў сямей, куды ўжо ніколі не вернуцца дзеці, мужы, браты... Гэта боль, з якім мы жывем і сёння.

Міністр абароны Віктар Хрэнін зазначыў, што ў Афганістане воіны-інтэрнацыяналісты прынялі бой з міжнародным тэрарызмам.

- У сучасных умовах выклікаў і пагроз наша дзяржава высока цэніць ролю воінаў-інтэрнацыяналістаў, іх ролю ва ўмацаванні згоды ў грамадстве, выхаванні моладзі ў духу патрыятызму і вернасці Айчыне. Мы заўсёды будзем памятаць тых, хто не вярнуўся з палёў бітваў.

- Адзін ветэран казаў — «я прачынаўся, калі была цішыня. Падчас страляніны я спаў спакойна», — згадвае міністр унутраных спраў Юрый Караеў. — Праходзячы зараз па мосце да помніка, міма партрэтаў загінулых афганцаў, і ўглядаючыся ў твары гэтых хлопцаў, я ўбачыў і свайго аднагодка — сяржанта дэсантна-штурмавой брыгады. Цяпер яму было б столькі гадоў, колькі і мне... Распавядаць пра Афганістан трэба, інакш пра яго забудуць.

...Адзін пажылы воін-інтэрнацыяналіст прадставіўся Міхаілам. Ён служыў больш за год у Кабуле. 

- Я калі вярнуўся назад у Беларусь, то паўгода не мог спакойна спаць. Афганская сталіца жа пастаянна абстрэльвалася, як удзень, так і ўначы. І вось даходзіла да таго, што калі заходзіць сонца — а ў паўднёвых гарах гэта адбываецца імгненна — і надыходзіць цемра, ты ляжыш на койцы, а заснуць не можаш. Таму што разумееш, што няма абстрэлу, і чакаеш нейкай «падлянкі». 

Дома ў нашай вёсцы пра падзеі ў Афганістане ведалі. Але спачатку выключна дзякуючы таму, што прарывалася праз глушылкі на радыёхвалях. Пасля папаўзлі нейкія чуткі. І калі тэрмін службы скончыўся і я перасек савецкую мяжу, то доўга не мог паверыць, што ўсё засталося там, на поўдні. Што не будзе больш абстрэлаў, баявых трывог, штодзённай гульні са смерцю, магчымых нападаў... А ў галаве ўсю дарогу ад Тэрмеза круцілася адно — як ад усяго гэтага хутчэй адысці. Маці казала, што на мне літаральна твару не было першы час...

Валяр’ян ШКЛЕННІК

Фота Анатоля КЛЕШЧУКА

Выбар рэдакцыі

Рэгіёны

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Як мы бярозавік куплялі на гандлёвай пляцоўцы лясгаса і ў лясніцтве

Культура

Анатоль Ярмоленка: Нас натхняе беларуская паэтычная класіка

Анатоль Ярмоленка: Нас натхняе беларуская паэтычная класіка

Творчая вечарына народнага артыста Беларусі прайшла ў адной з мінскіх гімназій.