Мінскі стадыён сярод найлепшых у свеце

Рэканструяваны «Дынама» ўвайшоў у спіс намінантаў на званне «Стадыён 2018 года». Такая інфармацыя размешчана на сайце stаdіumdb.соm.

Акрамя дынамаўскага, на званне найлепшага стадыёна планеты 2018 года прэтэндуюць яшчэ 26 арэн з ЗША, Аўстраліі, Аўстрыі, Італіі, Венгрыі, Турцыі, Ірана, Ірака і Кітая. Пераможца будзе вызначаны пасля выбару прафесійнага журы архітэктараў, а таксама адкрытага галасавання балельшчыкаў, якое завершыцца 3 сакавіка на сайце stаdіumdb.соm. Вынікі будуць абвешчаныя 7—8 сакавіка. Адзначым, што ў 2015 годзе на гэтую ўзнагароду прэтэндавала «Барысаў-Арэна», яна заняла 7-е месца.

Нагадаем, стадыён «Дынама» быў пабудаваны ў 1934 годзе, пасля чаго некалькі разоў рэканструяваўся. Цяпер яго трыбуны змяшчаюць 22 246 гледачоў. Арэна можа прымаць самыя прэстыжныя міжнародныя спаборніцтвы па лёгкай атлетыцы і футболе. У чэрвені мінскі стадыён «Дынама» прыме цырымоніі адкрыцця і закрыцця, а таксама лёгкаатлетычны турнір ІІ Еўрапейскіх гульняў 2019 года.

Дар'я Лабажэвіч